Read Sehwi Ɛksadɔso 2 Bible Online

Ɛksadɔso 2 - Sehwi bible

Ɛksadɔso 2

¹Biaa bie bɔ ofi Lewi abusua nu oogyale Lewi abusua nu braa.

² Braa ne nwonzɛle, na ɔwole baa bienzua. Na onwuni kyɛ ye nwo yɛ nyemene nen, ɔfale ye feale toonn bosome nza.

³Afei de, né ɔfa ye fea a ɔnyɛ yee ko, yiti ɔfale elemmire kɛndɛen, ɔfale pɔweɛ nzue ne ehwaa fale ye nwo, ɔfale adɔma ne tole nu, na ɔɔfale ye siele ngyɛngyɛma nu wɔ asue Naele noa.

⁴Na adɔma n’aliɛma brasua oogyinane dedeede neane bɔ ɔkɔto adɔma ne ɔ.

⁵ Faro awa brasua wale kyɛ ɔbaabia asue ne anu. Né ye abaawa nemɔ natenate asue ne noa. Onwuni kyɛ kɛndɛen ne gyi ngyɛngyɛma ne anu, na ɔsomane ye abaawa ne ko kyɛ ɔɔfa bra.

⁶Obukyele so nen, onwuni adɔma bienzua bɔ osũ ɔ. Ɔyɛle ye anwumvo, na ɔhane kyɛ, “Hebrifoɛ mma ne bie ɛne.”

⁷Na adɔma n’aliɛma brasua ne bisale Faro awa brasua ne kyɛ, “Ngɔmvrɛ Hebri mmrasua nemɔ ko mmrɛ wɔ ma ɔma adɔma ne nyɔfone ma wɔ anaa?”

⁸Na Faro awa brasua ne buale ye kyɛ, “Yoo, kɔ.” Na abaayaa ne ɔɔfrɛle adɔma ne maame wale.

⁹Na Faro awa brasua ne sele ye kyɛ, “Fa adɔma ne kɔma ye nyɔfone ma me, na ngotua wɔ kerɛ.” Yiti braa ne fale ye hɔle ɔɔmane ye nyɔfone.

¹⁰Akwadaa ne nyini, na ɔɔfale ye mane Faro awa brasua ne. Ɔfale ye yɛle ɔwa, na ɔtole ye dumaa Mose,[2] ofikyɛ ɔhane kyɛ, “Nzue nu yeɛ nyele ye mvili ɔ.”

¹¹ Mose nyini ne, ɛlɛho bie ɔɔpasale oliɛma mɔ Hebrifoɛ nwo, na onwuni adwuma serɛ bɔ né bɛ́hyɛ bɛ maa bɛyɔ ɔ. Na onwuni kyɛ Misraimniɛ bie ɔ́bo oliɛma Hebrifoɛ nemɔ anu ko ɔ.

¹² Ɔtotole ye nye bra yiale, na onwuni kyɛ sona biala nne berɛ nen, ohuni Misraimniɛ ne, na ɔfale ye feale anweaa nu.

¹³Aleɛ hyene ne, ofitele, edwirɛ nwanwa, onwuni Hebrifoɛ nyɔ kyɛ bɛ́ko ɔ. Na obisale bɔ ye dwirɛ nyɛ fɛ ne kyɛ, “Nzu ati yeɛ ɛ́bo eliɛngo ɔ?”

¹⁴ Na obuale kyɛ, “Nwa yeɛ ɔyɛle wɔ yɛ so panyi ne ndɛenbualɛniɛ ɔ? Ɛpena kyɛ eku me kyɛbɔ ehuni Misraimniɛ ne anaa?” Yiti edwirɛ ne mane Mose surole, na ɔhane ye ye ti anu kyɛ, “Eh, edwirɛ ne afite amba!”

¹⁵ Na Faro tele sɔ dwirɛ nen, ɔyɛle kyɛ okohu Mose. Nakoso Mose nwatili Faro, na ɔɔtenane Midian maen nu wɔ abura bie anwo.

¹⁶Né Midian sɔfo le mmaa mmrasua nzoo, na bɛwale berɛ kyɛ bɛbaato nzue begua nningyein bɔ bɛ baba nyɛmmoa no nu nzue ne anu.

¹⁷Mmoaenneafoɛ biemɔ wale bɛɛfoane bɛ, nakoso Mose dwɔsole, ohuru gyinane bɛ si, na ɔmane mmoaen nemɔ nzue.

¹⁸Na besa bɛwale bɛ baba Rewel[3] berɛ nen, obisale bɛ kyɛ, “Nzu ati yeɛ ɛnɛ de ɛmɔawa ndɛ sɔa ye?”

¹⁹Bebuale kyɛ, “Misraimniɛ bie lele yɛ fili mmoaenneafoɛ nemɔ sa nu, ɔtole nzue mane yɛ po, na ɔmane yɛ mmoaen nemɔ nzue.”

²⁰Na obisale ye mma mmrasua nemɔ kyɛ, “Ɔwɔ nisua? Nzu ati yeɛ ɛmɔayakyi biaa ne dɔ ɔ? Ɛmɔɔfrɛ ye ma oodidi.”

²¹Mose penene so ɔne biaa ne bɛtenane, na ɔfale ɔwa brasua Sipora mane Mose gyale.

²²Sipora wole baa bienzua, na Mose tole ye dumaa Gɛsɔm,[4] ɔnate kyɛ Mose hane kyɛ, “Maayɛ ɛwɔfoɛ wɔ amanvrafoɛ aseɛ so.”

²³Afoɛ pee pɛle nu, na Misraim hene wuli. Afei Yisraelfoɛ nwuni ngoaasolɛ nu amaneɛ piri paa; bɛbɔle awuye, na bɛ suɛ wɔ ngoaasolɛ nu ne dwuli Nyameɛ nyunu.

²⁴ Nyameɛ tele b’awuyebɔlɛ ne, na ɔkayele apam bɔ ɔne Abraham, Yisake ne Yakob bɛyɛle ne.

²⁵Nyameɛ neane Yisraelfoɛ nemɔ, na bɛyɛle ye anwumvo.