Read Sehwi Yob 26 Bible Online

Yob 26 - Sehwi bible

Yob 26

¹Yeɛ Yob buale kyɛ,

²“Sona bɔ ɔyɛ mmerɛ ne, mmokalɛ bɔ afa ama ye hɔ ɛne! Sona bɔ ye anwoserɛ ayie ne, mmokalɛ bɔ afa ama ye hɔ ɛne!

³Sona bɔ ɔnze nworɛ ne, foɛ bɔ atu ye hɔ ɛne! Eh! Foɛ paa pee bɔ afa ama ye hɔ ɛne!

⁴Nwa yeɛ aha sɔ dwirɛ ne ahyire ye ne? Nwa sunzum yeɛ ɔfa wɔ nu dwudwo ye?

⁵Awufoɛ mɔ bɛ nwo wosowoso bɛ wɔ aseɛ bo dɔ[10], asue mɔ ne bɛ nu nningyein koso sɔ ala.

⁶Ɛborɔ nwo la so wɔ Nyameɛ nyunu, yeɛ Abadɔn[11] koso, ngatasoɛ biala nne so.

⁷Nyameɛ yeɛ ɔtrɛ sorɔ dɔ ewienu maa okodwu nekaa bɔ ɛhwee nne berɛ ɔ, na ɔma aseɛ sinze berɛ bɔ nikyee fee nzosɔ nu ɔ.

⁸Ɔbɔ esue nonongu wura ye munungum nu, nakoso nu nonɛ ne, ɔmma munungum ne anu nzua.

⁹Ɔkata ye ahennie bia ne nyunu, na ɔtrɛtrɛ ye munungum nu fa kata so.

¹⁰Wafa ɛwɛen wato nzue anye, na berɛ yeɛ ɔte kanea ne awosii b’ayieleɛ ɔ.

¹¹Anwuro dɔ nyinasoɛ mɔ wosowoso, na sɛ otwi bɛ nyunu a, bɛ nwo dwiri bɛ.

¹²Ɔfale ye tumi brɛle ɛpo ase, na ɔfale ye nimdeɛ lili ɛpo nu sasrabɔnzam so ngonim.

¹³Ɔfale ye nwomeɛ mane ewienu tele kaenn, yeɛ ɔfale ye sa sinane ewoo bɔ ɔnwati ne.

¹⁴Tie, bɔ Nyameɛ tumi kora yɔ ne, sɔ nningyein nemɔ te nu mmaa mmaa bie, na kaaba bie yeɛ yate yafa Nyameɛ nwo ɔ. Ye tumi totohyia ne, nwa yeɛ ɔkɔte ye bo ɔ?”