Read Sehwi Yob 11 Bible Online

Yob 11 - Sehwi bible

Yob 11

¹Yeɛ Naamaniɛ Sofa buale kyɛ,

²“Edwudwolɛ worawora ne, aso onni kyɛ mebua ye nwo bie anaa? Sɛ sona dwudwo worawora a, né okyire kyɛ odi be anaa?

³Wɔ dwudwolɛ mbaen mbaen ne, ɔkɔmaa mmenia komua bɛ noa anaa? Sɛ ɛgoro ebie nwo a, aso ebie wora ongogua wɔ nyunu ase anaa?

⁴Ofikyɛ ɛnwa: ‘Me ngyerɛkyerɛ te sannwuu, na me nwo te wɔ Nyameɛ nyunu.’

⁵Nakoso, ao, sɛ ahaa Nyameɛ dwudwole a, sɛ ahaa obukyele ye noa hane edwirɛ hyirele wɔ a,

⁶ahaa ɔkɔha nworɛ nwo mvealeɛ nu dwirɛ kohyire wɔ, ofikyɛ nworɛ gua ahoroɔ pee. Nwu ye kyɛ, wɔ mvomsoɛ nwo asohwenɛ bɔ anya ye ne, Nyameɛ abu ye nye wagua mvomsoɛ ne bie aso.

⁷“Nyameɛ mvealeɛ nu dwirɛ ne, ɛkɔhora kɔte ye bo? Tuminiɛ ne, ɛkɔhora kɔte ye bo koyie bɔkɔɔ?

⁸Ye nworɛ ne, ye konguronn tra nyameɛso. Ɛyɛ sɛɛ né ate ye bo? Ye kuronn tra ɛborɔ. Ɛyɛ sɛɛ né anwu sɔ nworɛ ne?

⁹Ye tendenn nu tra aseɛ, yeɛ ye tɛtrɛtɛɛ nu tra ɛpo.

¹⁰Sɛ ɔba ná ɔfa mmenia gua kuku nu, ná ɔfa mmenia kɔ nekaa bɔ bedi dwirɛ a, nwa yeɛ ɔkɔhora kosi ye ate ɔ?

¹¹Ofikyɛ ye de ɔse mmenia bɔ benni nahorɛ ɔ, na sɛ onwu bɔne wɔ sona nwo a, aso okobu ye nye kogua so?

¹²Nakoso anzana kwaseambane konwu nworɛ ne, sana eburo afunum wawo sona koraka.

¹³“Sɛ ɛma wɔ bra yɛ sannwuu a, yeɛ ɛkɔfa w’abisadeɛ ɛkɔto ye nyunu ɔ.

¹⁴Sɛ bɔne wɔ wɔ nu a, yakyi ye yɔlɛ korakorakora, yeɛ nnɛma amumuyɛɛ tena w’awuro.

¹⁵Ɔba ye sɔ a, ɛkɔpagya wɔ ti bɔ wɔ tiboa ngobua wɔ fɔ ɔ, ekogyina pirim, na engosuro.

¹⁶Ofikyɛ, wɔ wora kofi w’aworabɔlɛ, na ɛkɔkaye ye kyɛ nzue bɔ wasẽ wahɔ ɔ.

¹⁷Wɔ ngoa kɔta hyireinn kɔtra eyia ketee, na ye awosii po ɔkɔyɛ kyɛ ngyerɛmɔ.

¹⁸Ekogyina pindinn, ofikyɛ anyelasoɛ wɔ berɛ, ɔkɔbɔ wɔ nwo waen, na ɛkɔla asomdwee nu.

¹⁹Ɛkɔla bɔ ebiala ngonwunanwuna wɔ ɔ, na mmeni pee kɔpena mmokalɛ kofi wɔ berɛ.

²⁰Nakoso amumuyɛɛfoɛ de, bɛ nye so kɔyɛ bɛ wusiwusi, bengonya neka fee bɛngɔnwati ngɔhɔ, na b’anyelasoɛ ala ole ewue.”