Read Sehwi Yob 23 Bible Online

Yob 23 - Sehwi bible

Yob 23

¹Yeɛ Yob buale kyɛ,

²“Ɛnɛ koso, me nye aboro yeɛ mebɔ somoɛ ɔ, me penenɛ bɔ mepene ne asi ne po, wasa wafa amaneɛ wato me so.

³Ao! Sɛ ahaa mese nekaa bɔ ɔwɔ hɔ a, sɛ ngɔhora ngoodwu nekaa bɔ ɔwɔ hɔ a!

⁴Ahaa ngɔbɔ me nguro wɔ ye nyunu, ná mahyirehyire me dwirɛ ne anu mahyire ye.

⁵Ahaa ngɔte ye mmuayɛɛ bɔ ɔkɔfa kɔma me ɔ, ná mate bɔ ɔkɔha kohyire me ne abo.

⁶Ye tumi piri ne, so yeɛ okogyina ɔne me kɔbɔ nguro anaa? Daabi, ɔkɔyɛ asoɛ kotie me dwirɛ deɛ.

⁷Berɛ de, sona bɔ ɔtengyɛ ne, ɔkora ne ye bɛbɔ nguro, na me ndɛenbualɛniɛ ne, okobua me be afebɔɔ.

⁸“Tie, sɛ mekɔ me nyunu a, ɔnne berɛ, yeɛ mekɔ me si koso a, mennwu ye.

⁹Sɛ ɔyɔ adwuma wɔ me bɛen so a, mennwu ye, yeɛ sɛ mekɔ famaa so koso a, me nye mbɛ ye so.

¹⁰Nakoso ye de, ɔse atee bɔ mefa so ɔ, na sɛ oso me nea a, ngofi nu ngofite ma me nwo kɔyɛ hyɛmm kyɛ sikaa kɔkorɛ.

¹¹Mafa ye gya boso atee so pɛpɛɛpɛ, na mali ye dwirɛ so bɔ manni ye nwo makyebu ɔ.

¹²Ye mmeraa bɔ wahyɛ ne, mmmuli so, na ye noa dwirɛ ne, ye nwo hia me maa mafa masie me ti anu.

¹³Ye de, ye adwene nzesã, nwa yeɛ ɔkɔhora maa ɔkɔkakyi ye adwene ɔ? Bɔ okuro ne yeɛ ɔyɔ ɔ.

¹⁴Ofikyɛ, bɔ wahyehyɛ wato berɛ wama me ne, ɔkɔmaa ɔkɔwa nu, na ole sɔ nhyehyɛleɛ ne pee wɔ ye ti anu.

¹⁵Yiti mesuro kyɛ ngogyina ye nyunu ɔ, na sɛ medwene sɔ dwirɛ ne anwo a, né ye nwo suronyi atɔ me so.

¹⁶Nyameɛ ama me nwo ngaka anwati, Tuminiɛ ne ama ɛserɛ aha me.

¹⁷Ofikyɛ mandu mammini wɔ awosii ne anu, nakoso wafa awosii kabii wamundu me nyunu.