Read Sehwi Ɛksadɔso 38 Bible Online

Ɛksadɔso 38 - Sehwi bible

Ɛksadɔso 38

¹ Ɔfale bɔsema sili naen yeralɛ afɔleɛ bokyea ne koso. Ye tendenn nu te agyirɛ nnu, yeɛ ye tɛtrɛtɛɛ nu te agyirɛ nnu. Ɔte ahinanan, na ye aseɛnwo bɔ ɔkwaadwu ye anwuro ne te agyirɛ nza.

²Ɔyɔle mmɛen fa tuatuale ye ndweaso nna ne aso. Ye mmɛen nemɔ, ɔfale sɔ bakaa kundunzii komapɛ ne ala yeɛ ɔyɔle ɔ, na ɔfale kɔɔbere borole ye anwo.

³Ɔyɔle afɔleɛ bokyea ne nwo nningyein amukoraati: ngukue mɔ, sofi mɔ, ayaa mɔ, ateɛ anoa tworɔntworɔn mɔ, ɔne ye ngukue bɔ bɛfa see begua nu ɔ. Kɔɔbere yeɛ ɔfa yɔle ye nwo nningyein ne amu ɔ.

⁴Ɔfale kɔɔbere nwone afɔleɛ bokyea ngandanganda bɔ ɔbeabea nu ne, wɔ ye simbini ne abo, fite aseɛnwo kodwu ye afia.

⁵Ɔbɔle kɔtɔkaa nna puropurole kɔɔbere ngandanganda ndweaso nna ne, kyɛ bɛ́sosɔ mbuna nemɔ nu.

⁶Ɔfale bɔsema sele mbuna nemɔ, na ɔfale kɔɔbere borole bɛ nwo.

⁷Ɔfale mbuna nemɔ wurawurale kɔtɔkaa nemɔ anu, wɔ afɔleɛ bokyea ne ye ngyɛnu ne ye ngyɛnu, bɔ bɛkɔfa kɔsoa ɔ. Ɔfale ndaboa yeɛ ɔyɔle ɔ, na ɔmane bɔen lale ye kunu.

⁸ Ɔyɔle kɔɔbere ayaa, na ye nyinasoɛ ne koso te kɔɔbere. Na mmrasua bɔ bɛso wɔ ɛtena sua atenaleɛ anoa nu berɛ ne, bɛ neanu mɔ yeɛ ɔfa yɔle ɔ.

⁹ Osili aluo ne. Ɔfale mbɛmuɛ tena bɔ bafa gyese banwo ɔ yeɛ osili ye ngwaen dɔ ɔ, na ye tendenn nu te agyirɛ ɛyaa ko.

¹⁰Ye kɔɔbere bonima nemɔ te aburanyɔ, yeɛ ye kɔɔbere nyinasoɛ nemɔ te aburanyɔ. Nakoso bonima nemɔ bɛ ndɔkorɔ, ɔne bɔ ɔbeabea nu ne de, ɔte ɛdwetɛ.

¹¹Ye sorɔ dɔ ne, mbɛmuɛ tena ne tendenn nu te agyirɛ ɛyaa ko. Ye bonima aburanyɔ ne ɔne bɛ nyinasoɛ aburanyɔ nemɔ bɛte kɔɔbere. Nakoso bonima nemɔ bɛ ndɔkorɔ, ɔne bɔ ɔbeabea nu ne de, ɔte ɛdwetɛ.

¹²Mbɛmuɛ tena bɔ ɔwɔ eyia atɔleɛ bue nu dɔ ne, ye tɛtrɛtɛɛ nu te agyirɛ aburannu, ye bonima buru, ɔne bɛ nyinasoɛ buru. Na bonima nemɔ bɛ ndɔkorɔ, ɔne bɔ ɔbeabea nu ne de, ɔte ɛdwetɛ.

¹³Ye anoa nu berɛ, wɔ eyia afiteleɛ bue nu dɔ ne, ɔte agyirɛ aburannu.

¹⁴Mbɛmuɛ tena bɔ onwi pambim ne bue ko ne, ɔte agyirɛ buru ne nnu; ye bonima nza, ɔne bɛ nyinasoɛ nza.

¹⁵Aluo berɛ pambim ne, ye bue ko bɔ waha ne wora, mbɛmuɛ tena ne tendenn nu te agyirɛ buru ne nnu. Ye bonima nza, ɔne bɛ nyinasoɛ nza.

¹⁶Mbɛmuɛ tena mukoraati bɔ bɛfa bɛpɛle aluo berɛ nwo beyiale ne, bɛfale gyese yeɛ bɛnwone ɔ.

¹⁷Bonima nemɔ nyinasoɛ te kɔɔbere, nakoso bonima nemɔ bɛ ndɔkorɔ, ɔne bɔ ɔbeabea nu ne de, ɔte ɛdwetɛ. Besa bɛfale ɛdwetɛ bɛborole bɛ ti afia, na bɛfale ɛdwetɛ bɛborole aluo berɛ bonima mukoraati nwo.

¹⁸Na ɛtena bɔ onwi aluo berɛ pambim ne noa ne, bɛfale bibire, koogyan, adaabene ne gyese belili adwii beguale nu. Ye tɛtrɛtɛɛ nu te agyirɛ aburanyɔ, yeɛ ye aseɛnwo bɔ ɔkwaadwu ye anwuro ne te agyirɛ nnu. Ye piri te kyɛ aluo berɛ mbɛmuɛ tena ne ala.

¹⁹Né ye bonima nemɔ te nna, bɛ nyinasoɛ nna ne te kɔɔbere, bɛ tɔkorɔ nemɔ te ɛdwetɛ, bɛ ti afia ɔne bɔ ɔbeabea nu ne te ɛdwetɛ.

²⁰Nyianu sua ne, ye nwo pɛmbɛen, ɔne aluo berɛ pɛmbɛen amukoraati te kɔɔbere.

²¹Nyianu sua ne nwo nningyein ne, ye nwo ngondaa ɛhe: mekyire adanzeɛ ɛtena sua bɔ ɔsɔfo Aarɔn awa Yitama neane Lewifoɛ mɔ so maa bɛhyerɛ bɛtole berɛ, kyɛbɔ Mose hyɛle ne.

²²Besalel bɔ ɔse ole Yuri, bɔ ye koso ɔse ole Hure, bɔ ofi Yuda abusua kure nu ne, ɔyɔle nikyee biala bɔ AWURADE hyɛle Mose ne.

²³Sona bɔ ɔboka ye so ole Oholiabo, bɔ ɔse ole Ahisamake, bɔ ofi Dan abusua kure nu ne. Né Oliabo te nyɔboɛ ne bakaa dwumvoɛ, bɔ ɔfa bibire, koogyan, adaabene ne gyese di adwii ɔ.

²⁴Sikaa kɔkorɛ amukoraati bɔ bɛfa bɛyɔle adwuma ne, mekyire nekaa krongron ne nwo adwuma mukoraati, ɔte afɔleɛ sikaa, na ɔte kɔyɛ kilo apee ko, kyɛbɔ nekaa krongron berɛ kilo nonɛ te ɔ.

²⁵ Mmenia bɔ bɛhale bɛ ne, b’ɛdwetɛ bɔ bɛfa bɛwale ne, ɔte kɔyɛ kilo apee nza ne ɛyaa nna, kyɛbɔ nekaa krongron berɛ kilo nonɛ te ɔ.

²⁶Sona horɛ biala tuale bika ko (bika ko te kilo ko nu ngyɛmuɛ ɛyaa nyɔ, kyɛbɔ nekaa krongron berɛ kilo nonɛ te ɔ). Bɛhale mmienzua mukoraa bɔ bali afoɛ aburanyɔ bɔ ɔkɔ ne, na né bɛte apee ɛyaa nzia ne nza ɔne ɛyaa nnu ne aburannu.

²⁷Bɛfale ɛdwetɛ kilo apee nza ne ɛyaa nna bɛyɔle nekaa krongron nyinasoɛ ne, ɔne mbɛmuɛ tena nyinasoɛ ne. Bɛfale kilo apee nza ne ɛyaa nna ne bɛyɔle nyinasoɛ ɛyaa, kilo aburasa ne nna biala yɔ nyinasoɛ ko.

²⁸Ɔfale kɔyɛ kilo aburanyɔ yɔle bonima nemɔ bɛ ndɔkorɔ. Ɔfale bie borole bɛ ti afia, yeɛ ɔfale bie beabeale nu.

²⁹Kɔɔbere bɔ bɛyɛle ndoboa benyane ye ne, ɔte kɔyɛ kilo apee nyɔ ɛyaa nna.

³⁰Ɔfa yɔle ɛtena sua atenaleɛ nu berɛ pambim nemɔ nyinasoɛ, kɔɔbere afɔleɛ bokyea ne, ɔne ye ngandanganda nemɔ, ɔne afɔleɛ bokyea ne nwo nningyein amukoraati;

³¹nningyein bɔ bɛfa belele aluo berɛ nwo beyiale nemɔ bɛ nyinasoɛ, aluo berɛ pambim ne nyinasoɛ, nyianu sua ne nwo pɛmbɛen amukoraati, ɔne pɛmbɛen mɔ bɔ bapɛ aluo berɛ nwo bayia amukoraati.