Read Sehwi Ɛksadɔso 39 Bible Online

Ɛksadɔso 39 - Sehwi bible

Ɛksadɔso 39

¹Bɛfale bibire, koogyan ne adaabene bɛnwone ndaadeɛ nyemenenyemene bɔ bewura bɛyɔ ɔsɔfo adwuma wɔ nekaa krongron ne anu ɔ. Na bɛpale Aarɔn ndaadeɛ krongron nemɔ, kyɛbɔ AWURADE hyɛle Mose nen.

² Ɔfale sikaa kɔkorɛ, bibire, koogyan, adaabene ne gyese yeɛ ɔyɔle ɔsɔfo ataadeɛ ne ɔ.

³Bɛborole sikaa kɔkorɛ taataa, na bɛpepɛle ye ndeamaa ndeamaa bɛfa belili adwii beguale bibire, koogyan, adaabene ne gyese ne anu.

⁴Bɛnwone nyamaa bɛsosɔle ɔsɔfo ataadeɛ ne ye bati ne ye bati, na bɛbɔle ye noa nyɔ ne porɛ bɛtoale so.

⁵Ye abɔsoɛ bɔ bali adwii bagua nu ne, nningyein komapɛ ne ala yeɛ bɛfa bɛyɔle ɔ: sikaa kɔkorɛ, bibire, koogyan, adaabene ne gyese, kyɛbɔ AWURADE hyɛle Mose nen.

⁶Besele nyɔboɛ bɔ bɛfrɛ ye onike nemɔ nwo, bɛfale sikaa kɔkorɛ bɛfofale bɛ nwo bɛbra beyiale, na belili adwii bekolikolili Yisrael mma mmienzua nemɔ dumaa beguale so, kyɛbɔ nzɔanoɛ so kolikolilɛ te ɔ.

⁷Ɔfa tetale ɔsɔfo ataadeɛ ne ye bati ne ye bati, kyɛ ɔ́yɛ Yisrael mma nemɔ bɛ ngayeɛ nyɔboɛ, kyɛbɔ AWURADE hyɛle Mose nen.

⁸ Olili adwii nwone ahone so aguasoɛ ne. Ɔyɔle ye kyɛ ɔsɔfo ataadeɛ ne ala: ɔfale sikaa kɔkorɛ, bibire, koogyan, adaabene ne gyese yeɛ ɔnwone ɔ.

⁹Né ɔte ahinanan, na obukale ahone so aguasoɛ ne anu nyɔ. Obukale nu nyɔ ne, ye tendenn nu yɛle kɔyɛ agyirɛ ko, yeɛ ye tɛtrɛtɛɛ nu koso yɛle kɔyɛ agyirɛ ko.

¹⁰Bɛfale nyɔboɛ nyemenenyemene ahoroɔ nna bɛsane folii wɔ nu. Folii bɔ oli moa ne te nyɔboɛ bɔ bɛfrɛ ye kabunkre, topase ne ɛmerade;

¹¹folii bɔ ɔtɔ so nyɔ ne te nyɔboɛ bɔ bɛfrɛ ye takuose, safire ne dɛngyɛmmoɛ;

¹²folii bɔ ɔtɔ so nza ne te nyɔboɛ bɔ bɛfrɛ ye yasinte, agate ne amɛtise;

¹³folii bɔ ɔtɔ so nna ne te nyɔboɛ bɔ bɛfrɛ ye bɛrile, onike ne yasepa; na bɛfale sikaa kɔkorɛ bɛpɛle ye nwo hangra.

¹⁴Né nyɔboɛ nemɔ te buru ne nyɔ. Yisrael mma mmienzua nemɔ, ko biala dumaa gua ko aso. Belili adwii bekolikolili ko biala so, kyɛbɔ nzɔanoɛ so kolikolilɛ te ɔ. Abusua buru ne nyɔ ne, ko biala dumaa gua ko aso.

¹⁵Ahone so aguasoɛ ne, bɛfale sikaa kɔkorɛ paa bɛyɔle ndweaban bɔ banwo ye mmɛsa kyɛ nyamaa wɔ nu.

¹⁶Bɛyɔle sikaa kɔkorɛ hangra nyɔ ɔne sikaa kɔkorɛ kaa nyɔ, na bɛfale kaa nyɔ ne bɛsosɔle ahone so aguasoɛ noa nyɔ ne anu.

¹⁷Kaa nyɔ bɔ bɛwɔ ahone so aguasoɛ ne noa ne, bɛfale sikaa kɔkorɛ ndweaban mmɛsa nyɔ ne bɛsosɔle ye noa ne anu.

¹⁸Na ndweaban nyɔ bɔ banwo ye mmɛsa ne, ye noa nyɔ bɔ waha ne, bɛfa bɛsosɔle ye noa hangra nyɔ ne anu. Yiti bɛfa bɛsosɔle ɔsɔfo ataadeɛ ne ye bati so nyamaa ne anu wɔ ye nyunu.

¹⁹Afei bɛyɔle sikaa kɔkorɛ kaa nyɔ, na bɛfa bɛsosɔle ahone so aguasoɛ ne noa nyɔ ne anu, wɔ ye kunu mbaleɛ ne aso, wɔ ɔsɔfo ataadeɛ ne ngyɛnu.

²⁰Bɛbɔle sikaa kɔkorɛ kaa nyɔ bieku, na bɛfa bewurawurale ɔsɔfo ataadeɛ ne nyunu, wɔ ye bati so nyamaa nyɔ ne anu, wɔ ye aseɛnwo, bɔ opingye ye mbaleɛ so, wɔ ɔsɔfo ataadeɛ abɔsoɛ bɔ bali adwii bagua nu ne anwuro.

²¹Bɛfale nyamaa bibire bɛkyekyele ahone so aguasoɛ nu kaa nemɔ bɛsosɔle ɔsɔfo ataadeɛ nu kaa nemɔ; yiti ɔsosɔle ɔsɔfo ataadeɛ abɔsoɛ bɔ bali adwii bagua nu ne anu, na ahone so aguasoɛ ne amburo amvi ɔsɔfo ataadeɛ ne aso, kyɛbɔ AWURADE hyɛle Mose nen.

²² Osa fale nyamaa bibire ngome nwone ɔsɔfo ataadeɛ aguasoɛ tendenn ne.

²³Atee bɔ bɛpakye bɛtole ɔsɔfo ataadeɛ aguasoɛ tendenn ne anu wɔ ye afia ne, ɔte kyɛ ataadeɛ kɔme, na bɛnwone ɛtena bɛsamone atee bɔ bapakye ne noa, kyɛbɔ ɔkɔyɛ ná wande wamva nu ɔ.

²⁴Ɔsɔfo ataadeɛ aguasoɛ tendenn ne noa bɔ babu ne, bɛfale bibire, koogyan, adaabene ne gyese bɛnwone akengaa beguale nu.

²⁵Bɛfale sikaa kɔkorɛ paa bɛyɔle adɔma mɔ, na bɛfale adɔma nemɔ besinzesinzele akengaa nemɔ afia, wɔ ɔsɔfo ataadeɛ aguasoɛ tendenn ne noa mukoraati.

²⁶Adɔma li berɛ a, né akengaa toa so, adɔma li berɛ a, né akengaa toa so, wɔ ɔsɔfo ataadeɛ aguasoɛ tendenn ne noa bɔ babu ne amukoraa bra yiale, kyɛbɔ AWURADE hyɛle Mose nen.

²⁷ Besa bɛfale nwera paa bɔ banwo ɔ bɛyɛle ataadeɛ aguasoɛ bɛmane Aarɔn ne ye mma mmienzua nemɔ.

²⁸Besa bɛnwone nwera paa abotire ne, nwera paa kyerɛ ne, ɔne pieto bɔ bafa gyese banwo ne;

²⁹ɔne abɔsoɛ bɔ bafa gyese, bibire, koogyan ne adaabene bali adwii banwo ɔ, kyɛbɔ AWURADE hyɛle Mose nen.

³⁰ Bɛborole sikaa kɔkorɛ paa taataa bɛfa bɛyɔle kyerɛ krongron ne, na bɛhyerɛle so kyɛbɔ nzɔanoɛ so ahyerɛlɛ te ɔ, kyɛ, “Ɔte krongron ma AWURADE.”

³¹Na bɛfale nyamaa bibire bɛkyekyele bɛfa bɛsɔle abotire ne aso anwuro, kyɛbɔ AWURADE hyɛle Mose nen.

³²Yiti nyianu ɛtena sua ne nwo adwuma mukoraa, sɔ yeɛ bɛyɔ beyiele bɔkɔɔ ɔ. Yisraelfoɛ yɔle nikyee biala pɛpɛɛpɛ kyɛbɔ AWURADE hyɛle Mose nen.

³³Afei bɛfale nyianu sua ne bɛbrɛle Mose: ɛtena ne ne ye nwo nningyein amukoraa, ye ndɔkorɔ, ye ndaboa mɔ, ye kwatena mɔ, ye bonima mɔ, ɔne ye nyinasoɛ mɔ;

³⁴boaen nwomaa bɔ bawura ye ayire bɔ bɛfa bekuru ɛtena sua ne anwo ne, ɔne abɔngye nwomaa bɔ bɛfa bɛkata boaen nwomaa ne aso ne, ɔne mbɛmuɛ tena bɔ onwi berɛ ne;

³⁵Adanzeɛ alaka ne ne ye mbuna mɔ, ɔne mbata bia ne;

³⁶ɛpoen ne ne ye nwo nningyein amukoraa, paanoo krongron ne;

³⁷kanea bakaa krongron ne ne ye nganea bɔ betuatua ye nwo ne, ɔne ye nwo nningyein amukoraa, yeɛ ngoo bɔ bɛfa begua kanea ne anu ne;

³⁸sikaa kɔkorɛ afɔleɛ bokyea ne, ɛpopalɛ ngoo ne, ayirefona ne, ɔne ɛtena bɔ onwi ɛtena sua anoa nu berɛ ne;

³⁹kɔɔbere afɔleɛ bokyea ne, ye kɔɔbere ngandanganda ne, ye mbuna mɔ ne ye nwo nningyein amukoraa, ayaa ne ne ye nyinasoɛ ne;

⁴⁰aluo berɛ mbɛmuɛ ɛtena ne, ye bonima mɔ ne ye nyinasoɛ mɔ, ɛtena bɔ onwi aluo berɛ pambim ne noa ne, ye nyamaa mɔ, ye pɛmbɛen mɔ, nyianu sua ne ne ɛtena sua atenaleɛ nu berɛ ɛsɔnenɛ nningyein amukoraati;

⁴¹ndaadeɛ nyemenenyemene bɔ bewura bɛyɔ ɔsɔfo adwuma wɔ nekaa krongron ne anu ɔ, ɔsɔfo Aarɔn ndaadeɛ krongron nemɔ, ɔne ndaadeɛ bɔ ye mma nemɔ kɔfa koli sɔfo ɔ.

⁴²Né Yisraelfoɛ ayɔ adwuma ne amukoraati pɛpɛɛpɛ, kyɛbɔ AWURADE hyɛle Mose ne ala.

⁴³Na Mose neane adwuma ne amukoraa, na onwuni kyɛ bayɔ ye pɛpɛɛpɛ, kyɛbɔ AWURADE hyɛle ne ala. Yiti Mose yirale bɛ.