Read Sehwi Yob 22 Bible Online

Yob 22 - Sehwi bible

Yob 22

¹Temanniɛ Elifase buale kyɛ,

²“Aso dasaniɛ nwo kɔhora konya mvasoɛ kɔma Nyameɛ anaa? Nworɛniɛ po, aso ye nwo le mvasoɛ ma ye anaa?

³Sɛ ɛtengyɛ a, ɔfa Tuminiɛ ne nwo nzu, yeɛ sɛ ngekalewa nne wɔ bra nu a, nzikyɛ mvasoɛ yeɛ onya ye ɔ?

⁴Ɛnwa nzɛ wɔ bra te sannwuu ti yeɛ ɔtwi wɔ nyunu ɔ, bɔ ɔmaa obua wɔ ndɛen e?

⁵Aso nna wɔ bɔne bɔ ɔte piri ti ɔ? W’amumuyɛɛ ne, ɔtra so.

⁶Ofikyɛ ama eliɛma mɔ bafa bɛ nningyein basi wɔ berɛ awowaa mbaen, na apa bɛ nwo tena ama bɛ nwo ala so.

⁷Sona bɔ wayɛ bɛtɛɛ ne, amma ye nzue, yeɛ bɔ ɛhɔen ku ye ne koso, afa aleɛ abɔ ye aheɛ.

⁸Sona bɔ tumi wura ye sa ne, wale aseɛ wabɔ so, na bɔ tuminiɛ ne kuro ye dwirɛ ne yeɛ ɔtena so ɔ.

⁹Ama akunafoɛ mmrasua bele nzanza basa bahɔ, na asisi awisiafoɛ.

¹⁰Ɔnate sɔ ati, ngaen mɔ apɛ wɔ nwo ayia, mvum nu asane nwo ahunundetelɛ atɔ wɔ so.

¹¹Awosii asi wɔ nye bɔ ennwu nikye ɔ, na nzue ayi afa wɔ nwo nekaa biala.

¹²“Aso nna nyameɛso anwuro anwuro yeɛ Nyameɛ wɔ ɔ? To wɔ nye nea anwuro anwuro nzramaa mɔ, ná nwu kyɛbɔ besi bɛwɔ dededede ɔ!

¹³Nakoso ɛnwa: ‘Nyameɛ ɔse nzu? Awosii kabii ye, aso okonwu yɛ kobua yɛ ndɛen?

¹⁴Munungum kabii amundu ye nwo, bɔ ɔmma onnwu nikye ɔ, na ɔnate anwuro kango ne aso.

¹⁵Tete atennaa bɔ amumuyɛɛfoɛ bɛfale so ne, so yeɛ ɛkɔfa hɔ anaa?

¹⁶Wandwu bɛ wue yeɛ ɔpraprale bɛ hɔle maa bewuwuli ɔ, na nzueyilɛ piane bɛ nyinasoɛ hɔle.

¹⁷Na besele Nyameɛ kyɛ, ‘‘Fi yɛ so kɔ! Nzikyɛ yeɛ Tuminiɛ ne kɔhora kɔfa kɔyɛ yɛ ɔ?’

¹⁸Nakoso ye yeɛ wafa nningyein paa wayi b’awuro tɛkyɛɛ ɔ, na me de, mekyi bɔnefoɛ bɛ foɛtulɛ kɔkɔkɔkɔ.

¹⁹Bɛ bɔ bɛtengyɛ ne, benwu ye, na bɛ nye gye, na bɛ bɔ bedi be ne goro bɛ nwo bɛka kyɛ,

²⁰‘Amba, yɛ pɔfoɛ mɔ bɛ boso anua, na agyapadeɛ bɔ bayakyi ye berɛ ne, see ayera ye.’

²¹“Odi kyɛ ɛne Nyameɛ bɛbɔ nu, ná ɛne ye bɛtena asomdwee nu, na ɛyɔ sɔ a yeɛ okoyie wɔ yé ɔ.

²²Di ye noa dwirɛ so, ná fa ye dwirɛ sie wɔ ti anu.

²³Sɛ esa kɔ Tuminiɛ ne berɛ a, ɔkɔmaa ekosa kɔpe wɔ daa nu; sɛ etu bra fiɛ bo efi w’awuro kɔ dededede a,

²⁴sɛ ebu sikaa kɔkorɛ kyɛ mvuture a, ɔne Ofire sikaa kɔkorɛ kyɛ asue nu nyɔboseka,

²⁵ná ɛfa Tuminiɛ ne ɛyɛ wɔ sikaa kɔkorɛ, ɔne wɔ dwetɛ paa paa a,

²⁶ye de ekonya anika wɔ Tuminiɛ ne anu, ná ama wɔ nye so anea Nyameɛ.

²⁷Ɛkɔfa wɔ dwirɛ kɔto ye nyunu, na okotie wɔ, ná atua w’aboadeɛ.

²⁸Bɔ ɛkɔfa kosie wɔ nye so biala, ɔkɔyɛ berɛ kɔma wɔ, na kanea kɔta w’atee so.

²⁹Sɛ ɔbrɛ ebiemɔ ase a, ɛnwa anwomasoɛ ti ɔ, ofikyɛ ɔpepɛ de anwobrɛaseɛniɛ.

³⁰Sɛ sona bɔ onni be po, okole ye a, nzaade wɔ nwo bɔ ɔte ne, okogyina so kole wɔ.”