Read Sehwi Ɛksadɔso 32 Bible Online

Ɛksadɔso 32 - Sehwi bible

Ɛksadɔso 32

¹ Mmerɛ bɔ mmenia ne nwuni kyɛ Mose ahyɛ soma wɔ bokaa ne aso, ná ondwu mma nen, mmenia ne boaboale bɛ noa bɛhɔle Aarɔn berɛ, na besele ye kyɛ, “Dwɔso ná yɔ bosoen mɔ bɔ bekoli yɛ nyunu ma yɛ. Ofikyɛ sɔ Mose ne, akoaa he bɔ ɔɔyele yɛ fili Misraim aseɛ so wale ne de, yɛnze bɔ wato ye ɔ.”

²Na Aarɔn buale bɛ kyɛ, “Ɛ́mɔyeye sikaa kɔkorɛ asomade bɔ owurawura ɛmɔ aye mɔ, ɛmɔ mma mmienzua ne mmrasua mɔ, ná ɛ́mɔfa bɛ́brɛ me.”

³Yiti mmenia ne amukoraa yeyele sikaa kɔkorɛ asomade bɔ owurawura bɛ so anu ne, na bɛfa bɛbrɛle Aarɔn.

⁴Olele sikaa kɔkorɛ bɔ bɛfa bɛbrɛle ye ne, ohurole ye, na ɔfa yɔle nandwie ba amoen. Na bɛhane kyɛ, “O Yisrael, wɔ nyameɛ mɔ bɔ bɛyele wɔ befili Misraim aseɛ so bɛwale ne ɛhe!”

⁵Na mmerɛ bɔ Aarɔn nwuni ye sɔ nen, osili afɔleɛ bokyea wɔ amoen ne nyunu, na obukyele ye noa hane kyɛ, “Ɛhema yɛkoli AWURADE aluolue ne.”

⁶ Bedwɔsole alebahyene bɛbɔle naen yeralɛ afɔleɛ ne asomdwee afɔleɛ. Mmenia ne tenane ase bedidili bɛnone, na bedwɔsole begole.

⁷Na AWURADE sele Mose kyɛ, “Dwu kɔ aseɛnwo dɔ, ofikyɛ wɔ mmenia bɔ ɛɛyele bɛ fili Misraim aseɛ so wale ne, babɔ musue.

⁸Atee bɔ ngyirele bɛ ne, bakwati ye ndɛndɛ so. Bahuro nikyee bafa bayɔ nandwie ba, bakoto ye, yeɛ babɔ afɔleɛ bama ye, na baha kyɛ, O Yisrael, wɔ nyameɛ mɔ bɔ bɛyele wɔ befili Misraim aseɛ so bɛwale ne ɛhe!”

⁹ Na AWURADE sele Mose kyɛ, “Manwu sɔ mmenia hemɔ, na bɛte asoserɛfoɛ mmenia.

¹⁰Yiti yakyi me maa mvɛ bɛ so yaa piri, ná ngyikyi bɛ boso bɔkɔɔ; nakoso wɔ de, ngɔmaa ɛkɔyɛ maen pirikua.”

¹¹Nakoso Mose pale AWURADE ye Nyameɛ kyerɛ kyɛ, “O AWURADE, wɔ mmenia bɔ ɛnate tumi piri ne anwoserɛ so ɛyele bɛ fili Misraim aseɛ so wale ne, nzu ati yeɛ afɛ bɛ so yaa piri sɔa ɔ?

¹²Nzu ati yeɛ ɔsɛ kyɛ Misraimfoɛ ka kyɛ, ‘Adwene tɛɛ bie ti yeɛ ɔmaa ɔɔyele bɛ hɔle ɔ, kyɛ ɔkwaahuhu bɛ wɔ mmokaa ne anu dɔ, ná okyikyi bɛ boso fi aseɛ ye aso’ ɔ? Ma w’ahone tɔ nzue nu, ná yakyi musue bɔ ɛbaamaa ɔto wɔ mmenia nemɔ ne.

¹³Kaye wɔ ngoaa Abraham, Yisake ne Yisrael bɔ ɛtale wɔ bɔbɔ wɔ nwo ndaen sele bɛ kyɛ, ‘Ngɔma ɛmɔ boso ama kɔsone pee kyɛ ewienu nzramaa; na aseɛ he amukoraati bɔ mabɔ ye nwo anohoba ne, ngɔfa ngɔma ɛmɔ boso ama, na ɔkɔyɛ bɛ deɛ afebɔɔ.’ ”

¹⁴Yiti AWURADE sesane ye adwene wɔ musue bɔ ɔyɛle kyɛ ɔkɔmaa ɔkɔto ye mmenia ne anwo.

¹⁵Yiti Mose kakyili ye nwo, na ɔfale Adanzeɛ nyɔboɛ taataa nyɔ ne tirale ye sa nu torotorole bokaa ne dwuli ase: nyɔboɛ taataa bɔ bahyerɛ ye bue nyɔ ne aso ne, bɔ bahyerɛ ye nyunu ne ye si ne.

¹⁶Nyameɛ bɔbɔ yeɛ osele nyɔboɛ nemɔ ɔ, yeɛ nyɔboɛ nemɔ so kolikolilɛ bɔ bali adwii bakolikoli bagua so ne, ɔte Nyameɛ ahyerɛlɛ.

¹⁷Na mmerɛ bɔ Yosua tele kyɛ mmenia nemɔ bɛ́bɔ ese nen, osele Mose kyɛ, “Koɛ nwo dede bie asi asikyeleɛ berɛ.”

¹⁸Nakoso Mose buale kyɛ, “Nna ngonimlilɛ nwo esebɔlɛ ɔ, yeɛ nna ngoguo nwo dede koso ɔ, na mmom edweintolɛ gyegyegyegye yeɛ mete ɔ.”

¹⁹Mmerɛ bɔ Mose pingyele asikyeleɛ ne, ná onwuni nandwie ba ne ne abiliegolɛ pɛ, ye ahone huli paa, na ogyili nyɔboɛ taataa (nyɔ) bɔ otira ye ne guale bokaa ne nye abo berɛ maa nu bubuli.

²⁰Ɔfale nandwie amoen bɔ bayɔ ne, ɔfale see yerale ye, otini ye muhumuhu, ɔto guale nzue nye so, na ɔmane Yisraelfoɛ none.

²¹Na Mose sele Aarɔn kyɛ “Nzikyɛ yɔleɛ paa yeɛ mmenia hemɔ fa yɔle wɔ ɔ, bɔ yiti amaa bayɔ bɔne pirikua sɔa ye?”

²²Na Aarɔn buale kyɛ, “Me mene, nnɛfɛ yaa; wɔ bɔbɔ ɛse kyɛ bɔne ali mmenia hemɔ ti.

²³ Besele me kyɛ, ‘Yɔ nyameɛ mɔ bɔ bekoli yɛ nyunu ma yɛ, ofikyɛ sɔ Mose ne, akoaa he bɔ ɔɔyele yɛ fili Misraim aseɛ so wale ne de, yɛnze bɔ wato ye ɔ.’

²⁴Na me koso nzele bɛ kyɛ, ‘Ebiala bɔ ole sikaa kɔkorɛ biala ne, ɔye bra!’ Yiti bɛyeyele bɛmane me, na ngyi nguale see nu, yeɛ nandwie ba he fili nu wale ɔ.”

²⁵Mose nwuni kyɛ bɛbɔ mmenia nemɔ kyɛnn so a ɔmmɔ (ofikyɛ Aarɔn amaa bɛbɔ bɛ kyɛnn so a ɔmmɔ, na bɛ nwo ayɛ nya wɔ bɛ pɔfoɛ mɔ nyunu).

²⁶Yiti ogyinane asikyeleɛ pambim ne anu, na ɔhane kyɛ, “Ebiala bɔ ɔwɔ AWURADE bue nu ne, ɔ́bra me faen!” Na Lewifoɛ ne amukoraa bɛboale bɛ noa bɛhɔle ye berɛ.

²⁷Na osele bɛ kyɛ, “AWURADE Yisrael Nyameɛ nwa nyoo, ‘Ɔsɛ kyɛ ebiala fa ye ngrandɛ wura ye nwo, ná okyinikyini asikyeleɛ ne anu, fi ye ti kodwu ye ti, ná okũkũ oliɛma mɔ ne ye mmango mɔ, ɔne mmenia bɔ b’awuro ne ye deɛ pingye ɔ.’ ”

²⁸Na Lewifoɛ nemɔ yɔle kyɛbɔ Mose hane ne, na mmenia ne anu bie kɔyɛ apee nza totɔle sɔ kyẽa ne.

²⁹Na Mose hane kyɛ, “Ɛnɛ, ɛmɔate ɛmɔ nwo bama AWURADE adwuma. Ebiala afa ɔwa bienzua ne oliɛma bienzua yeɛ wapɛ so ɔ, na ɔnate so ɛmɔanya Nyameɛ saleɛ ɛnɛ kyẽa ye.”

³⁰Aleɛ hyene ne, Mose sele maen ne kyɛ, “Ɛmɔayɔ bɔne piri paa. Nakoso ngɔfo ngɔhɔ AWURADE berɛ kekesaala ye; ebiaa né mahora masrɛ ɛmɔ bɔne ne nwo mbata mama ɛmɔ.”

³¹Yiti Mose sá hɔle AWURADE berɛ, na ɔhane kyɛ, “Ao, maen he ayɔ bɔne piri paa! Bafa sikaa kɔkorɛ bayɔ nyameɛ mɔ bama bɛ nwo.

³² Nakoso mesrɛ wɔ, fa bɛ bɔne kyɛ bɛ. Na sɛ wamma ye sɔ de a, nzaade kyikyi me (dumaa) fi wɔ nwomaa bɔ ahyerɛ ne anu!”

³³Nakoso AWURADE sele Mose kyɛ, “Sona biala bɔ wayɔ bɔne watia me nen, ye yeɛ ngokyikyi ye (dumaa) ngofi me nwomaa ne anu ɔ.

³⁴Nakoso kɔ, ná kɔfa mmenia ne kɔ nekaa bɔ mahã ye nwo dwirɛ mahyire wɔ ne. Tie, m’abɔfo koli wɔ nyunu moa, nakoso kyẽa bie kɔwa bɔ ngɔmaa bekonya bɛ bɔne nwo akatuaa ɔ.”

³⁵Na AWURADE fale amaneɛ piri tole mmenia ne aso, ɔnate nandwie ba bɔ bɛmane Aarɔn yɔle ne ati.