Read Sehwi Ɛksadɔso 28 Bible Online

Ɛksadɔso 28 - Sehwi bible

Ɛksadɔso 28

¹“Afei, ye eliɛma Aarɔn ne ye mma mmienzua nemɔ sie ahameɛ fi Yisraelfoɛ nu ma bɛbra wɔ berɛ, ná beeli sɔfo bɛso me. Mekyire Aarɔn ne ye mma mmienzua Nadabo ne Abihu, yeɛ Eleasa ne Yitama.

²Pomba ndaadeɛ krongron ma eliɛma Aarɔn ma onya animnyam ne dibea.

³Ka kyire bɛ bɔ bedi adwii, bɔ mafa sɔ nworɛ ne mama bɛ amukoraati, kyɛ bɛ́pomba ndaadeɛ bɛ́ma Aarɔn ma ɔyɛ krongron, ná oli sɔfo so me.

⁴Ndaadeɛ bɔ ɔsɛ kyɛ bɛpomba nemɔ ɛhe: ahone so aguasoɛ, ɔsɔfo ataadeɛ, ataadeɛ tendenn, aguasoɛ bɔ banwo nningyein bagua nu ɔ, yeɛ abotire ne abɔsoɛ. Ɔsɛ kyɛ bɛpomba ndaadeɛ krongron hemɔ bɛma eliɛma Aarɔn ne ye mma mmienzua nemɔ, maa bedi sɔfo bɛso me.

⁵Esikaa kɔkorɛ, bibire, koogyan, adaabene ne nwera paa yeɛ ɔsɛ kyɛ bɛfa bɛyɔ ɔ.

⁶“Ɔsɛ kyɛ adwiililɛfoɛ fa sikaa kɔkorɛ, bibire, koogyan, adaabene ne nwera yeɛ bɛyɔ ɔsɔfo ataadeɛ ne ɔ.

⁷Ɔsɛ kyɛ onya ye bati so nyamaa nyɔ bɔ bapa basɔ ye noa nyɔ ne aso ɔ, ná bahora babɔ ye porɛ.

⁸Ye abɔsoɛ bɔ bali adwii bagua nu ne, ɔsɛ kyɛ nningyein komapɛ ne ala yeɛ bɛfa bɛyɔ ɔ: sikaa kɔkorɛ, bibire, koogyan, adaabene ne gyese.

⁹Nyɔboɛ bɔ bɛfrɛ ye onike ne, fa nyɔ, ná di adwii kolikoli Yisrael mma mmienzua nemɔ dumaa gua so.

¹⁰Ma bɛ nu nzia dumaa bra nyɔboɛ ko aso, ná nzia bɔ baha ne wora bɛ dumaa bra nyɔboɛ ko aso, kyɛbɔ belili so wɔ aworɛ nu ɔ.

¹¹Na kyɛbɔ dwumvoɛ di adwii kolikoli nzɔanoɛ so ne, sɔ ala yeɛ di adwii, ná kolikoli Yisrael mma mmienzua nemɔ dumaa gua nyɔboɛ nyɔ ne aso ɔ. Fa sikaa kɔkorɛ fofa ye nwo bra yia.

¹²Fa nyɔboɛ nyɔ ne teta ɔsɔfo ataadeɛ ne bati so, ma ɔyɛ Yisrael mma mmienzua nemɔ ngayeɛ nyɔboɛ. Na Aarɔn kɔsoa bɛ dumaa ne wɔ ye bati nyɔ ne aso wɔ AWURADE nyunu kɔfa kɔyɛ ngayeɛ.

¹³Fa sikaa kɔkorɛ yɔ nikyee bɔ ɛkɔfa kɔfofa ye noa ɔ,

¹⁴ɔne sikaa kɔkorɛ paa ndweaban nyɔ, bɔ banwo ye mmɛsa kyɛ nyamaa, ná fa ndweaban bɔ banwo ye mmɛsa kyɛ nyamaa ne sosɔ ye noa ne anu.

¹⁵ “Pa ahone so ndɛenbualɛ aguasoɛ.[31] Maa beli adwii bɛyɔ. Yɔ ye kyɛbɔ ɛkɔyɔ ɔsɔfo ataadeɛ ne ala: fa sikaa kɔkorɛ, bibire, koogyan, adaabene ne gyese yeɛ nwo ɔ.

¹⁶Maa ɔyɛ ahinanan, maa ɔbɔ ye nwo. Ma ye tendenn nu ɔyɛ kɔyɛ agyirɛ ko, ná ye tɛtrɛtɛɛ nu koso ɔyɛ kɔyɛ agyirɛ ko.

¹⁷Fa nyɔboɛ nyemenenyemene ahoroɔ nna sesã folii wɔ nu. Ma folii bɔ oli moa ne yɛ nyɔboɛ bɔ bɛfrɛ ye sadonike, topase ne kabunkre;

¹⁸ná folii bɔ ɔtɔ so nyɔ ne yɛ nyɔboɛ bɔ bɛfrɛ ye takuose, safire ne dɛngyɛmmoɛ;

¹⁹ná folii bɔ ɔtɔ so nza ne yɛ nyɔboɛ bɔ bɛfrɛ ye yasinte, agate ne amɛtise;

²⁰ná folii bɔ ɔtɔ so nna ne yɛ nyɔboɛ bɔ bɛfrɛ ye bɛrile, onike ne yasepa. Fa sikaa kɔkorɛ pɛ ye nwo hangra.

²¹Ɔsɛ kyɛ nyɔboɛ nemɔ yɛ buru ne nyɔ. Yisrael mma mmienzua nemɔ, ko biala dumaa kogua ko aso. Maa beli adwii bekolikoli ko biala so kyɛbɔ nzɔanoɛ so kolikolilɛ te ɔ. Abusua buru ne nyɔ ne, ko biala dumaa kogua ko aso.

²²Fa sikaa kɔkorɛ paa yɔ ndweaban, bɔ banwo ye mmɛsa kyɛ nyamaa wɔ ahone so aguasoɛ ne anu.

²³Yɔ sikaa kɔkorɛ kaa nyɔ wɔ ahone so aguasoɛ ne anu; ná fa kaa nyɔ ne sosɔ ahone so aguasoɛ noa nyɔ ne anu.

²⁴Kaa nyɔ bɔ bɛwɔ ahone so aguasoɛ ne noa ne, fa sikaa kɔkorɛ mmɛsa nyɔ ne sosɔ ye noa ne anu.

²⁵Na ndweaban nyɔ bɔ banwo ye mmɛsa ne, fa ye noa nyɔ bɔ waha ne sosɔ ye noa hangra ne anu. Ná fa wurawura ɔsɔfo ataadeɛ ne ye bati so nyamaa ne anu wɔ ye nyunu.

²⁶Yɔ sikaa kɔkorɛ kaa nyɔ, ná fa sosɔ ahone so aguasoɛ ne ye noa nyɔ ne anu, wɔ ye kunu mbaleɛ ne aso, wɔ ɔsɔfo ataadeɛ ne ngyɛnu.

²⁷Bɔ sikaa kɔkorɛ kaa nyɔ, ná fa wurawura ɔsɔfo ataadeɛ ne nyunu, wɔ ye bati so nyamaa nyɔ ne anu, wɔ ye aseɛnwo; bɔ opingye ye mbaleɛ so, wɔ ɔsɔfo ataadeɛ abɔsoɛ bɔ bali adwii bagua nu ne anwuro.

²⁸Ahone so aguasoɛ ne anu kaa nemɔ, fa nyamaa bibire kyekye bɛ sosɔ ɔsɔfo ataadeɛ nu kaa nemɔ; amaa ɔnate so wasosɔ ɔsɔfo ataadeɛ abɔsoɛ bɔ bali adwii bagua nu ne anu, ná ahone so aguasoɛ ne amburo amvi ɔsɔfo ataadeɛ ne aso.

²⁹“Yiti mmerɛ biala bɔ Aarɔn kɔhɔ nekaa krongron ne anu nen, Yisrael mma mmienzua nemɔ bɛ dumaa bɔ ɔwɔ ndɛenbualɛ aguasoɛ ne anu ne, ɔkɔsoa ye wɔ ye ahone so, maa ɔkɔyɛ AWURADE nyunu ngayeɛ daa.

³⁰Yurim ne Tumim[32] ne, fa wurawura ahone so ndɛenbualɛ aguasoɛ ne anu, amaa bagua Aarɔn ahone so mmerɛ biala bɔ ɔkɔhɔ AWURADE nyunu ɔ. Yiti nikyee bɔ Yisraelfoɛ fa bisa Nyameɛ apɛdeɛ ne, Aarɔn kɔsoa ye wɔ ye ahone so wɔ AWURADE nyunu daa.

³¹ “Ɔsɔfo ataadeɛ aguasoɛ tendenn ne, yɔ ye mukoraati bibire.

³²Pakye atee bɔ bɛkɔfa bɛ ti bekowura nu ɔ to ye afia. Nwo ɛtena fa samo ye kɔme anu maa ɔyɛ kyɛ ataadeɛ kɔme, ná wande wamva nu.

³³Ye noa bɔ babu ne amukoraa, fa bibire, koogyan ne adaabene nwo akengaa gua nu; ná fa sikaa kɔkorɛ adɔma mɔ sinzesinze b’afia mukoraati.

³⁴Sikaa kɔkorɛ adɔma li berɛ a, né akengaa wora oli berɛ; maa ɔpɛ ɔsɔfo ataadeɛ aguasoɛ tendenn ne noa bɔ babu ne amukoraa ɔbra yia.

³⁵Na sɛ Aarɔn ɔ́yɔ ye ɔsɔfo adwuma ne a, ɔsɛ kyɛ ɔfa wura, amaa sɛ ɔ́kɔ nekaa krongron ne anu wɔ AWURADE nyunu a, ɔne kyɛ ofi berɛ ófite a, bate adɔma ne wosolɛ, ná wanwu.[33]

³⁶ “Boro sikaa kɔkorɛ paa yɛ ye taataa, ná di adwii kolikoli so, kyɛbɔ nzɔanoɛ so kolikolilɛ te ɔ, kyɛ, ‘Ɔte krongron ma AWURADE.’

³⁷Fa nyamaa bibire kyekye ye fa sɔ abotire ne, ná maa ɔbra abotire ne nyunu.

³⁸Ɔkɔbɔ Aarɔn nwoma so. Na mvomsoɛ biala bɔ Yisraelfoɛ kɔyɔ wɔ b’akyɛdeɛ krongron bɔ bɛfa bɛbɔ afɔleɛ krongron nwo ne, Aarɔn kɔfa kɔsoa. Mmerɛ biala, ɔkɔbɔ Aarɔn nwoma so, amaa ɔnate so akyɛdeɛ krongron nemɔ asɔ AWURADE nye.

³⁹ “Nwo nwera paa ataadeɛ tendenn kyerekyerɛɛ ne, ná fa nwera paa yɛ abotire ne. Maa bɛnwo abɔsoɛ bɔ bali adwii bagua nu ɔ.

⁴⁰“Pomba ataadeɛ aguasoɛ, abɔsoɛ, ɔne kyerɛ mɔ ma Aarɔn mma mmienzua nemɔ ma benya animnyam ne dibea.

⁴¹Ɛkɔfa kowura eliɛma Aarɔn, ɔne ye mma mmienzua mɔ bɔ bɛboka ye so ne. Afei ɛkɔfa ɛpopalɛ ngoo kogua bɛ ti so, ɛkɔyɛ bɛ sɔfo, ná ate bɛ nwo maa bayɛ krongron, ná bali sɔfo baso me.

⁴²Fa nwera pa pieto ma bɛ maa ɔkata bɛ bienzua so. Ma ye tendenn fi bɛ sisia oodwu bɛ sɔ so.

⁴³Na mmerɛ biala, sɛ Aarɔn ne ye mma mmienzua mɔ bɛ́kɔ ɛtena sua atenaleɛ nu berɛ, anaakyɛ sɛ bépingye afɔleɛ bokyea ne nwo bɛkɔso wɔ nekaa krongron ne anu a, ɔsɛ kyɛ bɛfa bewura; ná bamvrɛfrɛ musue bamma bɛ nwo, ná banwu. Na ɛhe kɔyɛ ahyɛdeɛ afebɔɔ kɔma Aarɔn ne ye bosofoɛ bɔ bɛkɔwa ɔ.