Read Sehwi Ɛksadɔso 23 Bible Online

Ɛksadɔso 23 - Sehwi bible

Ɛksadɔso 23

¹ “Nnɛbɔ edwirɛ bɔ ɔtte nahorɛ nwo dawure. Nnɛfa wɔ nwo bɔ amumuyɛɛniɛ ná edi adanzewia.

²Nnɛdi mmeni soma si ɛkɔyɔ bɔne. Sɛ édi dwirɛ bie nwo adanzeɛ a, nnɛdi mmeni soma noa dwirɛ si, ná angyea nahorɛ ne;

³ yeɛ nnɛdi adanzewia ma ehianiɛ.

⁴“Sɛ enwu kyɛ wɔ pɔfoɛ nandwie anaa ye afunum ate, ná ɔnatenate mbaen a, ka ye sá fa ye kɔma ye.

⁵Sona bɔ onguro wɔ dwirɛ ne, sɛ enwu kyɛ ye afunum nningyein abutu agua afunum ne aso a, nnɛyakyi ye ne kaka ne berɛ kɔ; boka ye mene ne maa ɔpagya ye gyina berɛ.

⁶“Nnɛbua ɛmɔ nu ehiafoɛ ndɛengyea wɔ edwirɛ hanɛ nu.

⁷ Nnɛto ebiɛngo soen, yeɛ nnɛku sona bɔ odi be ná ɔtengyɛ ɔ, ofikyɛ mengobua amumuyɛɛniɛ be.

⁸Nnede fea-ase-ma, ofikyɛ fea-ase-ma ma mbanyi bu bɛ nye gua ndɛen turoloo so, na ɔma mmenia bua bɛ bɔ bedi be ɔ ndɛengyea.

⁹ “Nnɛsisi ɛwɔfoɛ. Ɛmɔse kyɛbɔ ɛwɔfoɛyɛlɛ si te ɔ, ofikyɛ né ɛmɔ wora ɛmɔte wɔfoɛ wɔ Misraim aseɛ so.

¹⁰ “Fa afoɛ nzia dua w’aseɛ so nningyein, ná pɛ so aleɛ ne.

¹¹Nakoso afoɛ bɔ ɔtɔ so nzoo ne de, ma aseɛ ne ɔla berɛ mbaen ná ole ye nwome; amaa ɔnate so ɛmɔ nu ehiafoɛ mɔ badidi so; ná eburo ngaka koso bali ye boso ne. Sɔ ala yeɛ yɔ wɔ bobe boo ne wɔ olive boo ɔ.

¹² “Fa elesia yɔ w’adwuma, nakoso kyẽa bɔ ɔtɔ so nzoo ne de, de wɔ nwome; amaa ɔnate so wɔ nandwie ne w’afunum bale bɛ nwome, ná w’afaneɛ awa ne wɔ wɔfoɛ koso bale bɛ nwome.

¹³Bɔ mahã mahyire ɛmɔ ne amukoraa, ɛ́mɔli so. Nnɛma ɛmɔbɔ nyameɛ foforɛ biala dumaa; yeɛ nnɛmɔma ofite ɛmɔ noa.

¹⁴ “Afoɛnoa biala, di aluolue pɛen nza fa hyɛ me animnyam.

¹⁵“Di Paanoo Kabrɛdi aluolue ne. Fa ɛlɛsoo di paanoo kabrɛdi, wɔ mmerɛ bɔ mahyɛ ne, wɔ bosome Abibo nu, kyɛbɔ mahyɛ wɔ ne ala. Ofikyɛ sɔ bosome ne anu yeɛ etuli wɔ bo fili Misraim ɔ. Nnɛma ebiala fa ye sa mbaen ba me nyunu.

¹⁶“Di Buberɛ aluolue ne, wɔ mmerɛ bɔ ekoli moa kɔpɛ aleɛ bɔ alua ye wɔ aseɛ ne aso ne. Di Aleɛ Noa Boaboalɛ aluolue ne, wɔ afoɛ ne ayieleɛ, mmerɛ bɔ afa wɔ boo nu aleɛ ne.

¹⁷Afoɛnoa biala, ɔsɛ kyɛ wɔ mmienzua mukoraa bɛba AWURADE Nyameɛ nyunu.

¹⁸ “Mogya bɔ ɛfa bɔ afɔleɛ ma me ne, nnɛfa paanoo harewaa boka so; yeɛ nnɛma aleɛ kye ɛloe bɔ ɔwɔ m’afɔleɛ nu ne aso.

¹⁹ “W’aseɛ so aleɛ paa bɔ ekoli moa kɔpɛ ne, fa brɛ AWURADE wɔ Nyameɛ awuro. Nnɛfa abɔngye ba oni nyɔfonesue gua ye nwo to.

²⁰“Tie, mésoma abɔfo maa odi wɔ nyunu, maa ɔbɔ wɔ nwo waen fa wɔ kɔ nekaa bɔ masiesie ne.

²¹Suro ye ná tie ye dwirɛ. Nnɛtwi fa ye dwirɛ so, na ɔngɔfa ɛmɔ mmeraatolɛ ngɔhyɛ ɛmɔ, ofikyɛ me dumaa la ye so.

²²Na sɛ ɛyɛ asoɛ ma ye, ná ɛyɔ bɔ mekã mekyire wɔ amukoraa a, ye de ngɔyɛ pɔfoɛ ngɔma wɔ pɔfoɛ mɔ, ná maho matia bɛ bɔ bɛko betia wɔ ɔ.

²³Na sɛ m’abɔfo ne di wɔ nyunu fa wɔ kodwu Amorifoɛ, Hitifoɛ, Perisifoɛ, Kanaanfoɛ, Hiwifoɛ ne Yebusifoɛ berɛ a, ngokyikyi bɛ boso bɔkɔɔ.

²⁴Nnɛbɔ wɔ ti ase ma bɛ mmosoen nemɔ, nnɛsɔne bɛ, yeɛ nnɛyɔ bɛ yɔleɛ ne bie. Na mmom sɛkyesɛkye bɛ bosoen nemɔ bɔkɔɔ, ná bubu bɛ bonima nemɔ nu gɔsɔgɔsɔ.

²⁵AWURADE ɛmɔ Nyameɛ yeɛ odi kyɛ ɛmɔsɔne ye ɔ, na ngoyira ɛmɔ aleɛ ne ɛmɔ nzue so, ná maye anwonyerɛ mafi ɛmɔ so.

²⁶Wɔ maen ne anu brasua biala ngɔpɔ baa, anaa ɔngɔyɛ mmotaen, na ngɔma wɔ ngoa tendenn.

²⁷“Ngɔma me nwo suronyi koli wɔ nyunu, na maen biala bɔ ekodwu so ne, ngɔma ahunundetelɛ kɔtɔ nu mmenia so. Na ngɔma wɔ pɔfoɛ amukoraa kɔnwati kofi wɔ nyunu.

²⁸Ngɔsoma kotokuradu mɔ maa bekoli wɔ nyunu, na bɛkɔfoa Hiwifoɛ, Kanaanfoɛ ne Hitifoɛ bekofi wɔ nyunu.

²⁹Mengɔfoa bɛ ngofi wɔ nyunu wɔ afoɛ komapɛ twe nu, ofikyɛ ɔba ye sɔ a, aseɛ ne kɔla berɛ pralaa, na so ngaka aboyaa kɔyɛ pee kɔha wɔ.

³⁰Ngɔfoa bɛ ngofi wɔ nyunu ngaka ngaka, kɔpem kyɛ wɔ boso kɔta, ná afa aseɛ ne ɔ.

³¹Ngɔto wɔ wɛen ngofi Ɛpo Kɔkorɛ noa maa okoodwu Filistifoɛ mboanoa, fi ɛserɛ so kodwu asue Yufreti noa. Ofikyɛ ngɔmaa ɛmɔkoli aseɛ ne asofoɛ so ngonim, ná afoa bɛ afi wɔ nyunu.

³²Nnɛne bɛ, anaa bɛ bosoen mɔ yɛ apam.

³³Nnɛmaa bɛtena w’aseɛ so, anyɔ a né bamaa ayɔ bɔne atia me; ofikyɛ sɛ ɛso bɛ bosoen nemɔ a, ɔkɔyɛ wɔ so ngaen.”