Read Sehwi Yob 21 Bible Online

Yob 21 - Sehwi bible

Yob 21

¹Yeɛ Yob buale kyɛ,

²Ɛ́mɔyɛ asoɛ betie me dwirɛ ye yé, ná ɔyɛ aworakyekyerɛ bɔ ngonya ngofi ɛmɔ berɛ ɔ.

³Ɛ́mɔma me koso ndwudwo bie, na sɛ medwudwo meyie a, afei né ɛmɔagoro me nwo.

⁴Me de, aso dasaniɛ yeɛ mebɔ ye somoɛ anaa? Nzu ati yeɛ ɔnzɛ kyɛ mefɛ yaa ɔ?

⁵Ɛ́mɔnea tebea bɔ nwɔ nu ɔ, na ɔkɔyɛ ɛmɔ aworabɔ maa ɛmɔkɔfa ɛmɔ sa bɛkɔsɔ ɛmɔ noa.

⁶Sɛ medwene ye nwo a, né ɔyɛ me suro, na ɔma me nwo wosowoso me.

⁷Nzu ati yeɛ bɔnefoɛ mɔ bɛkɔ so benya ngoa ɔ, benyi bɛkyɛ, ná bɛkɔ so benya ngɔsoɛ mbiri mbiri ɔ?

⁸Oyie bɛ mma mɔ yé maa bɛtenatena bɛ nwo, na oyie bɛ boso ama mɔ yé maa bɛ nye nwu bɛ.

⁹Asomdwee wɔ b’awuro, bɔ ahunundetelɛ biala nne berɛ ɔ, yeɛ Nyameɛ asohwenɛ ne bie ɔmma bɛ so.

¹⁰Ye nandwie nyii ɔkɔ so wo, na ye nandwie beleɛ kɔ so wo mmaa, bɔ ɔmbɔ ba ɔ.

¹¹Amumuyɛɛfoɛ mɔ, bɛma bɛ mma mmaa mmaa mɔ befite bekotu mbasa kyɛ mmoaen kure, na bɛ mma mɔ huru pepe bedi angorɛ.

¹²Bɛfa akasaa ne sangoo bɛkenga dwein bɛto, na behu awɛen bɛma bɛ nye gye.

¹³Amumuyɛɛfoɛ di bɛ mmerɛ wɔ anwonya nu, na afei, bɛkɔ ɛborɔ.

¹⁴Bɛka bekyire Nyameɛ kyɛ, ‘Fi yɛ so kɔ! Ofikyɛ yɛmbena kyɛ yɛnya w’atee nwo nimdeɛ biala.

¹⁵Tuminiɛ ne te nzu, bɔ ɔsɛ kyɛ yɛso ye ɔ? Yɛbɔ mbaeɛ yɛkyire ye a, nzikyɛ mvasoɛ yeɛ yɛkonya ɔ?’

¹⁶Tie, bɛ ngɔsoɛ ne, aso nna bɛ bɔbɔ bɛ sa nu yeɛ ɔwɔ ɔ? Mekyi bɔnefoɛ foɛtulɛ kɔkɔkɔkɔ.

¹⁷“Nea kyɛbɔ bɔnefoɛ ye kanea ɔtaa nua ɔ! Nea kyɛbɔ musue taa toto ye ɔ! Nea kyɛbɔ Nyameɛ osi kyekyɛ aworabɔlɛ wɔ ye yaafɛlɛ nu ɔ!

¹⁸Pɛen nyɛɛ yeɛ mvrama ɔbɔ bɛ kɔ kyɛ ɛserɛ ɔ? Pɛen nyɛɛ yeɛ mvrama piri ɔbɔ bɛ kɔ kyɛ afafu ɔ?

¹⁹Ɛmɔnwa: ‘Bɔnefoɛ amumuyɛɛ nwo asohwenɛ ne, Nyameɛ boaboa ye noa gua berɛ ma ye mma mɔ.’ Na mesrɛ kyɛ, ótua ye bɔbɔ ye kerɛ ma onwu ye.

²⁰Mesrɛ kyɛ ye bɔbɔ ye nye onwu musue bɔ ɔkɔto ye ɔ, mesrɛ kyɛ onwu amaneɛ wɔ Tuminiɛ ne ye ɛyaafɛlɛ nu.

²¹Ofikyɛ, sɛ ye ngoa bo pɛ a, nikyee biala bɔ ɔkɔto ye abusua bɔ wayakyi ye berɛ ne, ɔmva ye nwo.

²²Aso ebie kɔhora kohyire Nyameɛ nworɛ, ye bɔ obua nyameɛsofoɛ ndɛen ɔ?

²³Sɛ ebie baawu a, né ɔwɔ anwotɔ tebea nu, ye so anu tɔ ye, nikye fee nha ye,

²⁴ɔyɛ piri tukutuku, na ye bowue nu mia.

²⁵Yeɛ ebie wora, ye kra di aworabɔlɛ kɔ ewue nu, bɔ onnya asetena nu anigye ɔ.

²⁶Nakoso besie bɛ mukoraa wɔ nnɛterɛ nu, na nnɔboakoma to fa bɛ nwo.

²⁷“Nea, manwu ɛmɔ adwene, ɔne porɛ bɔ ɛmɔabɔ bafa me nwo ɔ.

²⁸Ofikyɛ ɛmɔnwa: ‘Sona titire ne, ye awuro ne wɔ ni? Ɛtena sua bɔ amumuyɛɛfoɛ nemɔ bɛtenane nu ne, ɔwɔ ni?’

²⁹Mmenia bɔ bɛfa atee ne aso ne, aso ɛmɔnnya bebbisale bɛ? Aso ɛmɔnne b’adanzeɛ ne bɛndo nu,

³⁰kyɛ kyẽa bɔ asane kosi ne, amumuyɛɛniɛ onya ye ti didi nu ɔ, kyɛ ɛyaafɛlɛ kyẽa ne, bɛpepɛ bede ye ɔ?

³¹Amumuyɛɛniɛ ye bɔne yɔleɛ ne, nwa yeɛ ɔkora fa si ye nyunu ɔ? Nwa yeɛ otua ye kerɛ wɔ ye bɔne yɔleɛ nwo ɔ?

³²Sɛ bekosie ye a, bɛwɛne ye asieleɛ ne.

³³Kumaa nu nnɛterɛ bɔ ɔla nu ne, ɔyɛ ye fɛ, ebiala di ye si maa bekosie ye, yeɛ bɛ bɔ beli ye nyunu koso, bɛsone pembepembe.

³⁴Edwirɛ basabasa mbaen he, ɔkɔyɛ sɛɛ né ɛmɔahora bafa bakyekye me wora, wɔ aberɛ bɔ ɛmɔ mmuayɛɛ te ngondombo ngome ɔ?”