Read Sehwi Ɛksadɔso 4 Bible Online

Ɛksadɔso 4 - Sehwi bible

Ɛksadɔso 4

¹Na Mose buale kyɛ, “Sɛ banne me banni, anaakyɛ bandie me dwirɛ, ná bɛka kyɛ, ‘AWURADE anye ye nwo ali wangyire wɔ huu’ ɛ?’ ”

²Na AWURADE bisale ye kyɛ, “Nzikyɛ yeɛ otira wɔ sa nu ye?” Obuale kyɛ, “Pɔmaa ɔ.”

³Na AWURADE sele kyɛ, “Gyi to aseɛnwo berɛ!” Ogyi tole berɛ, na ɔkakyili ewoo. Na Mose pimbini ye si fili ye nwo.

⁴Na AWURADE sele Mose kyɛ, “Tengyɛ wɔ sa sɔ ye dua ne anu.” Ɔtengyɛle ye sa sɔle ye nu, na ɔkakyili pɔmaa wɔ ye sa nu.

⁵Na AWURADE sele kyɛ, “Ɛhe kɔmaa bekole bekoli kyɛ AWURADE, bɛ nana mɔ Nyameɛ ne, Abraham Nyameɛ ne, Yisake Nyameɛ ne, Yakob Nyameɛ ne yeɛ waye ye nwo ali wahyire wɔ ɔ.”

⁶Na AWURADE sá sele ye kyɛ, “Fa wɔ sa wura wɔ hue so.” Ɔfale ye sa wurale ye hue so, na ɔyele ye sa fili ye hue so nen, né kwata ayɛ ye sa ne amaa wayɛ fufue kyɛ asukɔtwea.

⁷Na AWURADE sele ye kyɛ, “Fa wɔ sa wura wɔ hue so bieku.” Ɔfale ye sa wurale ye hue so bieku, na ɔyele ye sa ne fitele nen, né wasa wakakyi kyɛ ye nwonaen ngaa ne ala.

⁸Na Nyameɛ sele kyɛ, “Sɛ banne wɔ banni, anaakyɛ banne sɛngyerɛnneɛ bɔ oli moa ne bando nu a, bekole bɔ ɔtɔ so nyɔ ne bekoli.

⁹Na sɛ banne sɔ nzɛngyerɛnneɛ nyɔ ne po banni, anaa bandie wɔ dwirɛ a, ye de sa asue Naele nzue ne bie, ná hwie gua aseɛ wosee so. Na Naele nu nzue bɔ ɛkɔsa ne kɔkakyi mogya wɔ aseɛ wosee ne aso.”

¹⁰Na Mose sele AWURADE kyɛ, “Mesrɛ wɔ, AWURADE. Ofi me tetetete bɔ ɔbaadwu ɛnɛ bɔ ɛne w’akoaa bedwudwo ye, nnde sona bɔ ye noa ate ɔ; me dwudwolɛ te nyaanyaa, na me temverema abutu.”

¹¹Na AWURADE bisale ye kyɛ, “Nwa yeɛ ɔyɔle kuro sona noa ɔ? Nwa yeɛ ɔmaa ɔyɛ emumu anaa asotiniwaaniɛ, ɔmaa onwu nikye anaa ɔyɛ ye anyesiniwaaniɛ ɔ? Yiti nna me AWURADE ɔ?

¹²Yiti kɔ, na ngɔma wɔ noa kɔte ná mahyire wɔ bɔ ɛha ɔ.”

¹³Nakoso Mose sele kyɛ, “Yieee! AWURADE, mesrɛ wɔ ala, soma sona foforɛ.”

¹⁴Afei AWURADE fɛle Mose so yaa maa ɔhane kyɛ, “Eliɛma Aarɔn, bɔ ɔte Lewiniɛ ne, ɔnne berɛ hɔ ɔ? Mese kyɛ ye noa ate. Tie, wasi nu ɔbaayia wɔ, na sɛ onwu wɔ a, ɔkɔyɛ ye fɛ soma.

¹⁵Ka edwirɛ ne kyire ye, ná fa edwirɛ ne tua ye noa; na ngɔmaa ɛne ye ɛmɔ noa kodwu dwaa nu, ná mahyire ɛmɔ bɔ ɛmɔhã ɔ.

¹⁶Okogyina wɔ gya nu kodwudwo kohyire mmenia ne, wɔ noa dwirɛ kotua ye noa, ná wɔ wora ayɛ kyɛ Nyameɛ ama ye.

¹⁷Fa pɔmaa he tira, na ye yeɛ ɛkɔfa kɔyɔ nzɛngyerɛnneɛ ɔ.”

¹⁸Mose sá hɔle ye sia Yɛtro berɛ, na osele ye kyɛ; “Mesrɛ wɔ, maa nza ngɔ nniɛma mɔ berɛ wɔ Misraim, ná ngɔnea sɛ bɛtɛ te ase a.” Na Yɛtro sele Mose kyɛ, “Kɔ asomdwee nu oo.”

¹⁹ Na AWURADE sele Mose wɔ Midian kyɛ, “Sá kɔ Misraim, ofikyɛ bɛ bɔ né bɛpena wɔ beku wɔ ne, bɛ mukoraa bawu.”

²⁰Yiti Mose fale ɔye ne ye mma mmienzua nyɔ ne tenatenane afunum so, na osa hɔle Misraim aseɛ so. Na ɔfale Nyameɛ pɔmaa ne tirale.

²¹Na AWURADE sele Mose kyɛ, “Sɛ esa kɔ Misraim a, nea kyɛ anwanwadeɛ mukoraa bɔ mama wɔ tumi kyɛ ɛyɔ ne, ɛkɔyɔ ye Faro nyunu. Nakoso ngɔma ye so kɔyɛ se, bɔ ɔnate so ɔngɔma me mmenia nemɔ ngɔhɔ ɔ.

²²Afei ka kyire Faro kyɛ, ‘AWURADE nwa: Yisrael te me bamuɛbaa bienzua.

²³Na mekã mekyire wɔ kyɛ, “Ma mma ne ɔhɔ ɔɔsɔne me.” Na sɛ amma ye ate ma wangɔ a, ngohũ wɔ bamuɛbaa bienzua.’ ”

²⁴Na Mose sili nu ne, AWURADE yiale ye wɔ asikyeleɛ bie anu wɔ atunu, na ɔyɛle kyɛ okohu Mose.

²⁵Nakoso Sipora fale twerɛboɛ bie pɛle ɔwa ne bienzua, ɔfa hane Mose gya, na ɔhane kyɛ, “Amba, ɔnate sɔ amaneɛ he aso, aayɛ me bɔbɔ deinn me busuaniɛ!”

²⁶Yiti AWURADE yakyili ye. Na ɔnate bienzuapɛlɛ ne ati, Sipora sele kyɛ, “Ɛte mogya nu atɔmvorɛ biaa.”

²⁷AWURADE sele Aarɔn kyɛ, “Kɔ ɛserɛ so dɔ koyia Mose.” Yiti ɔhɔle, oyiale ye wɔ Nyameɛ bokaa ne anwo, na ɔfele ye noa.[7]

²⁸Mose fale AWURADE dwirɛ bɔ wafa wasoma ye ne amukoraa, ɔne nzɛngyerɛnneɛ bɔ wahyɛ ye kyɛ ɔyɔ ne nwo amaneɛ bɔle Aarɔn.

²⁹Afei Mose ne Aarɔn hɔle bɛɛboaboale Yisrael mbanyi mukoraa noa.

³⁰Aarɔn fale edwirɛ amukoraa bɔ Nyameɛ aha ahyire Mose ne tole dwaa, na ɔyɔle nzɛngyerɛnneɛ ne wɔ mmenia ne nyunu berɛ.

³¹Mmenia ne le lili. Na bɛtele kyɛ AWURADE aapasa Yisraelfoɛ nwo,[8] ná wanwu b’amaneɛnwunɛ nen, bɛbɔle bɛ ti ase bɛsɔnene ye.