Read Sehwi Ɛksadɔso 22 Bible Online

Ɛksadɔso 22 - Sehwi bible

Ɛksadɔso 22

¹“Sɛ ebie wua nandwie anaa boaen, ná oku ye, anaa ɔyɛ ye atɔen a, ɔsɛ kyɛ ɔfa nandwie nnu tua nandwie ko ne kerɛ, ná ɔfa mmoaen nna tua boaen ko ne kerɛ. Ɔsɛ kyɛ awueniɛ ne tua mbata, nakoso sɛ wangora ye tua a, ye de ɔsɛ kyɛ bɛyɛ ye atɔen betua kerɛ.

²Sɛ benwu kaka bɔ owuale ne kyɛ owwuli, ná mmom ɔwɔ ye berɛ a, sɛ nandwie ahɔ oo, afunum ahɔ oo, anaa boaen ahɔ oo, ɔsɛ kyɛ otua kerɛ mmɔhoɛ nyɔ.

³“Sɛ bɛkye awueniɛ kyɛ ótu anoa bo ba nu, ná bɛbɔ ye maa owu a, sona bɔ ɔbɔle ye ne onni ye wue nwo fɔ.

⁴Nakoso sɛ ɛhe si wɔ mmerɛ bɔ eyia apukye a, ye de odi ye wue nwo fɔ.

⁵“Sɛ ebie fa ye ngaka kɔ adidie wɔ fieso anaa bobe boo nu, ná ɔyakyi ngaka nemɔ maa bekodi ebie boo a, ɔsɛ kyɛ ɔfa ye bɔbɔ ye boo nu aleɛ paa, anaa ye bobe mmaa paa tua kerɛ.

⁶“Sɛ see tɔ nekaa bie, ná ɔkɔsɔ ngyɛngyɛma nu, ná ɔkɔyera pata so aburoo, anaa fieso aburoo, anaa aburoo boo a, ɔsɛ kyɛ sona bɔ ɔtole see ne tua kerɛ.

⁷“Sɛ ebie fa ye sikaa anaa nningyein ma obiɛngo sie, ná bewua ye wɔ sɔ sona ne awuro a, sɛ bɛkye awueniɛ ne a, ɔsɛ kyɛ awueniɛ ne tua ye mmɔhoɛ nyɔ.

⁸Nakoso sɛ bangye awueniɛ ne a, ye de ɔsɛ kyɛ awuro mene ne ba Nyameɛ nyunu bata ndaen fa sa ye nwo, ná ɔfa kyire kyɛ nna ye yeɛ ɔfale ɔ.

⁹“Edwudwolɛ biala bɔ ɔkɔwa ne, sɛ ɔfa nandwie nwo oo, afunum nwo oo, boaen nwo oo, ndaadeɛ nwo oo, anaa nikyee bie bɔ wamini nwo oo, bɔ mmenia ne anu biala nwa: ‘Me deɛ ɔ’ nen, odi kyɛ sɔ mmenia nyɔ ne fa bɛ dwirɛ ne ba Nyameɛ nyunu. Na bɛ nu ko bɔ Nyameɛ kobua ye foɛ nen, okotua ye mmɔhoɛ nyɔ kɔma obiɛngo ne.

¹⁰“Sɛ ebie fa ye afunum, nandwie, boaen, anaa kaka biala wura obiɛngo sa, ná sɛ kaka ne wu, opura, anaa bewua ye bɔ ebiala nye ambɛ so ne,

¹¹ɔsɛ kyɛ bɛ munyɔ bɛta ndaen wɔ AWURADE nyunu; ná ɔsa ye nwo kyɛ ɔyyɔle obiɛngo kaka ne hwee. Ɔsɛ kyɛ kaka ne mene pene so, na ɔnzɛ kyɛ ode obiɛngo ne berɛ.

¹²Nakoso sɛ ye sa nu yeɛ bewuale de a, ye de ɔkɔfa bie kosi ye mene gya nu.

¹³Sɛ kaka bie yeɛ wahũ ye watete ye pasaa a, maa ɔfa bra ooli adanzeɛ; na kaka bɔ watete pasaa ne de, ɔngɔfa bie ngosi ye gya nu.

¹⁴“Sɛ ebie fɛmo kaka fi obiɛngo berɛ, ná kaka ne pura anaa owu, wɔ aberɛ bɔ ye mene nne berɛ a, ɔsɛ kyɛ ɔfa bie si ye mene ne gya nu.

¹⁵Nakoso sɛ edwirɛ ne sili ye mene nyunu a, ye de obiɛngo ne ngɔfa bie ngosi ye gya nu. Sɛ olele ye sikaa koraka yeɛ ɔfa kaka ne fɛmo ye a, ye de sikaa ne ate kerɛ.

¹⁶ “Sɛ ebie lakalaka ababunu bɔ onnwuni biaa le, bɔ bennya bɛbbɔle ye asiwa, ná ɔne ye bɛda a, ɔsɛ kyɛ ɔyɔ ye nwo nningyein ná ogya ye.

¹⁷Na sɛ braa ne baba mbene so kyɛ ogya biaa ne a, ye de ɔsɛ kyɛ biaa ne tua sikaa bɔ ɔne ababunu nwo nningyeinyɛlɛ te pɛ ɔ.

¹⁸ “Nnɛma musueyelɛniɛ brasua nya ye ti didi nu.

¹⁹ “Sona bɔ ɔne kaka kɔla nen, ɔsɛ kyɛ beku sɔ sona ne.

²⁰“Sona biala bɔ ɔkɔbɔ afɔleɛ kɔma bosoen, bɔ wammɔ wamma AWURADE ngome twe nen, ɔsɛ kyɛ beku ye korakorakorakora.

²¹ “Nnɛdi ɛwɔfoɛ aminɛ, anaa nnɛsisi ye, ofikyɛ né ɛmɔ koso ɛmɔte wɔfoɛ wɔ Misraim aseɛ so.

²² Nnɛma ɛmɔsisi kunaniɛ brasua, anaa awisianiɛ biala.

²³Sɛ ɛmɔsisi bɛ ná besu bɛfrɛ me a, ngotie bɛ suɛ ne paa;

²⁴na ngɔfɛ yaa piri paa, ná mafa ngrandɛ mahu ɛmɔ: ɛmɔ aye mɔ kɔyɛ kunafoɛ, ná ɛmɔ mma mɔ ayɛ awisiafoɛ.

²⁵“Me mmenia ehiafoɛ bɔ bɛwɔ ɛmɔ nu ne, sɛ ɛfa sikaa fɛmo bɛ nu biala a, nnɛyɛ ye kyɛ sona bɔ ɔbɔ bosea ɔ, yeɛ nnede ye berɛ nzihoɛ.

²⁶Sɛ ede ebiɛngo tena ɛfa si wɔ berɛ awowaa a, fa ye nikyee kɔma ye koraka né eyia atɔ;

²⁷ofikyɛ ye tena ala ɛne, bɔ ɔfa kata ye nwo hɔ ɛne. Nzu yeɛ ɔ́fa gurɔ ye nwo ɔla ɔ? Na sɛ osũ frɛ me a, ngotie ye, ofikyɛ mese anwumvoin.

²⁸ “Nnɛkã edwirɛ tɛɛ tia Nyameɛ, yeɛ nnɛnoma wɔ maen panyi.

²⁹ “Wɔ fieso nningyein ne wɔ ngoo bɔ beli moa ne, nnɛtwetwe wɔ bo ase kyɛ ɛkɔfa kɔbɔ afɔleɛ kɔma me ɔ. Wɔ mma mmienzua nemɔ nu bamuɛbaa ne, fa ma me.

³⁰Sɔ ala yeɛ yɛ wɔ nandwie ne wɔ mmoaen ɔ: Maa oli oni anwo ɛlɛsoo, nakoso ye ɛlɛbɔtwɛ ne aso de, fa ye ma me.

³¹ “Ɛmɔkɔyɛ me mmenia krongron, yiti nnɛma ɛmɔdi naen biala bɔ kaka bie ahu ye wɔ eburo ɔ; ɛ́mɔgyi bégua bɛ́ma ngyea.