Read Sehwi Ɛksadɔso 31 Bible Online

Ɛksadɔso 31 - Sehwi bible

Ɛksadɔso 31

¹ Na AWURADE sele Mose kyɛ,

²“Tie, maneanea nu maye Besalel bɔ ɔse ole Yuri, bɔ ye koso ɔse ole Hure, bɔ ofi Yuda abusua kure nu ne,

³na mafa Nyameɛ Sunzum mawura ye nu maa wanya ndeaseɛ, nworɛ ne nimdeɛ wɔ adwiililɛ mukoraati nu;

⁴kyɛ oli adwii ahoroɔ, ná ɔfa sikaa kɔkorɛ, ɛdwetɛ ne kɔɔbere ɔyɔ adwuma;

⁵kyɛ ose nyɔboɛ bɔ bɛfa bɛhyehyɛ nikyee ɔ, ná ose mmakaa ɔfa li adwii wɔ nikyee biala nu.

⁶Afei tie, Ahisamake awa bienzua Oholiabo bɔ ofi Dan abusua kure nu ne, maye ye kyɛ ɔboka ye so. Na mama adwiililɛfoɛ amukoraati nworɛ bɔ bɛkɔfa bɛkɔyɔ bɔ mahyɛ wɔ ne amukoraa:

⁷ɛtena sua atenaleɛ nu berɛ, Adanzeɛ alaka ne ne mbata bia bɔ ogyi so ne, ɔne ɛtena sua ne anu nningyein amukoraa;

⁸ɛpoen ne ne ye nwo nningyein, kanea bakaa bɔ ye nwo te ne, ɔne ye nwo nningyein amukoraa, afɔleɛ bokyea bɔ bɛyera ɛyɛɛ so ne,

⁹naen yeralɛ afɔleɛ bokyea ne, ɔne ye nwo nningyein amukoraa, ayaa ne ne ye nyinasoɛ ne,

¹⁰ndaadeɛ bɔ banwo ye nyemenenyemene nemɔ, ɔsɔfo Aarɔn ndaadeɛ krongron ne, ɔne ye mma nemɔ ndaadeɛ bɔ bɛkɔfa bekoli sɔfo ɔ,

¹¹ɛpopalɛ ngoo ne, ɔne nekaa krongron berɛ ayirefona ne. Ɔsɛ kyɛ bɛyɔ ye mukoraati pɛpɛɛpɛ kyɛbɔ mahyɛ wɔ ne.”

¹² Na AWURADE sele Mose kyɛ,

¹³“Ka kyire Yisraelfoɛ kyɛ, “Ɛ́mɔli m’afofingyẽa ne aso, ofikyɛ ɛhe yeɛ ɔte me ne ɛmɔ y’afia sɛngyerɛnneɛ, wɔ ɛmɔ aworɛ ndoatoasoɛ amukoraati nu ɔ, amaa ɔnate so ɛmɔanwu ye kyɛ me, AWURADE, me yeɛ mete ɛmɔ nwo ɔ.

¹⁴Ɛ́mɔli afofikyẽa ne aso, ofikyɛ ɔte krongron ma ɛmɔ. Sona biala bɔ okogua afofikyẽa ne nwo fiɛ nen, ɔsɛ kyɛ beku ye; sona biala bɔ ɔkɔyɔ adwuma sɔ kyẽa nen, ɔsɛ kyɛ bɛpɛ ye asue befi ye maen nu.

¹⁵Elesia yeɛ ɔsɛ kyɛ ɛmɔfa bɛyɔ adwuma ɔ, nakoso kyẽa bɔ ɔtɔ so nzoo ne de, ɔte nwomelelɛ kyẽa bɔkɔɔ, bɔ ɔte krongron ma AWURADE ɔ. Na sona biala bɔ ɔkɔyɔ adwuma afofikyẽa nen, ɔsɛ kyɛ beku ye.

¹⁶Yiti ɔsɛ kyɛ Yisraelfoɛ di afofikyẽa ne aso, beli so wɔ b’aworɛ ndoatoasoɛ amukoraa nu, kyɛ ɔte apam afebɔɔ.

¹⁷Ɔte sɛngyerɛnneɛ afebɔɔ wɔ me ne Yisraelfoɛ y’afia, kyɛ elesia yeɛ AWURADE fa bɔle anwuro ne aseɛ ɔ, nakoso kyẽa bɔ ɔtɔ so nzoo ne de, wanyɔ adwuma, na olele ye nwome.”

¹⁸Na mmerɛ bɔ Nyameɛ ne Mose bedwudwole beyiele wɔ Sinai bokaa ne aso nen, ɔfale Adanzeɛ nyɔboɛ taataa nyɔ ne mane Mose, nyɔboɛ taataa bɔ Nyameɛ afa ye sa mmɛseka wahyerɛ so ne.