Read Sehwi Ɛksadɔso 26 Bible Online

Ɛksadɔso 26 - Sehwi bible

Ɛksadɔso 26

¹ “Na nyianu sua ne de, fa mbɛmuɛ tena buru, bɔ bafa nwera, bibire, koogyan ne adaabene banwo ɔ si. Ma adwiililɛniɛ ɔnwo kɛrubim ndiamuɛ gua nu.

²Ma mbɛmuɛ tena ko biala tendenn ɔyɛ agyirɛ aburanyɔ ne mmɔtwɛ, ná ko biala tɛtrɛtɛɛ nu ɔyɛ agyirɛ nna. Susu mbɛmuɛ tena ne amukoraati ma bɛyɛ pɛpɛɛpɛ.

³Mbɛmuɛ tena ne, maa bɛpa nnu bɛsosɔ so ma ɔyɛ ko, ná bɛpa mbɛmuɛ tena nnu bɔ waha ne koso bɛsosɔ so ma ɔyɛ ko.

⁴Mbɛmuɛ tena ndoasoɛ bɔ oli moa ne, bobɔ ko bɔ oli moa ne noa kɔtɔkaa bibire. Sɔ ala yeɛ mbɛmuɛ tena ndoasoɛ bɔ ɔtɔ so nyɔ ne wora, bobɔ ko bɔ oli moa ne noa kɔtɔkaa bibire ɔ.

⁵Bobɔ kɔtɔkaa aburannu wɔ mbɛmuɛ tena ndoasoɛ ko noa, ná bobɔ kɔtɔkaa aburannu wɔ mbɛmuɛ tena ndoasoɛ bɔ ɔtɔ so nyɔ ne koso noa. Ma kɔtɔkaa nemɔ bɛ nye neanea bɛ biɛngo nyunu.

⁶Yɔ sikaa kɔkorɛ tɔkorɔ aburannu, ná fa sosɔ mbɛmuɛ tena ndoasoɛ nemɔ anu ma nyianu sua ne oyia yɛ mumua.

⁷“Fa abɔngye nwiaa nwo ɛtena, ná fa yɛ kuku kuru nyianu sua ne aso. Nwo ɛtena buru ne ko.

⁸Ma ɛtena ko biala tendenn nu ɔyɛ agyirɛ aburasa, ko biala tɛtrɛtɛɛ nu ɔyɛ agyirɛ nna. Ɛtena buru ne ko ne, maa bɛyɛ pɛpɛɛpɛ.

⁹Ɛtena ne, fa nnu toatoa so ma ɔyɛ ko, ná fa nzia koso toatoa so ma ɔyɛ ko. Ɛtena bɔ ɔtɔ so nzia ne, bu to bɔ ɔtɔ so nnu ne aso wɔ ɛtena sua ne anoa nu berɛ.

¹⁰Ɛtena ndoasoɛ bɔ oli moa ne, bobɔ kɔtɔkaa aburannu wɔ ko bɔ oli nziɛ ne noa. Yeɛ ɛtena ndoasoɛ bɔ ɔtɔ so nyɔ ne koso, bobɔ kɔtɔkaa aburannu wɔ ko bɔ oli nziɛ ne noa.

¹¹“Yɔ kɔɔbere tɔkorɔ aburannu, ná fa tɔkorɔ nemɔ wurawura kɔtɔkaa nemɔ anu ma ɛtena sua ne oyia, ná ɔyɛ mumua.

¹²Na ɛtena bɔ wabo ɛtena sua ne aso nen, ɛtena sii bɔ waha ne, maa osinze nyianu sua ne asi dɔ.

¹³Ɛtena ne kɔbo ɛtena sua ne aso agyirɛ ko wɔ ye ngyɛnu faen, né wasa wabo so agyirɛ ko wɔ ye ngyɛnu dɔ. Bɔ wabo so ne, maa osinze nyianu sua ne ye ngyɛnu ne ye ngyɛnu, ná ɔ́yɛ ngatasoɛ.

¹⁴Fa boaen nwomaa bɔ bawura ye ayire kuru ɛtena sua ne anwo, ná fa abɔngye nwomaa koso kata boaen nwomaa ne aso.

¹⁵ “Fa bɔsema yɛ nyianu sua ne ye ndaboa mɔ ma begyinagyina berɛ.

¹⁶Ma taboa ko biala ye tendenn yɛ agyirɛ buru, ná ye tɛtrɛtɛɛ nu koso yɛ agyirɛ ko ne bue.

¹⁷Taboa ko biala, maa onya pɛmbɛen nyɔ bɔ bɛkɔsosɔ bɛ nwo nu bɛkɔbɔ nu ɔ; na sɔ ala yeɛ yɔ nyianu sua ndaboa ne amukoraati ɔ.

¹⁸Sɔaa yeɛ yɔ nyianu sua ndaboa nemɔ ɔ: ma ndaboa aburanyɔ beeli ye ngwaen dɔ wɔ famaa so.

¹⁹Fa ɛdwetɛ yɔ nyinasoɛ aburanna ma ndaboa aburanyɔ nemɔ begyinagyina so. Ma taboa ko biala ye pɛmbɛen nyɔ ne begyina nyinasoɛ nyɔ so, na sɔ ala yeɛ yɔ ye ngaa nemɔ ɔ.

²⁰Nyianu sua ne ngyɛnu bɔ ɔwɔ ye sorɔ dɔ ne, fa ndaboa aburanyɔ siesie berɛ,

²¹ná fa ɛdwetɛ yɔ bɛ nyinasoɛ aburanna ne. Ma taboa bɔ oli moa ne nya nyinasoɛ nyɔ, yeɛ bɔ ɔtoa berɛ ne koso nya nyinasoɛ nyɔ.

²²Nyianu sua ne si dɔ wora, wɔ eyia atɔleɛ bue nu dɔ, ma ndaboa nzia bra berɛ.

²³Fa ndaboa nyɔ siesie nyianu sua ne ndweaso nemɔ aso, wɔ ye si dɔ.

²⁴Mbuna nemɔ, maa bɛ nu tete fite aseɛnwo. Nakoso ka bɔ ye nwo wɔ ye anwuro dɔ ma bewura kɔtɔkaa bɔ oli moa ne anu. Sɔ yeɛ yɔ mbuna nyɔ ne ɔ: maa bɛyɛ ye ndweaso nyɔ ne.

²⁵Ma ndaboa nemɔ yɛ mmɔtwɛ, ɔne b’ɛdwetɛ nyinasoɛ buru ne nzia. Taboa bɔ oli moa ne, maa onya nyinasoɛ nyɔ, yeɛ bɔ ɔtoa berɛ ne koso ye nyinasoɛ nyɔ.

²⁶“Fa bɔsema yɛ kwatena mɔ. Ndaboa bɔ bɛwɔ nyianu sua ne ye bue ko ne, fa kwatena nnu gua so.

²⁷Ndaboa bɔ bɛwɔ nyianu sua ne ye bue ko ne wora, fa kwatena nnu gua so. Ndaboa bɔ bɛwɔ nyianu sua ne bue dɔ, bɔ ɔwɔ eyia atɔleɛ bue nu dɔ ne wora, fa kwatena nnu gua so.

²⁸Kwatena bɔ ɔla afia, bɔ ɔla ndaboa nemɔ afia ne, maa ofi ye ti ɔɔhã ye ti.

²⁹Fa sikaa kɔkorɛ boro ndaboa nemɔ anwo, ná fa sikaa kɔkorɛ bɔ kɔtɔkaa bɔ ɔkɔsosɔ kwatena nemɔ anu ɔ. Fa sikaa kɔkorɛ boro kwatena nemɔ anwo.

³⁰Kyɛbɔ masusu nyianu sua ne mahyire wɔ wɔ bokaa ye aso ne, sɔ ala yeɛ si ye ɔ.

³¹ “Fa bibire, koogyan, adaabene ne nwera yɔ mbɛmuɛ tena. Ma adwiililɛniɛ ɔnwo kɛrubim ndiamuɛ gua nu.

³²Fa sinze bɔsema bonima nna, bɔ bafa sikaa kɔkorɛ baboro bɛ nwo, bɔ bele sikaa kɔkorɛ ndɔkorɔ, bɔ begyigyi ɛdwetɛ nyinasoɛ nna so ɔ so.

³³Fa mbɛmuɛ tena ne sinze tɔkorɔ nemɔ aso, ná fa Adanzeɛ alaka ne sie mbɛmuɛ tena ne asi. Mbɛmuɛ tena ne yeɛ okonwi nekaa krongron ne ɔne krongron nu krongron ne b’afia kɔma wɔ ɔ.

³⁴Fa mbata bia ne sie Adanzeɛ alaka ne aso wɔ krongron nu krongron ne anu.

³⁵Fa ɛpoen ne sie mbɛmuɛ tena ne asi, ná fa kanea bakaa ne sie ɛpoen ne ndendeneɛ so wɔ nyianu sua ne ngwaen. Fa ɛpoen ne sie nyianu sua ne sorɔ.

³⁶“Fa bibire, koogyan, adaabene ne gyese nwo ɛtena bɔ bɛkɔfa bekonwi ɛtena sua ne anoa nu berɛ ɔ, ɛtena bɔ bali adwii bagua nu ɔ.

³⁷Ma ɛtena ne osinze bɔsema bonima nnu bɔ bafa sikaa kɔkorɛ baboro bɛ nwo ɔ so. Fa sikaa kɔkorɛ yɔ bɛ tɔkorɔ nemɔ, ná fa kɔɔbere yɔ bɛ nyinasoɛ nnu ne.