Read Sehwi Yob 27 Bible Online

Yob 27 - Sehwi bible

Yob 27

¹Yob toale so dwudwole kyɛ,

²“Nyameɛ bɔ ɔne me anni ye yé, Tuminiɛ ne bɔ wama me kra odi aworabɔlɛ ne, kyɛ ɔte ase ye de,

³kyɛbɔ ndɛ te ngoa nu ye, bɔ Nyameɛ nwomeɛ tɛwɔ me nu ye de,

⁴me noa ngɔpɛ ngondombo, yeɛ me temverema ngɔhã nnakannaka dwirɛ.

⁵Nyameɛ pa gua kyɛ ngɔhã kyɛ ɛmɔdi be ɔ, na me nahorɛlilɛ de, mengɔyakyi nu kɔpem kyɛ ngowu ɔ.

⁶Ngotira me tenenee nu pindinn bɔ mengɔyakyi nu ɔ, na me ngoa nu bɔ nde ye, me tiboa mmua me fɔ.

⁷“Mesrɛ kyɛ oyie me pɔfoɛ kyɛbɔ oyie amumuyɛɛniɛ ɔ, ná oyie bɔ ɔko tia me ne kyɛbɔ oyie sona bɔ ɔndengyɛ ɔ.

⁸Sona bɔ ɔnze Nyameɛ ne, sɛ Nyameɛ pɛ ye ngoa so a, sɛ ode ye ngoa fi ye sa nu a, ye anyelasoɛ wɔ ni?

⁹Sɛ edwirɛ to ye a, aso Nyameɛ kotie ye sufrɛ?

¹⁰Aso ole anigye wɔ Tuminiɛ ne anu? Aso osũ frɛ Nyameɛ mmerɛ biala anaa?

¹¹Ngohyirehyire ɛmɔ Nyameɛ tumi ne nwo dwirɛ, na Tuminiɛ ne, mengɔfa ye atee mengɔfea ɛmɔ.

¹²Na ɛmɔ amukoraa, sɛ ɛmɔ bɔbɔ ɛmɔanwu ye a, nzu ati yeɛ ɛmɔkekã sɔ dwirɛ mbaen mbaen he ɔ?

¹³“Sona bɔ ɔte bɔnefoɛ ne, akatuaa bɔ onya fi Nyameɛ berɛ ɛhe, yeɛ sona bɔ ɔhyɛ mmenia so koso, ye kyɛfa bɔ onya fi Tuminiɛ ne berɛ ɛhe:

¹⁴Sɛ ye mma mɔ bɛsone bɛyɛ pee a, ngrandɛ noa yeɛ bɛtotɔ ɔ, yeɛ ye bosofoɛ ngonya aleɛ ngoli ngɔma bɛ ko ngoyi.

¹⁵Ye bosofoɛ bɔ bɛkɔha ne, ewue anwonyerɛ kohũ bɛ, na ye kunafoɛ mmrasua ngosu.

¹⁶Ɔboaboa ɛdwetɛ noa kyɛ mvuture, yeɛ ɔsoa ɛtena bɔ so kyɛ nnɛterɛ;

¹⁷ɔsoa bɔ so de, nakoso sona bɔ ɔtengyɛ yeɛ ɔkɔhera ɔ, sona bɔ odi be yeɛ ɛdwetɛ ne kooli ye sa ɔ.

¹⁸Osi ye sua a, nu yɛ mmerɛ kyɛ mvrɔlɔ, ɔte kyɛ asese bɔ wɛmvoɛ wasi ɔ.

¹⁹Sikaniɛ fa anwonya kɔda, nakoso ye ayieleɛ ala ɛne, sɛ ye nye te a, ye anwonya ne ɔnne berɛ ko.

²⁰Ahunundetelɛ kakyi kyɛ asue oyi fa ye, na mvrama bɔ ɔpɛ ye nwo ɔ fa ye kɔ kɔngɔen.

²¹Eyia afiteleɛ mvrama pagya ye kɔ, na ɔpra ye fi ye awuro kɔ.

²²Ɔbɔ ye kɔ bɔ onnwu ye anwumvoin ɔ, na otu amirika serɛserɛ kyɛ ɔnwati fi ye sa nu.

²³Ɔbɔ ye sa nu gua ye so, na onwunanwuna ye wɔ nekaa biala bɔ ɔkɔ ɔ.