Read Sehwi Yob 19 Bible Online

Yob 19 - Sehwi bible

Yob 19

¹Yeɛ Yob buale kyɛ,

²“Kyinzu koraa yeɛ ɛmɔkɔyakyi me halɛ ɔ? Kyinzu koraa yeɛ ɛmɔkɔyakyi edwirɛ bɔ ɛmɔka bɛteetee me ye ɔ?

³Pɛen buru mumua ɛhe yeɛ ɛmɔadwudwo batia me ɔ, aso ɔnyɛ ɛmɔ nya kyɛ ɛmɔmaa mefa yealɛ nu ɔ?

⁴Na sɛ ɔte nahorɛ po kyɛ mayɔ mvomsoɛ a, me mvomsoɛ mata me.

⁵Susu amba kyɛ, sɛ ɛmɔdwene kyɛ ɛmɔte paa bɛtra me, ná ɛmɔbu m’amaneɛnwunɛ ne kyɛ ɔte me bɔne nwo adanzeɛ a,

⁶ye de memaa ɛmɔnwu ye kyɛ, Nyameɛ yeɛ wama ɛhe ato me ɔ, na wagua ye asawu wahye me.

⁷Na sɛ metea nu kyɛ, ‘Ebie le me oo!’ a, ebiala ndɛ me so, yeɛ metea nu mepena mmokalɛ koso a, ebiala nga bie mma me.

⁸Wayɔ aberedwaa wafa me nwo, bɔ mengora menze mengɔ ɔ, na wama m’atee so ayɛ awosii.

⁹Wale m’animnyam wafi me sa nu, na watu m’anidie abotire ne.

¹⁰Wabubu me nekaa biala, bɔ afei de nnde sona ko ɔ, na watu m’anyelasoɛ bo kyɛ bakaa.

¹¹Wama ye ahone ahu me so, na obu me ye pɔfoɛ.

¹²Ye lɔen bɛbɔ nu bɛba me so, baye atee bɔ bɛfa so bɛba me so ɔ, na bakyekye asikyeleɛ bapɛ me tena sua nwo bayia.

¹³“Wate nniɛma mɔ wafi me nwo maa baali dedeede, na wamaa mayɛ ɛwɔfoɛ wɔ me manifoɛ mɔ nu.

¹⁴M’abusuafoɛ bayakyi me nu bahɔ, mmiɛngo paa mɔ bɛ wora afi me.

¹⁵Bɛ bɔ masikye bɛ wɔ m’awuro ne, bɛ wora afi me; m’afaneɛ mɔ bebu me kyɛ nde wɔfoɛ, na makakyi bɛ nye so amanvraniɛ bie.

¹⁶Mefrɛ me somvoɛ a, ɔndɛ me so, sana mebukye me noa mesrɛ ye koraka.

¹⁷Me ye po, me nwomeɛ bo ye, na me kunu mmaa po, bɛmbena me nyunu bɛnnea.

¹⁸Ngwadaa mmaa mmaa po, bebu me animtia, na sɛ meyɛ kyɛ menatenate a, né bɛgoro me nwo.

¹⁹Me nwo yɛ me damvo paa mɔ amukoraa ahi, yeɛ mmenia bɔ mekuro bɛ dwirɛ ne koso, bapɛ bɛ nwo bɛko betia me.

²⁰Me nwo ayeye mmowue mmowue, na mawu mayie, bɔ ewue li me mvanvando ɔ.

²¹Ao, me damvo mɔ, ɛ́mɔnwu me anwumvoin e, ɛ́mɔnwu me anwumvoin e, ofikyɛ Nyameɛ ate ye sa wapura me!

²²Nzu ɔ ɛmɔatu bɛ nye basie me so, kyɛbɔ Nyameɛ atu ye nye wasie me so ye? Bɔ wayɛ me nwonaen ye, aso ɔnha ɛmɔ?

²³“O, sɛ ahaa bɛkyerɛ me dwirɛ ne a! Sɛ ahaa bɛkyerɛ begua nwomaa nu a!

²⁴Sɛ ahaa bɛfa buralɛ pɛn, ɔne sum bekolikoli begua nyɔboɛ so maa ɔtena berɛ afebɔɔ a!

²⁵Ofikyɛ me de, mese kyɛ me Defoɛ ne ɔte ase, na ayieleɛ ne, okoli me dwirɛ kɔma me wɔ aseɛ ye aso[9].

²⁶Na sɛ anwonyerɛ didi me wereɛ sɛkye ye yie a, ndɛ wɔ anwoɔnaen nu ye de, ngonwu Nyameɛ.

²⁷Ye bɔ me bɔbɔ ngonwu ye, me nye konwu ye ɔ, ná ɔngɔyɛ me nye so wɔfoɛ ɔ. Me wora dɔ kyɛ sɔ mmerɛ ne kodwu!

²⁸Sɛ ɛmɔka kyɛ, ‘Yɛkɔyɔ sɛɛ né yatane ye nye?’ ɔne kyɛ, ‘Amaneɛ bɔ onwu ye ne, ofi ye bɔbɔ’ a,

²⁹ye de odi kyɛ ɛmɔsuro ngrandɛ ne, ofikyɛ ɛyaafɛlɛ ne kɔmaa ɛmɔkonwu ngrandɛ noa asohwenɛ, na ɛhe kɔma ɛmɔkonwu kyɛ ndɛenbualɛ wɔ berɛ.”