Read Sehwi Yob 17 Bible Online

Yob 17 - Sehwi bible

Yob 17

¹Me kra nwo ato, ewue apingye me, asieleɛ la berɛ ɔnwondɛ me.

²Susu amba kyɛ, ngorohoɛfoɛ bapɛ me nwo bayia, na me nye tua ngorohoɛ bɔ bɛgoro me nwo ɔ.

³“Gyina me gya nu fa wɔ bɔbɔ wɔ nwo si awowaa; nwa yeɛ okoli me agyinamuɛ ɔ?

⁴Ato b’adwene nu ama bɛ ndeaseɛ abɔ bɛ, yiti ɛngɔma bengoli ngonim.

⁵Ebiala bɔ ɔye ye damvo mɔ ma, maa ɔnate so onya b’agyapadeɛ nu kyɛfa ne, sɔ bɔne ne nwo akatuaa kɔwa ye mma so.

⁶“Wamaa mayɛ mmenia bɛ noa nu ngorohoɛ dwirɛ, na makakyi sona bɔ mmenia tiatia ye nyunu ɔ.

⁷Aworabɔlɛ ama me nye mmaa apakye, na madwɔso me sonaluwaa so mayɛ kyɛ wawoɛ.

⁸Mmenia bɔ bɛtengyɛ ne, benwu me a, bɛ nwo dwiri bɛ, na sona bɔ odi be ne, ɔfɛ amumuyɛɛniɛ so yaa.

⁹Nakoso sona bɔ ɔtengyɛ de, ye atee so yeɛ ɔnate ɔ, yeɛ bɛ bɔ bɛ bra te sannwuu ne, bɛkɔ so benya anwoserɛ.

¹⁰Nakoso ɛmɔ amukoraa, ɛ́mɔhã bɔ ɛmɔkekã ne bieku, na mengonwu nworɛniɛ ko po wɔ ɛmɔ nu.

¹¹Ewue apingye me; me nzusuleɛ ayɛ mbaen, yeɛ bɔ ɔla m’ahone nwo bɔ mepena ne koso, wayɛ mbaen.

¹²Bɛfa alesaleɛ bɛkakyi alehyeleɛ, bɛka kyɛ, ‘Ɔngɔhyɛ né wata hyireinn, wɔ aberɛ bɔ awosii awa ɔ.’

¹³Sɛ me nye la so kyɛ ɛborɔ kɔyɛ m’awuro, sɛ meto me mba wɔ awosii nu,

¹⁴ná mekã mekyire asieleɛ kumaa kyɛ, ‘Me se ole wɔ,’ ɔne nnɔboakoma kyɛ, ‘Me ni ne nniɛma brasua ole wɔ’ a,

¹⁵né m’anyelasoɛ wɔ ni? Nwa yeɛ okonwu m’anyelasoɛ ne ɔ?

¹⁶M’anyelasoɛ ne, aso ɔne me koowura ɛborɔ dɔ pambim ne anu? Aso yɛkɔbɔ nu yɛkɔhɔ mvuture nu?