Read Sehwi Yob 1 Bible Online

Yob 1 - Sehwi bible

Yob 1

¹Né biaa bie te Yuse aseɛ so. Ye dumaa li Yob. Sɔ biaa ne, né ye bra te sannwuu, na ɔtengyɛ. Ɔte sona bɔ né osuro Nyameɛ ɔ, na ɔhwene ye nwo fili bɔne nwo.

²Ɔwole mmaa mmienzua nzoo ne mmrasua nza.

³Né ole mmoaen apee nzoo, afupɔngɔ apee nza, nandwie nyɔ nyɔ bɔ bafa kɔnnua basosɔ bɛ babɔ nu ɔ sɔ alaa ɛyaa nnu, afunum mmeleɛ ɛyaa nnu, yeɛ somvoɛ pee. Na ɔnate sɔ ati, né ɔte titire tra sona biala bɔ ɔwɔ eyia afiteleɛ ɔ.

⁴Ye mma mmienzua nemɔ, né ɔyɛ a, bɛkɔ ebiala awuro ngoko ngoko bɛkɔto poen, na né ɔyɛ a bɛto bɛ sa bɛfrɛ b’eliɛma mmrasua nza nemɔ maa bɛ ne bɛ babɔ nu bedidi bɛno.

⁵Sɛ bɛto poen ne alaa maa oyia bɛ ti a, ɔyɛ a Yob soma maa bɛkɔfrɛ bɛ bɛba, na ɔpete bɛ nwo. Né ɔyɛ a ɔpɛ aleɛ odwɔso gyina bɛ nu biala ye gya nu ɔbɔ naen yeralɛ afɔleɛ. Ofikyɛ Yob susuli kyɛ, “Me mma ye mɔ, ebiaa bayɔ bɔne, ebiaa badwudwo batia Nyameɛ wɔ bɛ nzusuleɛ nu.” Na sɔ ala yeɛ né ɔyɛ a Yob yɔ ɔ.

⁶ Ɛlɛho bie, Nyameɛ mma mɔ[1] wale beegyinagyinane AWURADE nyunu, na Satan[2] koso ɔfrale bɛ nu hɔle berɛ bie.

⁷Yeɛ AWURADE bisale Satan kyɛ, “Nisua yeɛ efi wale ɔ?” Na Satan buale AWURADE kyɛ, “Aseɛ so bɔ mekyinikyini, bɔ medi so akɔneaba ne yeɛ mvi so mmale ɔ.”

⁸Yeɛ AWURADE bisale Satan kyɛ, “Aso asusu m’akoaa Yob nwo? Kyɛ sona biala nne berɛ bɔ ɔte kyɛ ye ɔ wɔ aseɛ so; kyɛ ɔte sona bɔ ye bra te sannwuu, ná ɔtengyɛ ɔ; kyɛ osuro Nyameɛ, na ɔtwe ye nwo fi bɔne nwo ɔ?”

⁹ Na Satan buale AWURADE kyɛ, “Esurolɛ bɔ Yob suro Nyameɛ ye, aso nna nikyee bie ti ɔ?

¹⁰Ye nwo waen, ye abusua nwo waen, ɔne nikyee biala bɔ ole ye ɔ nwo waen bɔ abɔ abra ayia ne, aso nna ye ti ɔ? Ayira ye sa noa adwuma so, na ye nyɛmmoa bata pee wɔ aseɛ ne aso.

¹¹Nakoso wɔ de, tengyɛ wɔ sa de bɔ ole ye amukoraa fi ye sa nu nea, sɛ ɔngɔkekã musue dwirɛ ngotia wɔ a!”

¹²Yeɛ AWURADE sele Satan kyɛ, “Nea, nikyee biala bɔ ole ye ne, owura wɔ sa. Nakoso ye ngoa de, nnɛfa wɔ sa ka ye!” Yiti Satan fili AWURADE nyunu berɛ hɔle.

¹³Ɛlɛho bie, Yob mma mmienzua ne mmrasua nemɔ tole poen bɔ né bedidi bɛno wɔ b’eliɛma bienzua panyi paa n’awuro ɔ.

¹⁴Na ɛbɔfoɛ wale Yob berɛ ɔɔbɔle ye amaneɛ kyɛ, “Nandwie nemɔ, mmerɛ bɔ né begu so befundam aseɛ, bɔ né afunum mmeleɛ nemɔ koso bedidi wɔ bɛ nwo berɛ ne,

¹⁵mvum nu, Sabeafoɛ wale bɛɛhyehyele bɛ bɛhɔle, na bafa ngrandɛ bahuhu somvoɛ nemɔ. Me ngome twe yeɛ manya me ti madidi nu bɔ mebaabɔ wɔ amaneɛ ye.”

¹⁶Ye noa wɔ so bɔ odwudwo ne, sona foforɛ wale ɔɔbɔle amaneɛ kyɛ, “Nyameɛ see afi nyameɛso watete wagua wayera mmoaen ne somvoɛ nemɔ wahũ bɛ. Me ngome twe yeɛ manya me ti madidi nu bɔ mebaabɔ wɔ amaneɛ ye.”

¹⁷Ye noa wɔ so bɔ odwudwo ne, sona foforɛ wale ɔɔbɔle amaneɛ kyɛ, “Kaldeafoɛ hyɛle bɛ nu kure nza, babɔ afupɔngɔ nemɔ so apaa bahyehye bɛ bahɔ, na bafa ngrandɛ bahuhu somvoɛ nemɔ. Me ngome twe yeɛ manya me ti madidi nu bɔ mebaabɔ wɔ amaneɛ ɔ.”

¹⁸Ye noa wɔ so bɔ odwudwo ne, sona foforɛ wale ɔɔbɔle amaneɛ kyɛ, “Wɔ mma mmienzua ne mmrasua nemɔ, né bedidi bɛno wɔ b’eliɛma bienzua panyi paa n’awuro.

¹⁹Na mvum nu, mvrama piri bie tu fili ɛserɛ ne aso dɔ, oofini awuro ne ndweasoɛ nna nemɔ, na wabu wagua mmerandeɛ ne ndaluwa nemɔ aso maa bawuwu. Me ngome twe yeɛ manya me ti madidi nu bɔ mebaabɔ wɔ amaneɛ ye.”

²⁰Yeɛ Yob dwɔsole, osunzuale ye bɔbɔ ye ndaadeɛ nu, ɔpoane ye ti, na ɔtole ye nwo yele aseɛnwo berɛ sɔnene (Nyameɛ).

²¹Na ɔhane kyɛ, “Mvi me ni akunu méba ne, né me nwo la so, na ye sɔ ala yeɛ ngosa ngɔfa ngɔhɔ ɔ. AWURADE yeɛ ɔfa mane me ɔ, yeɛ AWURADE asa ale ɔ. Animnyam hã AWURADE dumaa.”

²²Na ɛhe amukoraa nu ne, Yob anyɔ bɔne, yeɛ wammɔ Nyameɛ somoɛ.