Read Sehwi Ɛksadɔso 5 Bible Online

Ɛksadɔso 5 - Sehwi bible

Ɛksadɔso 5

¹Nziɛ ye, Mose ne Aarɔn hɔle Faro berɛ beesele ye kyɛ, “AWURADE Yisrael Nyameɛ nwa: ‘Ma me mmenia nemɔ bɛhɔ, ná beeli aluolue bɛma me wɔ ɛserɛ so.’ ”

²Nakoso Faro buale kyɛ, “AWURADE ne ole nwa bɔ ɔsɛ kyɛ metie ye ná mema Yisraelfoɛ bɛkɔ ɔ? Menze sɔ AWURADE ne, yeɛ Yisraelfoɛ koso mengɔma bɛngɔhɔ!”

³Na besele kyɛ, “Hebrifoɛ Nyameɛ ne ɔne yɛ ayia, yiti yɛsrɛ wɔ, ma yɛ ate ma yɛhɔ atee bɔ bɛfa ɛlɛsa bɛpɛ ɔ wɔ ɛserɛ so, ná yɛɛbɔ afɔleɛ yɛma AWURADE yɛ Nyameɛ ne; na anyɔ a né wafa ewue anwonyerɛ anaa ngrandɛ wawa yɛ so.”

⁴Nakoso Misraim hene sele bɛ kyɛ, “Mose ne Aarɔn, nzu ati yeɛ ɛmɔpena kyɛ bɛma mmenia ne yakyi b’adwuma bɔ bɛyɔ ne ɔ? Ɛmɔhɔ bɛɛtoa ɛmɔ adwuma serɛ ne aso!”

⁵Na Faro sá sele kyɛ, “Ɛ́mɔtie, afei bɔ maen ne anu mmenia[9] asone pee ne yeɛ ɛmɔmaa bɛyakyi adwumayɔlɛ ɔ!”

⁶Sɔ kyẽa ne ala, Faro hyɛle maen adwumayɔlɛfoɛ mɔ so mbanyi, yeɛ adwumayɔlɛfoɛ mɔ so neafoɛ mɔ kyɛ,

⁷“Nnɛmɔma mmenia nemɔ ɛserɛ ko maa bɛpɛ mmerekese kyɛbɔ daa ne ɛmɔyɔle ne, na mmom ɛ́mɔma bɛ bɔbɔ bɛɛpena ɛserɛ ne.

⁸Mmerekese somaa bɔ né bɛpɛ ye daa ne, ɛ́mɔma bɛ́pɛ sɔ ala. Nnɛma ɛmɔte so, ofikyɛ bɛte foen, na ɛhe ati yeɛ ɔmaa besu kyɛ, ‘Maa yɛhɔ yɛɛbɔ afɔleɛ yɛma yɛ Nyameɛ ne.’

⁹Ɛ́mɔma mmenia nemɔ adwuma bɔ ɔyɛ se paa ma bɛyɔ, amaa bandie nnakannaka dwirɛ biala.

¹⁰Yiti maen adwumayɔlɛfoɛ mɔ so mbanyi, yeɛ adwumayɔlɛfoɛ mɔ so neafoɛ mɔ hɔle beesele mmenia ne kyɛ, “Faro nwa: ‘Mengɔma ɛmɔ ɛserɛ ko.’

¹¹Ɛmɔ bɔbɔ bɛɛpena ɛserɛ wɔ nekaa biala bɔ ɛmɔkonya bie ɔ; nakoso ɛmɔ adwuma ne de, yɛngɔte so kaala.

¹²Yiti mmenia ne tele bɛ nwo guale Misraim aseɛ so amukoraa bɛɛboaboale atokoɔ mmakaa wuruwaa noa bɛfa bɛkakyili ɛserɛ.

¹³Adwumayɔlɛfoɛ so mbanyi nemɔ hane bɛ bo kyɛ, “Odi kyɛ ɛmɔyie ɛmɔ daa daa adwuma ne, kyɛbɔ ɛserɛ wɔ berɛ ne ɛmɔyɔle ne ala!”

¹⁴Bɛbole Yisrael mbanyi bɔ Faro adwumayɔlɛfoɛ mɔ so mbanyi afa adwuma ne awura bɛ sa ne, na bebisale bɛ kyɛ, “Mmerekese somaa bɔ ɔsɛ kyɛ ɛmɔpɛ ye anoma ne ɛnɛ ne, nzu ati yeɛ ɛmɔambɛ ye mu, kyɛbɔ dáa ɛmɔpɛ ne?”

¹⁵Afei Yisrael mbanyi bɔ bafa adwuma ne bawura bɛ sa ne wale Faro berɛ beesuni behyirele ye kyɛ, “Nzu ati yeɛ ɛfa sɔ dwirɛ he di wɔ ngoaa ɔ?

¹⁶Bɛmma wɔ ngoaa ɛserɛ biala, nakoso bese yɛ kyɛ, ‘Ɛ́mɔpɛ mmerekese!’ Bɛbo wɔ ngoaa, nakoso mvomsoɛ ne fi wɔ mmenia ne.”

¹⁷Na Faro buale kyɛ, “Ɛmɔte foen, ɛmɔte foen soma! Sɔ ati yeɛ ɛmɔnwa: ‘Ma yɛ ate ma yɛɛbɔ afɔleɛ yɛma AWURADE’ ne.

¹⁸Ɛmɔhã bɛ nwo bɛɛyɔ adwuma! Bɛngɔma ɛmɔ ɛserɛ biala, nakoso mmerekese somaa bɔ ɔsɛ kyɛ ɛmɔpɛ ne ala yeɛ ɛmɔkɔpɛ ɔ.”

¹⁹Yisrael mbanyi bɔ adwuma ne wura bɛ sa nwuni kyɛ edwirɛ ato bɛ, wɔ mmerɛ bɔ bɛha behyirele bɛ kyɛ, “Mmerekese somaa bɔ ɛlɛho biala ɛmɔpɛ ne, ɛmɔngɔte so.”

²⁰Befili Faro berɛ bɛ́ba nen, bɛɛtole Mose ne Aarɔn kyɛ bɛnwondɛ bɛ.

²¹Na besele bɛ kyɛ, “Nyameɛ ɔ́nea ɛmɔ na óbua ɛmɔ ndɛen, ofikyɛ ɛmɔamaa yayɛ tɛɛ wɔ Faro ne ye mbanyi nyunu, na ɛmɔafa ngrandɛ bawura bɛ sa nu kyɛ behũ yɛ.”

²²Afei Mose sá sele AWURADE kyɛ, “Oo AWURADE, nzu ati yeɛ ama edwirɛ sɔaa ato mmenia ye mɔ ɔ? Nzu ati yeɛ ɛsomane me ɔ?

²³Ofi mmerɛ bɔ mmale Faro berɛ, ná ndwudwole wɔ dumaa nu ɔ, ɛhalɛ alaa yeɛ ɔha mmenia ye mɔ ɔ, nakoso ɛyyɔle wɔ mmenia ye mɔ bɛ lelɛ nwo hwee.”