Read Sehwi Yob 20 Bible Online

Yob 20 - Sehwi bible

Yob 20

¹Afei Naamaniɛ Sofa buale kyɛ,

²“Tie! Edwirɛ ne ha me paa bɔ odi kyɛ mebua ye nwo bie ɔ, yiti mengonya ye nwo aboterɛ.

³Edwirɛ bɔ mate kyɛ ɛkeka ne, otwi me, na me ndeaseɛ kanyane me kyɛ mma wɔ mmuayɛɛ.

⁴Yiti ɛnze kyɛ ofi tetetete, ofi mmerɛ bɔ Ɛdangama bɔle sona tole aseɛ ye aso ɔ,

⁵kyɛ bɔnefoɛ ngɔsoɛ ɔndena berɛ ngyɛ, ɔne kyɛ sona bɔ ɔnze Nyameɛ ne, ye anigye te tikaape bie ɔ?

⁶Ɔwɔ nu kyɛ ɔmoma ye nwo so kodwu anwuro anwuro, ma ye ti kɔka munungum de,

⁷nakoso ye boso komini kyɛ ye bɔbɔ ye bondua; na bɛ bɔ banwu ye ne, bekobisa kyɛ, ‘Ɔwɔ nisua?’

⁸Okotu komini kyɛ laleɛ, bengonwu ye ko; ye boso komini kyɛ kɔngɔen nyekyire.

⁹Anyeɛ bɔ onwuni sɔ sona nen, ongonwu ye ko, na okotu komini bɔ bengonwu ye wɔ ye awuro ɔ.

¹⁰Ye mma mɔ kɔfa mbata kɔma ehiafoɛ, na ye anwonya bɔ wanya ye ne, okopu kɔwa.

¹¹Ɔwɔ nu kyɛ ye mmerandeɛ nu anwoserɛ ma ye mmowue nu yɛ se de, nakoso ɔkɔfa kɔhɔ kumaa nu.

¹²“Ɔwɔ nu kyɛ amumuyɛɛ te ye noa nu menemene, yeɛ ɔfa fea ye temverema bo de,

¹³ɔwɔ nu kyɛ onguro kyɛ ɔyakyi nu, na ɔfa wura ye nnaalɔ de,

¹⁴nakoso ye aleɛ dwu ye kunu dɔ a, ɔkakyi yɛ weewee, na ɔyɛ ɛkyenebene noa borɔ wɔ ye nu.

¹⁵Ɔsesa anwonya ɔbɔ so meme, nakoso osa fe bɛ ba, Nyameɛ tu anwonya ne fi ye kunu dɔ gua.

¹⁶Ɔkɔtafe ɛkyenebene borɔ, na ɛbɔnaa yeɛ ɔkɔha ye kohũ ye ɔ.

¹⁷Ye nye ngonwu asue mmaa mmaa mɔ, ongonwu woɛ ne nyɔfonesue asue bɔ ɔtengyɛ ne.

¹⁸Nikyee bɔ wafɛ wanya ye biala, okopu kɔwa bɔ ɔngɔme ɔ, na mvasoɛ bɔ okonya kofi ye dwaalilɛ nu ne, ongonya nu anigye.

¹⁹Ofikyɛ wasisi mmenia bɔ bɛyɛ anwumvo ɔ, na wasa wapo bɛ, na wale sua bɔ nna ye yeɛ osili ɔ mbendene so.

²⁰“Ɔnate kyɛ ɔte adifuu ne ati, ɔngora mva nikyee bɔ ye nye gye ye nwo ɔ onzie.

²¹Odidi a, ɔnyakyi bie, yiti ye anwonya ngosi pasiliwa biala.

²²Ye anwonya mmorosoɛ ne asi ne po, ye nwo ngɔtɔ ye, na musue amukoraa kɔtoto ye.

²³Odidi ma ye ko yi pambee. Nyameɛ kɔfɛ ye so yaa piri paa, na okohwie ye yaafɛlɛ ne kogua ye so maa ɔkɔkakyi ye aleɛ.

²⁴Sɛ ɔnwati fi buralɛ akodeɛ noa a, kɔɔbere agyaen kosina ye.

²⁵Agyaen ne sina ye fite, ye noa ne sina ye abɔwee nu fite, na ewue nwo suronyi tɔ ye so.

²⁶Basiesie awosii tunn bato berɛ bama ye anwonyadeɛ, see bɔ nna sona yeɛ ofita nu ɔ yeɛ ɔkɔyera ye ɔ, na ebiala bɔ waha ye awuro berɛ ne, ɔkɔyera kɔtɔ nzoen.

²⁷Nyameɛso kɔma ye amumuyɛɛ nwo kɔla berɛ, na aseɛ kodwɔso kotia ye.

²⁸Nzue koyi kɔfa ye awuro agyapadeɛ, okopia agyapadeɛ ne kɔhɔ wɔ Nyameɛ ɛyaafɛlɛ kyẽa ne.

²⁹Sɔ yeɛ Nyameɛ ma amumuyɛɛniɛ ayieleɛ yie ye ɔ, agyapadeɛ bɔ Nyameɛ ahyehyɛ wato berɛ wama ye hɔ ɛne.”