Read Sehwi Yob 12 Bible Online

Yob 12 - Sehwi bible

Yob 12

¹Yeɛ Yob buale kyɛ,

²“Ɔnyɛ nwanwa! Ɛmɔ yeɛ mmenia noa dwirɛ tua ɛmɔ noa ɔ, na ɛmɔwu a, né nworɛ bo apɛ.

³Nakoso me wora, adwene wɔ me ti anu kyɛ ɛmɔ ala, ɛmɔ nworɛ ndra me deɛ. Nwa ala yeɛ ɔnze edwirɛ hemɔ ɔ?

⁴Me nwo yɛ me mmango mɔ sere, me bɔ mesu mefrɛ Nyameɛ a ɔma me mmuayɛɛ ɔ, sona bɔ metengyɛ, bɔ mvomsoɛ nne me nwo yeɛ me nwo yɛ mmenia sere ye.

⁵Bɛ bɔ bɛ so anu atɔ bɛ ne, bebu bɛ bɔ amaneɛ ato bɛ ɔ animtia, na amaneɛ asiesie ye nwo ɔnwondɛ bɛ bɔ basoti ɔ.

⁶Nakoso ɛhawo ɔnne awerɔm awuefoɛ b’awuro, yeɛ bɛ bɔ bewura Nyameɛ apue ne koso, banya asomdwee, eh, aso bɛ yeɛ Nyameɛ maa oyie bɛ yé ɔ?

⁷“Nakoso, bisa ngaka mɔ, na bekohyirehyire wɔ, bisa ewienu nnomaa, na bɛkɔhã bekohyire wɔ.

⁸Bisa aseɛ so mmakaa, na bekohyirehyire wɔ, bisa ɛpo nu naen, na bɛkɔhã bekohyire wɔ.

⁹Bɛ mukoraa bɛ nu beni yeɛ ɔnze ɔ, kyɛ AWURADE yeɛ wayɔ sɔ nikyee ne ɔ?

¹⁰Abɔdeɛ biala bɔ ole ngoa ne, ye sa nu yeɛ ye ngoa wura ɔ, yeɛ ye sa nu yeɛ sona biala ye nwomeɛ wura ɔ.

¹¹Aso asoɛ nde nzonzoleɛ bɔ ɔwɔ edwirɛ nu, kyɛbɔ temverema koso tafe aleɛ nea ne?

¹² Mbanyi mɔ berɛ yeɛ nworɛ wɔ ɔ, yeɛ ndeaseɛ koso wɔ bɛ bɔ banyi bahyɛ ɔ berɛ.

¹³“Nyameɛ berɛ yeɛ nworɛ ne tumi wɔ ɔ, ye berɛ yeɛ foɛtulɛ ne ndeaseɛ wɔ ɔ.

¹⁴Sɛ odwiri nikyee gua a, ebiala ngɔhora ngosa ngosi, sɛ ɔto sona kuku nu a, ebiala ngɔhora ye bukye.

¹⁵Tie, sɛ ɔma esue yakyi tɔlɛ a, wawa pe wɔ aseɛ so, yeɛ sɛ ɔma esue tɔ koso a, nzue bu fa aseɛ so.

¹⁶Ye berɛ yeɛ anwoserɛ ne nworɛ wɔ ɔ, sona bɔ bɛlakalaka ye ne, ɔne nnakannakaniɛ ne, bɛ munyɔ bewura ye bo.

¹⁷Ɔma foɛtulɛfoɛ bɛ nworɛ fi bɛ ti anu, yeɛ ɔma ndɛenbualɛfoɛ bɛyɛ ngwaseaa.

¹⁸Ɔsangye ahemvo mɔ b’abɔsoɛ nu, na ɔfa nyamaa ɔbɔ bɛ abɔsoɛ.

¹⁹Opuro asɔfo mɔ bɛ ndaadeɛ, na otu tumifoɛ fi bia so.

²⁰Mmenia bɔ bɛ noa ate ne, ɔma bɛ noa mua, na ode mbanyi mɔ bɛ nimdeɛ fi bɛ sa.

²¹Ɔma mmenia bu atitirefoɛ animtia, na ogoho anwoserɛfoɛ b’abɔsoɛ nu.

²²Obukye mvealeɛ nu dwirɛ bɔ ɔfea awosii nu so, na ɔma awosii kabii kakyi hyireinn.

²³Ɔma maen mɔ so, yeɛ osa bɔ bɛ, ɔma maen mɔ trɛ, na osa maa bɛbɔ aya.

²⁴Mbanyi bɔ bɛla mmenia noa wɔ aseɛ so ne, ode bɛ nworɛ fi bɛ sa nu, na ɔmaa bemini bekyinikyini ɛserɛ bɔ atee nne so ɔ so.

²⁵Befuafua awosii bɔ kanea nne nu ɔ nu, na ɔmaa bɛnate fofalifofali kyɛ akɔnomnzaniɛ.