Read Sehwi Ɛksadɔso 3 Bible Online

Ɛksadɔso 3 - Sehwi bible

Ɛksadɔso 3

¹Né Mose yeɛ ɔnea ye sia Yɛtro, bɔ ɔte Midian sɔfo ne mmoaen so ɔ. Ɛlɛho bie, ɔhane mmoaen ne hɔle dedeede wɔ ɛserɛ ne noa dɔ paa, na oodwuli Nyameɛ bokaa Horebo nye abo.

² Na AWURADE abɔfo yele ye nwo ali hyirele ye wɔ ngyɛkyerɛ bie bɔ né ogye wuronyiwuronyi nu. Mose neane, edwirɛ nwanwa, onwuni kyɛ ngyɛkyerɛ ne ogye de, nakoso né ɔnyera.

³Na Mose hane kyɛ, “Edwirɛ nwanwa he de, mémakye mékɔ dɔ mekɔnea nikyee ti bɔ ɔmma ngyɛkyerɛ ne nyera ne.”

⁴Na AWURADE nwuni kyɛ wamakye wafa dɔ ɔkwaanea nen, ɔfrɛle ye fili ngyɛkyerɛ ne anu kyɛ, “Mose! Mose! Na osurole kyɛ, “Me ɛhe.”

⁵ Na AWURADE hane kyɛ, “Nnɛpingye wa! Puropuro wɔ gya nu mbaboa ne, ofikyɛ nekaa bɔ egyi ne te aseɛ krongron.”

⁶ Na ɔfa sɔle so kyɛ, “Me ole wɔ baba Nyameɛ ne, Abraham Nyameɛ ne, Yisake Nyameɛ ne Yakob Nyameɛ ne. Na Mose fale ye nyunu feale, ofikyɛ né osuro kyɛ ɔkɔnea Nyameɛ ɔ.

⁷Na AWURADE hane kyɛ, “Me mmenia bɔ bɛwɔ Misraim ne, manwu b’amaneɛnwunɛ ne, na mate awuye bɔ b’adwuma so mbanyi mɔ maa bɛbɔ ne. Manwu b’amaneɛnwunɛ ne.

⁸Na madwu mawa ase kyɛ mebaale bɛ mefi Misraimfoɛ sa nu, ná meye bɛ mefi sɔ aseɛ ne aso mekɔ aseɛ paa bɔ ɔtrɛ ɔ so, aseɛ bɔ nyɔfonesue ne woɛ tengyɛ wɔ so ne[5]: Kanaanfoɛ, Hitifoɛ, Amorifoɛ, Perisifoɛ, Hiwifoɛ ne Yebusifoɛ maen ne.

⁹Afei de, awuye bɔ Yisraelfoɛ bɛbɔ ne wadwu me nyunu, na manwu ɛhyɛlɛ bɔ Misraimfoɛ bɛhyɛ bɛ ne.

¹⁰Yiti bra. Mésoma wɔ maa ɛkɔ Faro berɛ ɛkɔye me mmenia Yisraelfoɛ efi Misraim!”

¹¹Nakoso Mose bisale Nyameɛ kyɛ, “Me ole nwa bɔ mékɔ Faro berɛ mekɔye Yisraelfoɛ mefi Misraim ɔ?”

¹²Na Nyameɛ sele ye kyɛ, “Ngoli wɔ si. Na bɔ okohyire kyɛ me yeɛ mésoma wɔ ɛhe: sɛ ɛye maen ne fi Misraim ba a, sɔ bokaa he aso yeɛ ɛmɔkɔsɔne Nyameɛ ɔ.”

¹³Na Mose bisale Nyameɛ kyɛ, “Sɛ mekɔ Yisraelfoɛ berɛ, ná mekã mekyire bɛ kyɛ, ‘Ɛmɔ nana mɔ Nyameɛ yeɛ wasoma me ɔ,’ ná bɛ wora bebisa me kyɛ, ‘Ye dumaa li sɛɛ’ a, nzikyɛ dwirɛ yeɛ nga ngyire bɛ ɔ?”

¹⁴Na Nyameɛ buale Mose kyɛ, “ME ALA OLE ME ALA.” Na osele kyɛ, “Bɔ ɔsɛ kyɛ ɛkã kyire Yisraelfoɛ hɔ ɛhe: ‘ME ALA asoma me ɛmɔ berɛ.’ ”

¹⁵Nyameɛ sa sele Mose kyɛ, “Kã kyire Yisraelfoɛ kyɛ, ‘AWURADE ɛmɔ nana mɔ Nyameɛ ne, Abraham Nyameɛ ne, Yisake Nyameɛ ne, Yakob Nyameɛ ne yeɛ wasoma me ɛmɔ berɛ ɔ.’ Me dumaa bɔ ɔwɔ berɛ afebɔɔ hɔ ɛne, na ɛhe yeɛ aworɛ ndoatoasoɛ mukoraa bɛkɔfa bɛkɔfrɛ me ɔ.

¹⁶Kɔ! Kɔboaboa Yisrael mbanyi mɔ noa, ná kã kyire bɛ kyɛ, ‘AWURADE ɛmɔ nana mɔ Nyameɛ ne, Abraham Nyameɛ ne, Yisake Nyameɛ ne, Yakob Nyameɛ ne, waye ye nwo ali wahyire me. Ɔnwa: ‘Maanea ɛmɔ, na manwu nikyee bɔ bɛfa bɛyɔ ɛmɔ wɔ Misraim ne.

¹⁷Na mayɛ m’adwene kyɛ ngɔye ɛmɔ ngofi Misraim amaneɛnwunɛ nu, ná mafa ɛmɔ mahɔ Kanaanfoɛ, Hitifoɛ, Amorifoɛ, Perisifoɛ, Hiwifoɛ ne Yebusifoɛ aseɛ ne aso, aseɛ bɔ nyɔfonesue ne woɛ[6] tengyɛ wɔ so ne.

¹⁸“Bekotie wɔ dwirɛ, na ɛne Yisrael mbanyi bɛhɔ Misraim hene berɛ beese ye kyɛ, ‘AWURADE, Hebrifoɛ Nyameɛ ne, ɔne yɛ ayia. Yiti yɛsrɛ wɔ, ma yɛ ate ma yɛhɔ atee bɔ bɛfa ɛlɛsa bɛpɛ ɔ wɔ ɛserɛ so, ná yɛɛbɔ afɔleɛ yɛma AWURADE yɛ Nyameɛ ne.’

¹⁹Me de, mese kyɛ Misraim hene ngɔma ɛmɔ ate ma ɛmɔngɔhɔ, sana tumi piri bie hyɛ ye so koraka.

²⁰Yiti ngɔtengyɛ me sa ngɔfa anwanwadeɛ mukoraati bɔ ngɔyɔ ye Misraim ne ngotia Misraim, na ɛhe asi ne, ɔkɔma ɛmɔ kɔhɔ.

²¹Ngɔma Misraimfoɛ kɔlo mmenia hemɔ, amaa sɛ ɛ́mɔfi berɛ a, ɛmɔangɔ ye nzanza.

²²Yisrael brasua biala kobisa ɛdwetɛ ne sikaa kɔkorɛ mbembenanneɛ ne ndena kofi Misraim brasua bɔ ɔne ye bɛte bepingye ɔ berɛ, ɔne Misraim brasua biala bɔ ɔte ye awuro ɔ berɛ, na ɛmɔkɔfa sɔ nningyein ne bekosiesie ɛmɔ mma mmienzua ne mmrasua mɔ nwo. Na ɛhe kɔmaa ɛmɔkonya koɛ nu nzesadeɛ bekofi Misraimfoɛ berɛ.”