Read Sehwi Ɛksadɔso 35 Bible Online

Ɛksadɔso 35 - Sehwi bible

Ɛksadɔso 35

¹Mose mane Yisrael ɛlɔen ne amukoraati yiale, na osele bɛ kyɛ, “Bɔ AWURADE ahyɛ kyɛ ɛmɔyɔ ɛhe:

² Elesia yeɛ ɔsɛ kyɛ ɛmɔfa bɛyɔ adwuma ɔ, nakoso kyẽa bɔ ɔtɔ so nzoo ne de, ɔte afofikyẽa krongron ma ɛmɔ, ɔte nwomelelɛ kyẽa bɔkɔɔ ma AWURADE. Na ebiala bɔ ɔkɔyɔ adwuma sɔ kyẽa nen, ɔsɛ kyɛ beku ye.

³Nnɛma ɛmɔkua see afofikyẽa ne wɔ nekaa biala bɔ ɛmɔte ɔ.

⁴ Na Mose sele Yisrael ɛlɔen ne amukoraati kyɛ, “Edwirɛ bɔ AWURADE ahyɛ hɔ ɛhe:

⁵ɛ́mɔkeka bɛ sa ase bɛ́fa ayɛyelɛ nningyein bɛbrɛ AWURADE. Na ebiala bɔ ye kunu sefaa ne, maa ɔfa ayɛyelɛ nningyein hemɔ brɛ AWURADE: esikaa kɔkorɛ, ɛdwetɛ, kɔɔbere;

⁶bibire, koogyan, adaabene, nwera paa, abɔngye nwiaa,

⁷mmoaen nyii nwomaa bɔ bawura ye ayire kɔkorɛ ɔ, abɔngye nwomaa, bɔsema,

⁸ngoo bɔ bɛfa begua kanea nu ɔ, nningyein bɔ bɛfa bɛyɔ ɛpopalɛ ngoo, ɔne ayirefona;

⁹nyɔboɛ bɔ bɛfrɛ ye onike, mbembenanneɛ bɔ bɛfa bɛteta ɔsɔfo ataadeɛ nu, ɔne ye ahone so aguasoɛ nu.

¹⁰“Ɛmɔ nu biala bɔ ɔse adwii di ne, ɔ́bra ɔɔyɔ bɔ AWURADE ahyɛ ne amukoraa:

¹¹nyianu sua ne ne ye nwo ndwurahoɛ ne, ye ndɔkorɔ, ye ndaboa mɔ, ye kwatena mɔ, ye bonima mɔ, ɔne ye nyinasoɛ mɔ;

¹²alaka ne ne ye mbuna mɔ, mbata bia ne, mbɛmuɛ tena bɔ onwi berɛ ne;

¹³ɛpoen ne ne ye mbuna mɔ, nu nningyein amukoraa, ɔne paanoo krongron ne;

¹⁴kanea bakaa bɔ bɛfa kanea besie so ne, ye nwo nningyein, ɔne ye nganea nemɔ, yeɛ ngoo bɔ bɛfa begua kanea ne anu ɔ;

¹⁵afɔleɛ bokyea bɔ bɛyera ɛyɛɛ so ɔ, ɔne ye mbuna mɔ, ɛpopalɛ ngoo, ayirefona, ɔne ɛtena bɔ bɛkɔfa konwi nyianu sua ne anoa nu berɛ ɔ;

¹⁶naen yeralɛ afɔleɛ bokyea ne, ɔne ye kɔɔbere ngandanganda ne, ye mbuna mɔ ne ye nwo nningyein amukoraa, ayaa ne ne ye nyinasoɛ ne;

¹⁷aluo berɛ mbɛmuɛ ɛtena ne, ye bonima mɔ ne ye nyinasoɛ mɔ, ɔne ɛtena bɔ bɛkɔfa konwi aluo berɛ pambim ne noa ɔ;

¹⁸nyianu sua pɛmbɛen nemɔ, aluo berɛ pɛmbɛen nemɔ, ɔne bɛ nyamaa mɔ;

¹⁹ndaadeɛ nyemenenyemene bɔ bewura bɛyɔ ɔsɔfo adwuma wɔ nekaa krongron ne anu ɔ, mekyire ɔsɔfo Aarɔn ndaadeɛ krongron nemɔ, ɔne ye mma nemɔ ndaadeɛ bɔ bɛkɔfa koli sɔfo ɔ.”

²⁰Afei Yisrael ɛlɔen ne amukoraati fili Mose nyunu berɛ hɔle.

²¹Na ebiala bɔ edwirɛ ne kanyane ye, ná afei ɔyele ye ahone nu kyɛ ɔkɔyɔ sɔ nen, ɔfale AWURADE ayɛyelɛ nningyein wale kyɛ bɛfa bɛyɔ ɛtena sua atenaleɛ nu, nu ɛsɔnenɛ nningyein, ɔne ndaadeɛ krongron nemɔ.

²²Yiti mmienzua ne mmrasua mukoraati, bɔ né bekuro kyɛ bɛboka ne, bɛfale sikaa kɔkorɛ mbembenanneɛ amukoraa bɛwale: asomade, mbɛteaa, nzɔanoɛ mbɛteaa ne akomuade. Na bɛ mukoraa bɛfale sikaa kɔkorɛ ahoroɔ ayɛyelɛ nningyein bɛbrɛle AWURADE.

²³Na ebiala bɔ né ole bibire, anaa koogyan, anaa adaabene, anaa nwera paa, anaa abɔngye nwiaa, anaa boaen nyii nwomaa bɔ bawura ye ayire kɔkorɛ, anaa abɔngye nwomaa nen, ɔfa wale.

²⁴Na ebiala bɔ né ole ɛdwetɛ, anaa kɔɔbere afɔleɛbɔlɛ nikyee nen, ɔfa yɛle ayɛyelɛ nningyein mane AWURADE. Na ebiala bɔ né ole bɔsema bɔ ye nwo kɔwa mvasoɛ kɔma adwuma nen, ɔfa wale.

²⁵Na brasua biala bɔ ɔse ɛtena nwo nen, ɔfale nningyein bɔ wafa bibire, koogyan, adaabene, ne gyese wanwo ɔ wale.

²⁶Na brasua biala bɔ ɔse adwii di, ná afei edwirɛ ne kanyane ye nen, ɔfale abɔngye nwiaa nwone nningyein.

²⁷Mbanyi nemɔ fale nyɔboɛ bɔ bɛfrɛ ye onike, mbembenanneɛ bɔ bɛfa bɛbobɔ ɔsɔfo ataadeɛ nu, ɔne ye ahone so aguasoɛ nu wale.

²⁸Besa bɛfale ayirefona mɔ, ngoo bɔ bɛfa begua kanea nu, ɛpopalɛ ngoo, ɔne ayirefona bɛwale.

²⁹Na Yisrael mmienzua ne mmrasua mukoraa bɔ edwirɛ ne kanyane bɛ kyɛ bɛ́fa nningyein bɛɛboka adwuma bɔ AWURADE nate Mose so wahyɛ bɛ kyɛ bɛyɔ nen, bɛfale b’akyɛdeɛ afɔleɛ nningyein bɛbrɛle AWURADE.

³⁰ Na Mose sele Yisraelfoɛ kyɛ, “Ɛ́mɔtie, AWURADE aneanea nu waye Besalel bɔ ɔse ole Yuri, bɔ ye koso ɔse ole Hure, bɔ ofi Yuda abusua kure nu ne;

³¹na wafa Nyameɛ Sunzum wawura ye nu maa wanya ndeaseɛ, nworɛ ne nimdeɛ wɔ adwiililɛ mukoraati nu;

³²kyɛ ɔfa nya adwiililɛ ahoroɔ nwo nworɛ, ná ɔfa sikaa kɔkorɛ, ɛdwetɛ ne kɔɔbere oli adwii;

³³kyɛ ose nyɔboɛ bɔ bɛfa bɛhyehyɛ nikyee ɔ, ná ose mmakaa ɔfa li adwii wɔ nikyee biala nu.

³⁴Na wama ye, ɔne Ahisamake awa bienzua Oholiabo bɔ ofi Dan abusua kure nu ne, nimdeɛ bɔ bɛkɔfa bekohyirehyire mmenia foforɛ ɔ.

³⁵Wama nworɛ ayi bɛ ti anu tɛkyɛ kyɛ bɛfa beli adwii biala. Mekyire: nyɔboɛ dwumvoɛ, bakaa dwumvoɛ, ɔne ɛtena nwonɛ bɔ bɛfa bibire, koogyan, adaabene ne gyese bedi nu adwii ɔ. Bɛte mmenia bɔ bɛkora bedi adwii ahoroɔ amukoraati.