Read Sehwi Yob 2 Bible Online

Yob 2 - Sehwi bible

Yob 2

¹Ɛlɛho bie, Nyameɛ mma mɔ wale beegyinagyinane AWURADE nyunu bieku, na Satan koso ɔfrale bɛ nu hɔle berɛ kyɛ ɔkwaagyina AWURADE nyunu.

²Yeɛ AWURADE bisale Satan kyɛ, “Nisua yeɛ efi wale ɔ?” Na Satan buale AWURADE kyɛ, “Aseɛ so bɔ mekyinikyini, bɔ medi so akɔneaba ne yeɛ mvi so mmale ɔ.”

³Yeɛ AWURADE bisale Satan kyɛ, “Aso asusu m’akoaa Yob nwo? Kyɛ sona biala nne berɛ bɔ ɔte kyɛ ye ɔ wɔ aseɛ so; kyɛ ɔte sona bɔ ye bra te sannwuu, ná ɔtengyɛ ɔ; kyɛ osuro Nyameɛ, na ɔtwe ye nwo fi bɔne nwo ɔ?” Ɔtɛ gyi ye gya nu wɔ ye nahorɛlilɛ nu, ɔwɔ nu kyɛ awurawura me amaa mafa ye nwo dwirɛ, kyɛ mbrapra amaneɛ ngua ye so wɔ aberɛ bɔ ɔyyɔle bɔne biala ɔ.”

⁴Na Satan buale AWURADE kyɛ, “Na ye nwonaen koso ɛ! Bɔ sona le ye amukoraa, okuro kyɛ ɔkɔmaa ɔkɔhwere ye, ná wanya ngoa.

⁵Nakoso wɔ de, tengyɛ wɔ sa ka ye ma anwonyerɛ ɔbɔ ye nea, sɛ ɔngɔkekã musue dwirɛ ngotia wɔ a!”

⁶Yeɛ AWURADE sele Satan kyɛ, “Nea, owura wɔ sa. Nakoso ye ngoa de, nnɛfa wɔ sa ka ye!”

⁷Yiti Satan fili AWURADE nyunu berɛ hɔle, na ɔpraprale ngena mbiri guale Yob so mane ye nwo tutuli ngena fite ye ti so kɔka ye gya bo.

⁸Afei Yob ɔɔtenane nzoen nu, na ɔfale nyangaa bue bie dwirili ye nwo.

⁹ Yeɛ ɔye sele ye kyɛ, “Yiti ɛtɛ gyi wɔ gya nu wɔ wɔ nahorɛlilɛ nu! Ka musue dwirɛ tia Nyameɛ, ná wu!”

¹⁰Nakoso obuale ye kyɛ, “Edwudwo kyɛbɔ brasua kwaseaa biala odwudwo ɔ. Nzu ɔ? Nyameɛ ma yɛ nikye paa a, yɛde; nzu ati yeɛ sɛ ɔma yɛ bɔ ɔtte mayee a, ɔnzɛ kyɛ yɛde ɔ?” Na ɛhemɔ amukoraa nu ne, Yob amma ye noa andia Nyameɛ.

¹¹Né Yob le ye mmango nza biemɔ. Bɛ ole Temanniɛ Elifase, Suhiniɛ Bildade, yeɛ Naamaniɛ Sofa. Bɛtele amaneɛ amukoraa bɔ wato ye nen, bɛ nu biala fili ye kuro wale, na beeyiale bɛfale adwene kyɛ bɛkɔ Yob berɛ bɛkɔyɛ ye yaakɔ ná bɛkyekye ye wora.

¹²Bɛwɔ dedeede ná bɛtole bɛ nye bɛneane ye nen, bannwu ye sona horɛ. Yiti besuni hahii, besunzuale bɛ ndaadeɛ nu, na betuli mvuture bɛhɔle anwuro beguale bɛ ti so.

¹³Bɛ ne ye tenatenane asefuo nu berɛ ɛlɛsoo, eyia ne kɔngɔen. Na bɛ nu biala ne ye andwudwo, ofikyɛ benwuni kyɛ né onwu amaneɛ paa.