Read Sehwi Yob 15 Bible Online

Yob 15 - Sehwi bible

Yob 15

¹Yeɛ Temanniɛ Elifase buale kyɛ,

²“Aso ɔsɛ kyɛ nworɛniɛ ɔfa nimdeɛ huuhuu ɔye dwirɛ noa, ná ɔfa edwirɛ bɔ aba nne nu ɔ ɔhoahoa ye nwo?

³Aso odi kyɛ osu edwirɛ mbaen mbaen nwo aporowaa, ná ɔkekã edwirɛ bɔ mvasoɛ nne so anaa?

⁴Ama Nyameɛ nwo surolɛ afi wɔ nu, na ɛmaa ɔyɛ se ma wɔ kyɛ ɛkɔbɔ mbaeɛ kohyire Nyameɛ ɔ.

⁵Ofikyɛ wɔ bɔne yeɛ okyire wɔ edwirɛ bɔ ɛkeka ɔ, na nnakannakafoɛ dwirɛ yeɛ ɛkã ɔ.

⁶Wɔ bɔbɔ wɔ noa dwirɛ yeɛ obua wɔ fɔ ɔ, na mmom nna me ɔ, amba, wɔ noa dwudwolɛ yeɛ odi adanzeɛ tia wɔ ɔ.

⁷“Aso wɔ yeɛ ɛte kuro sona bɔ belili moa bɛwole wɔ ɔ? Bɛwole wɔ koraka yeɛ bɛbɔ mmokaa ɔ?

⁸Nyameɛ mvealeɛ nu nhyehyɛleɛ ne, atie nu dwirɛ? Wɔ ngome yeɛ ɛse nworɛ ɔ?

⁹Nzikyɛ yeɛ ɛse bɔ yɛ de yɛnze ɔ? Nzikyɛ yeɛ ɛte ye bo bɔ yɛ de yɛnde ye bo ɔ?

¹⁰Nea, bɛ bɔ bafu gyein, ɔne bɛ bɔ banyi paa ɔ bɛwɔ yɛ nu, bɔ banyi batra wɔ baba po ɔ.

¹¹Nyameɛ aworakyekyerɛ dwirɛ ne, ɔne ye akorɔkorɔ dwirɛ ne, aso ebu ye kyɛ ɔte nikyee ba bie anaa?

¹²Nzu ati yeɛ ɛpe dwirɛ nwo sɔa ye? Nzu ati yeɛ ama wɔ nye aboro ɔ,

¹³bɔ ɔnate so ama w’ahone ahu Nyameɛ so, bɔ ama sɔ dwirɛ ne afite wɔ noa ɔ?

¹⁴ Dasaniɛ ole nwa bɔ ye nwo kora te ɔ? Sona beni yeɛ brasua awo ye bɔ ɔtengyɛ ɔ?

¹⁵Tie, Nyameɛ ye krongronfoɛ po, ɔmva ye nwo ndo bɛ so, yeɛ anwuro po ye nwo nde wɔ ye nye so.

¹⁶Né nzaade busueniɛ bɔ ye suban aporɔ, bɔ wafa amumuyɛɛ wayɛ ye nzue ne, ogyi ye sɛ!

¹⁷“Ngohyirehyire nu ngohyire wɔ, na tie me, bɔ manwu ye ne yeɛ ngɔhã ngohyire wɔ ɔ.

¹⁸Ɔte edwirɛ bɔ nworɛfoɛ baha bato berɛ, bɔ bɛ nana mɔ bamva banzie bɛ,

¹⁹bɔ bɛ nana mɔ ngome yeɛ Nyameɛ fale aseɛ ne mane bɛ ɔ, bɔ ɛwɔfoɛ biala wambɛ nu wɔ bɛ berɛ ɔ.

²⁰Bɔnefoɛ nwo ndɔ ye wɔ mmerɛ biala bɔ ɔte ase ɔ, na sɔ ala yeɛ ebiala bɔ ye ti anu te awosii ne, ɔte ma ye wɔ mmerɛ biala bɔ ɔte ase ɔ.

²¹Ahunundetelɛ ma ye so anu ndɔ ye, na ye asomdwee mmerɛ nu po, sɛkyefoɛ ne ba ye so.

²²Onne nni kyɛ okosa kofi awosii nu ɔ, na ye ayieleɛ ole ngrandɛ noa.

²³Okyinikyini pena aleɛ, na obisa kyɛ, ‘Nisua yeɛ aleɛ wɔ ɔ?’ Na ɔse kyɛ ɔngɔhyɛ né awosii kyẽa ato ye.

²⁴Aworabɔlɛ ne ahunundetelɛ nwunanwuna ye, na bɛba ye so kyɛ ɛhene bɔ waboaboa ye nwo ɔkɔ koɛ ɔ.

²⁵Ofikyɛ watengyɛ ye sa Nyameɛ nyunu, na wadwɔso watia Tuminiɛ ne.

²⁶Otira akokyɛm kubuu, bɔ wayɛ ye nwo lɔen wafa wahɔ ye so ɔ.

²⁷Na ɔnate kyɛ ye nyunu ayɛ twotwofii, ná ye mvenu koso ayɛ twotwofii ne ati,

²⁸ɔkɔtena kurofoen so, ɔne awuro bɔ wakakyi dandue, bɔ bahyehyɛ bato berɛ kyɛ okobu kogua ɔ.

²⁹Ongonya ye nwo, ye anwonya ne ngɔhyɛ, na ye anwonya ngotira ndii wɔ aseɛ so.

³⁰Ongofi awosii nu ngofite le, ɔkɔyɛ kyɛ bakaa, see kɔyera ye nyaa, na mvrama kohu ye nyerɛen ne kɔhɔ.

³¹Nnɛmaa ɔfa ye nwo to nningyein bɔ mvasoɛ nne so ɔ so ɔlakalaka ye nwo, ofikyɛ nningyein bɔ mvasoɛ nne so ɔ yeɛ ɔkɔyɛ ye akatuaa ɔ.

³²Ye sa kɔha ye akatuaa koraka né wawu, na ɔkɔyɛ kyɛ bakaa nyaa bɔ wakese bɔ ɔngɔyɛ monɛ ɔ.

³³Ɔkɔporo ye mma amui kogua kyɛbɔ bobe bakaa yɔ ne ala, yeɛ ɔkɔwoso ye nyerɛen kogua kyɛbɔ olive bakaa yɔ ne ala.

³⁴Ofikyɛ amumuyɛɛfoɛ bɛ boso konua, na see kɔyera sua bɔ bafa fea-ase-ma basi ɔ.

³⁵Bɛnwonzɛ nzɛmmɔne, na bɛwo musue, na nnakannaka ayi b’ahone nu.”