Read Sehwi Yob 18 Bible Online

Yob 18 - Sehwi bible

Yob 18

¹Yeɛ Suhiniɛ Bildade buale kyɛ,

²“Kyinzu yeɛ ɛmɔkɔyakyi edwirɛ mbaen mbaen ne kekanɛ ɔ? Ɛ́mɔfa bɛhɔ adwenedwene nu, ná afei yɛtoa so yɛdwudwo.

³Nzu ati yeɛ ebu yɛ kyɛ yɛte ngaka ɔ? Nzu ati yeɛ ebu yɛ kyɛ adwene nne yɛ ti anu ɔ?

⁴Wɔ bɔ wɔ yaafɛlɛ amaa atete pasapasa ɔ. Ɔnate wɔ ti odi kyɛ mmenia tu fi aseɛ so anaa, anaakyɛ odi kyɛ betutu nyɔbotaen mɔ befi bɛ boso anaa?

⁵ “Nahorɛ nu, amumuyɛɛniɛ kanea nua, na ye see te mosonomosono.

⁶Ye awuro kanea kakyi awosii, na ye kanea bɔ osinze berɛ ne koso nua.

⁷Ye natelɛ nu anwoserɛ noa kɔbrɛ ase, na ye bɔbɔ ye porɛ bɔ ɔbɔ ɔ yeɛ ofi ye ase ɔ.

⁸Ofikyɛ ye bɔbɔ ye gya diedie ye kowura ngaen nu, na otutu ye gya kɔtɔ kumaa nu.

⁹Kafoli kɔsɔ ye gya ndii nu, ná tukɔ ahye ye asie berɛ.

¹⁰Bɛkɔbɔ kɔtɔkaa bɛkɔfea aseɛnwo bɛkɔnwondɛ ye, na bekosua ye ngaen wɔ atee so.

¹¹Ahunundetelɛ kɔtɔ ye so wɔ nekaa biala, na ahunundetelɛ kɔfoa ye koli ye si.

¹²Ɛhɔen kɔma ye anwoserɛ koyie, na musue asiesie ye nwo kyɛ ɔkɔmaa okosoti.

¹³Anwonyerɛ didi ye nwonaen, na ewue anwonyerɛ suronyisuronyi didi ye gya ne ye sa.

¹⁴Ye awuro bɔ ɔte ye anyelasoɛ ne, betu ye befi nu, na bɛtwe ye bɛkɔ ɛhene atianuserɛniɛ ne nyunu.

¹⁵Ebiala kora tena nu, ofikyɛ nna ye awuro ahɔ ko, na bɛfa sɔfe bɛpetepete berɛ.

¹⁶Ye ndii twindwam wɔ aseɛnwo, na ye mmaen koso kese wɔ anwuro.

¹⁷Ye nwo ngayeɛ komini kofi aseɛ ye aso, na ebiala ngɔkaye ye dumaa wɔ aseɛ ye aso le.

¹⁸Befindi ye befi nekaa bɔ ɔte hyireinn nu bɛto awosii nu, na betu ye befi wiase.

¹⁹Ongonya mmaa anaa ye bosofoɛ wɔ ye abusua nu, na nekaa bɔ né ɔte daa ne, ebiala ngonya ye ti ngodidi nu.

²⁰Edwirɛ bɔ ɔkɔto ye ne, ɔkɔma eyia atɔleɛfoɛ bɛ nwo kodwiri bɛ, na ɛserɛ kɔha eyia afiteleɛfoɛ.

²¹Nahorɛ nu, sɔ yeɛ amumuyɛɛfoɛ b’ayieleɛ yie bɛ ɔ, na bɛ bɔ bɛnze Nyameɛ ne, bɔ ɔto bɛ hɔ ala ɛne.”