Read Sehwi Yob 16 Bible Online

Yob 16 - Sehwi bible

Yob 16

¹Yeɛ Yob buale kyɛ,

²“Edwirɛ sɔaa mɔ de, mate pee, ɛmɔ amukoraa bayɛ kyɛ ɛmɔdodo me, nakoso ɛmɔgoro me nwo!

³Ɛmɔ noa dwirɛ mbaen mbaen ne, kyinzu yeɛ ye bo kɔpɛ ɔ? Nzikyɛ yeɛ ɔha wɔ ɔ, bɔ yiti ɛtɛ dwudwo ye?

⁴Tebea bɔ nwɔ nu ye, sɛ nu yeɛ ɛmɔ wɔ a, ahaa me koso ngɔhora ngodwudwo kyɛ ɛmɔ ala; ahaa ngɔhora ngodwudwo worɔworɔ ngogua ɛmɔ so, ná masere ɛmɔ.[8]

⁵Ahaa ngɔfa me noa dwirɛ ngɔhyɛ ɛmɔ nguraen, ahaa me noa dwudwolɛ kɔma ɛmɔ nwo tutulɛ ne kɔtɔ ɛmɔ.

⁶“Sɛ medwudwo a, me nwo tutulɛ ne ndɔ me, yeɛ sɛ mandɛ me noa nu koso a, nzikyɛ yakyilɛ yeɛ me nwo tutulɛ ne yakyi ɔ?

⁷Amba, Nyameɛ amaa madwɔso me sonaluwaa so, wanua me nwo ama amukoraa bɛ boso.

⁸Wama me nwonaen atwindwam, bɔ ɔte adanzeɛ tia me ɔ; na ɛfɔen bɔ mafɔ ne odwɔso tia me, ɔte adanzeɛ tia me.

⁹Okyi me, na wafɛ yaa watete me nu pasapasa, wanwose ye gye wahyire me, me pɔfoɛ ne henahena ye nye kyire me.

¹⁰Batu bɛ noa bagua me so, babobɔ me so anu bagoro me nwo, na bɛboa bɛ noa bɛko betia me.

¹¹Nyameɛ afa me wawura busuefoɛ mɔ sa, na wasumu me wato nzɛmmɔnefoɛ bɛ sa nu.

¹²Ahaa né me nwo atɔ me, nakoso wabu me nu gyein, obumane me kɔme, na ɔtetele me nu pasapasa; na watu ye nye wasie me so.

¹³Ye agyaentolɛfoɛ bapɛ me nwo bayia, ɔpakyepakye me saa nu bɔ onnwu me anwumvoin ɔ, na otu m’abɔwee gua ase.

¹⁴Ebubulɛ ala yeɛ obubu me ɔ, na ɔba me so kyɛ koɛhonɛniɛ.

¹⁵Mapa ɛsɛen tena mahera, na magyi m’anwoserɛ mato asefuo nu.

¹⁶Esuɛ ama me nyunu ayɛ yurohaa, na me nye asi apini wayɛ awosii tunn.

¹⁷Nakoso nnyɔle nzɛmmɔne biala, yeɛ me mbaeɛ nwo koso te.

¹⁸“Oo aseɛ, nnɛkata me mogya so, nnɛma me sufrɛ ne ye bo pɛ.

¹⁹ Na kekesaala ye po, tie, m’adanzeniɛ wɔ nyameɛso, yeɛ bɔ ɔka bie ma me ne koso ɔwɔ anwuro.

²⁰Me damvo mɔ po bɛgoro me nwo, nakoso Nyameɛ yeɛ meporo moen mekyire ye ɔ,

²¹kyɛ okoli sona ne Nyameɛ b’afia dwirɛ ɔ, kyɛbɔ sona di obiɛngo ti dwirɛ ɔ.

²²Ofikyɛ waha m’afoɛ kãa bie, né mahɔ nekaa bɔ bɛkɔ a benza bɛmma ɔ.