Read Sehwi Ɛksadɔso 30 Bible Online

Ɛksadɔso 30 - Sehwi bible

Ɛksadɔso 30

¹ “Si afɔleɛ bokyea bɔ bɛkɔyera ɛyɛɛ so ɔ; bɔsema yeɛ fa si ɔ.

²Ma ye tendenn nu yɛ agyirɛ ko, ná ye tɛtrɛtɛɛ nu yɛ agyirɛ ko. Maa ɔyɛ ahinanan, ma ye aseɛnwo bɔ ɔkwaadwu ye anwuro ne ɔyɛ agyirɛ nyɔ. Ma ye mmɛen[35] nemɔ béfi sɔ bakaa kundunzii komapɛ ne ala nu.

³Fa sikaa kɔkorɛ paa boro ye nwo, fa boro ye ti afia ne ye ngyɛnu amukoraati, ɔne ye mmɛen nemɔ anwo; ná fa sikaa kɔkorɛ pɛ ye nwo hangra bra yia.

⁴Fa sikaa kɔkorɛ bɔ kɔtɔkaa nyɔ ma ye. Maa bɛbra ye hangra ne abo, wɔ ye ngyɛnu ne ye ngyɛnu, na bɛkɔsosɔ mbuna bɔ bɛfa bɛsoa afɔleɛ bokyea ne anu.

⁵Fa bɔsema se mbuna nemɔ, ná fa sikaa kɔkorɛ boro bɛ nwo.

⁶Mbɛmuɛ tena bɔ onwi Adanzeɛ alaka ne nyunu ne, fa afɔleɛ bokyea ne sie ye nyunu, wɔ mbata bia bɔ ɔwɔ Adanzeɛ ne aso ne ye nyunu, nekaa bɔ me ne wɔ yɛkoyia ne.

⁷Aarɔn kɔyera ayirefona wɔ so; ngyerɛmɔ biala sɛ ɔ́sosɔ nganea nemɔ a, ɔsɛ kyɛ ɔyera ayirefona ne.

⁸Sɛ Aarɔn ɔ́sosɔ nganea nemɔ nɔsoa a, ɔsɛ kyɛ ɔyera ɛyɛɛ ne. Ɔkɔyɛ ayirefona wɔ AWURADE nyunu mmerɛ biala, wɔ ɛmɔ aworɛ ndoatoasoɛ mukoraati nu.

⁹Nnɛma ɛmɔyera ɛyɛɛ mbaen biala wɔ afɔleɛ bokyea ne aso, yeɛ nnɛma ɛmɔbɔ naen yeralɛ afɔleɛ, anaa aleɛ afɔleɛ wɔ so; yeɛ nnɛma ɛmɔbɔ anonneɛ afɔleɛ biala wɔ so.

¹⁰Afoɛ biala, ɔsɛ kyɛ Aarɔn bɔ bɔne nwo afɔleɛ wɔ ye mmɛen nemɔ aso. Ɔkɔfa bɔne nwo mbata afɔleɛ mogya kɔpata komapɛ afoɛ biala, wɔ ɛmɔ aworɛ ndoatoasoɛ mukoraati nu. Ɔte krongron paa ma AWURADE.”

¹¹ Na AWURADE sele Mose kyɛ,

¹²“Sɛ ɛka Yisraelfoɛ kyɛbɔ ɔkɔyɛ bɔ ekonwu bɛ noa a, ɔsɛ kyɛ ebiala tua ye ti nyɔboɛ sikaa ma AWURADE, wɔ mmerɛ bɔ egu so ɛka bɛ ne, ná musue biala ando bɛ wɔ bɛ halɛ ne anu.

¹³Ebiala bɔ bɛkɔha ye wɔ mmeniahalɛ ne anu ne, sɔaa yeɛ okotua ɔ: sekel[36] bue, kyɛbɔ nekaa krongron berɛ sekel te ɔ, (sekel ko te gyera aburanyɔ.) Sɔ sekel bue ne te afɔleɛbɔlɛ nikyee ma AWURADE.

¹⁴Ebiala bɔ wali afoɛ aburanyɔ bɔ ɔkɔ ne, bɔ bɛkɔha ye wɔ mmeniahalɛ ne anu ne, ɔkɔfa ye afɔleɛbɔlɛ nikyee kɔbrɛ AWURADE.

¹⁵Sɛ ɛmɔfa afɔleɛbɔlɛ nikyee ne bɛbrɛ AWURADE, kyɛ ɛmɔfa bɛyɛ ɛmɔ ti mbata a, nnɛma sikafoɛ tua maa ɔbo sekel bue, yeɛ nnɛma ehiafoɛ tua bɔ ondwu sekel bue ɔ.

¹⁶Dide mbata sikaa ne fi Yisraelfoɛ berɛ, ná fa yɔ ɛtena sua atenaleɛ nu berɛ ɛsɔnenɛ nwo adwuma. Na ɔkɔyɛ Yisraelfoɛ nwo ngayeɛ wɔ AWURADE nyunu, ɔnate ɛmɔ ti nyɔboɛ tualɛ ne ati.”

¹⁷Na AWURADE sele Mose kyɛ,

¹⁸ “Fa kɔɔbere yɔ ayaa bɔ bekonwunzi bɛ nwo wɔ nu ɔ, ná fa kɔɔbere yɔ ye nyinasoɛ ne. Fa sie ɛtena sua atenaleɛ nu berɛ ɔne afɔleɛ bokyea ne b’afia, ná fa nzue gua nu.

¹⁹Na nzue he yeɛ Aarɔn ne ye mma mmienzua mɔ bɛkɔfa bekonwunzi bɛ sa ne bɛ gya nwo ɔ.

²⁰Mmerɛ biala, sɛ bɛ́kɔ ɛtena sua atenaleɛ nu berɛ a, ɔsɛ kyɛ bɛfa nzue benwunzi bɛ nwo, ná banwu. Yeɛ sɛ bepingye afɔleɛ bokyea ne nwo kyɛ bɛkwaasɔne, anaakyɛ bɛkwaayera afɔleɛ bɛma AWURADE a, ɔsɛ kyɛ bɛyɔ sɔ ala.

²¹Ɔsɛ kyɛ benwunzi bɛ sa ne bɛ gya nwo, ná banwu. Na sɔ ahyɛdeɛ ne kɔla berɛ daa kɔma bɛ: Aarɔn ne ye bosofoɛ wɔ b’aworɛ ndoatoasoɛ amukoraati nu.

²² Na AWURADE sele Mose kyɛ,

²³“Fa ayirefona paa: korobo nzue bɔ nu nonɛ te kilo nzia, ayirefona kilo nza, ɔne ɛmanyire kilo nza,

²⁴ɔne ɛmeɛ kilo nzia, kyɛbɔ nekaa krongron berɛ kilo nonɛ te ɔ, ɔne olive ngoo galɔn ko.

²⁵Ná fa yɔ ɛpopalɛ ngoo krongron, sakyeɛfona kyɛbɔ sona bɔ ole ye nwo nimdeɛ afrafra nningyein ayɔ ɔ. Na ɔkɔyɛ ɛpopalɛ ngoo krongron.

²⁶Ná fa popa ɛtena sua atenaleɛ nu berɛ ne Adanzeɛ alaka ne,

²⁷ɛpoen ne ne ye nwo nningyein amukoraati, kanea bakaa ne ne ye nwo nningyein, ɛyɛɛ afɔleɛ bokyea ne,

²⁸naen yeralɛ afɔleɛ bokyea ne ne ye nwo nningyein amukoraa, yeɛ ayaa ne ne ye nyinasoɛ ne.

²⁹Te bɛ nwo ma bɛyɛ krongron paa; na nikyee biala bɔ ye nwo kɔha bɛ ne, ɔkɔyɛ krongron.

³⁰Fa ɛpopalɛ ngoo ne gua Aarɔn ne ye mma mmienzua nemɔ ti so, ná te bɛ nwo ma beli sɔfo bɛso me.

³¹Na se Yisraelfoɛ kyɛ, ‘Ɛhe kɔyɛ ɛpopalɛ ngoo krongron kɔma me wɔ ɛmɔ aworɛ ndoatoasoɛ amukoraati nu.

³²Nnɛmaa behwie begua sona foforɛ mbaen biala nwo, yeɛ nnɛma ɛmɔfrafra nningyein bɛyɔ bie bɔ ɔte kyɛ ɛhe ɔ. Ɔte krongron, yiti ɔsɛ kyɛ ɔyɛ krongron ma ɛmɔ.

³³Ebiala bɔ ɔkɔfrafra nningyein kɔyɔ bie, anaakyɛ ɔkɔfa kogua sona bɔ ɔtte sɔfo nwo nen, bɛkɔpɛ ye asue bekofi ye maen nu.’ ”

³⁴Na AWURADE sele Mose kyɛ, “Fa ayirefona hemɔ: hwendea, korobo, prɛkɛsɛɛ ne ɛyɛɛ fonafona. Susu ye mukoraati pɛpɛɛpɛ;

³⁵ná yɔ sakyeɛfona, kyɛbɔ sona bɔ ole ye nwo nimdeɛ afrafra nningyein ayɔ ɔ. Fa ngyee gua nu, ma ye nye yɛ gyengɔɔ, ná maa ɔyɛ krongron.

³⁶Tĩ bie ma ɔyɛ muhumuhu, ná fa bie sie Adanzeɛ ne nyunu wɔ ɛtena sua atenaleɛ nu berɛ, nekaa bɔ me ne wɔ yɛkoyia ne. Na ɔkɔyɛ krongron paa kɔma ɛmɔ.

³⁷Na ayirefona bɔ ɛbaafrafra nningyein yɔ ne, nnɛma ɛmɔyɔ bie bɛfa. Bu ye kyɛ ɔte krongron ma AWURADE.

³⁸Na ebiala bɔ ɔkɔfrafra nningyein kɔyɔ bie kɔfofã kotie nen, bɛkɔpɛ ye asue bekofi ye maen nu.”