Read Sehwi Yob 14 Bible Online

Yob 14 - Sehwi bible

Yob 14

¹“Dasaniɛ bɔ brasua awo ye ɔ, ye ngoa te tika, na amaneɛ ngome.

²Opukye kyɛ bakaa nyerɛen, na ɔkese, ɔpɛ nu kɔ kyɛ wawoɛ, na ɔngyɛ né watu wamini.

³Aso ɛhe yeɛ ama wɔ nye ali ye si ye, bɔ afrɛ me awa wɔ nyunu, kyɛ ɛbaabua me ndɛen ye?

⁴Nwa yeɛ ɔkɔhora konya bɔ ye nwo te okofi bɔ ye nwo nde ɔ nu ɔ? Ebiala ngɔhora!

⁵Ɔnate kyɛ, ye ngoa bɔ okonya ye ne, ahyehyɛ ye tendenn ato berɛ, ɔne bosome somaa bɔ okonya ye ɔ ato berɛ, yeɛ apɛ ɛwɛen ato berɛ bɔ ɔngɔhora ye tra ɔ ne ati,

⁶nzaade yakyi ye ma ye nwo ɔtɔ ye e, kyɛbɔ paaniɛ yie ye adwuma a, ole anigye ɔnwondɛ kyɛ okonya ye ɛlɛho akatuaa ɔ.

⁷“Ofikyɛ bakaa po, anyelasoɛ wɔ berɛ ma ye, kyɛ bɛpɛ ye bɛto a, okosa kɔfefɛ, na okosa konya nyaa foforɛ.

⁸Ye ndii nemɔ, ɔwɔ nu kyɛ betwindwam wɔ aseɛ ne abo dɔ de, yeɛ ye dosii ne koso owu aseɛnwo berɛ de,

⁹nakoso sɛ onya nzue kaala pɛ a, ɔfefɛ, na ɔyeye mmaen kyɛ bakaa bɔ batu batɛ ɔ.

¹⁰Nakoso dasaniɛ de, owu a, ɔda berɛ bɔ ɔngekã ye nwo ɔ, sɛ sona ka nu a, né ɔwɔ nisua?

¹¹Kyɛbɔ ɛkwaa nu nzue wewe, ná asue koso otu ɔbɔ mvuture ne,

¹²sɔ ala yeɛ dasaniɛ da berɛ, bɔ ondwɔso ko ɔ. Na anwuro onnya ɔppɛle nu ye de, bengotingye, yeɛ bengotingye bɛ ngofi bɛ nnaa nu.

¹³Oo, me ngome a, ahaa afa me afea wɔ ɛborɔ, ahaa afa me asie kɔpem kyɛ w’ahone kɔtɔ nzue nu ɔ, ahaa ahyɛ mmerɛ bɔ medi ye wɔ ɛborɔ dɔ ɔ, ná akaye me.

¹⁴Sɛ dasaniɛ wu a, ɔkɔtena ngoa nu bieku anaa? Koɛ noa bɔ ngyi wɔ m’asetena nu ye, ngɔnwondɛ, kɔpem kyɛ ngɔpɔno ngole me nwome ɔ.

¹⁵Ɛkɔfrɛ me, na ngosuro wɔ so, na wɔ wora kɔlɔ wɔ sa noa adwuma ne.

¹⁶Afei, ɛkɔfa wɔ nye kɔsra m’agyirɛ biala bɔ ngotu ɔ, na mmom ɛngɔtetɛ me ngɔnea me bɔne.

¹⁷Ekowura me mmeraatolɛ kotoku nu kɔkyekye ye noa, na ɛkɔkata me bɔne so.

¹⁸“Nakoso, kyɛbɔ bokaa dwiri gua ase ɔnyoko, ná nyɔbotaen tu fi ye boso,

¹⁹ná asue twi fa nyɔboɛ nwo maa ohi, ná asue yi pia aseɛnwo nnɛterɛ kɔ ne, sɔ ala yeɛ ɛma dasaniɛ anyelasoɛ otu mini ɔ.

²⁰Edi ye so tumi afebɔɔ, na ewue fa ye kɔ, ɛma ye nyunu sesã bɔ onzoma ye ɔ, na ede ye ngoa fi ye sa nu.

²¹Sɛ ye mma mɔ benya animnyam po a, ɔnze, yeɛ sɛ mmenia gua bɛ nyunu ase koso a, onnwu ye.

²²Ye bɔbɔ ye nwonaen nu yealɛ angome yeɛ ɔte ɔ, na ye kra sũ ye bɔbɔ ye nwo.”