Read Sehwi Yob 28 Bible Online

Yob 28 - Sehwi bible

Yob 28

¹“Amba, nekaa bɔ betu ɛdwetɛ ɔ wɔ berɛ, yeɛ nekaa bɔ benwunzi sikaa kɔkorɛ ɔ koso wɔ berɛ.

²Betu buralɛ aseɛnwo, na nyɔboɛ yeɛ behuro ye bɛyɔ kɔɔbere ɔ.

³Sona sɔ kanea maa otu awosii bo, ofu kumaa maa ɔkɔ kuronguronn, na odwu kɔpena nyɔboɛ wɔ awosii kabii ne anu.

⁴Otu ngono wɔ bɔnza bɔ ombingye kuro sona atenaleɛ ɔ nu, sona biala mbɛ nu berɛ, na besinze nu dɔ, nekaa bɔ sona biala nne berɛ ɔ.

⁵Aseɛ nu yeɛ aleɛ fi ba ɔ, nakoso aseɛ bo dɔ de, ɔte kyɛ see bɔ bahua ɔ.

⁶Aseɛ nu nyɔboɛ yeɛ benya nyɔboɛ bɔ bɛfrɛ ye safire ɔ, na ye mvuture nu yeɛ benya sikaa kɔkorɛ ɔ.

⁷“Sɔ atee ne, anomaa bɔ ɔkye ngaka di biala nze, yeɛ ɛpɛtɛ biala nye ɔppɛle so.

⁸Kaka aboyaa biala, ye gya baa ottiale so, yeɛ gyata koso ɔffale so le.

⁹“Kuro sona dwudwa twerɛboɛ ne anu, na ofumvu mmokaa mɔ bo odwiri bɛ gua.

¹⁰Ɔpakyepakye atee gua nyɔbotaen mɔ nu, na ye nye nwu nyɔboɛ biala bɔ ɔte sikaa ɔ.

¹¹Otuatua asue mɔ bɛ ti bɔ ɔmma bemmu mva so ɔ, na nikyee bɔ wafea ne, ɔye ba petee nu.

¹²“Nakoso nisua yeɛ nworɛ ɔwɔ bɔ yɛkonwu ye ɔ? Yeɛ nimdeɛ koso, nisua yeɛ ɔwɔ ɔ?

¹³Kyɛbɔ ye nwo si le mvasoɛ ne, kuro sona nze, yeɛ bennwu ye wɔ ateasefoɛ aseɛ so.

¹⁴Aseɛ bo dɔ buma nwa: ‘Ɔnne me nu,’ yeɛ ɛpo wora ɔnwa: ‘Ɔnne me berɛ.’

¹⁵Ɛngɔhora ngɔfa sikaa kɔkorɛ ngɔtɔ, yeɛ ɛngɔhora ngɔkari ɛdwetɛ ngotua ye kerɛ.

¹⁶Ɛngɔhora ngɔsese ye nyɔboɛ wɔ Ofire sikaa kɔkorɛ nu, anaa nyɔboɛ bɔ bɛfrɛ ye onike anaa Safire koso nu.

¹⁷Esikaa kɔkorɛ ne neanu, bɛ ne ye nzɛ, yeɛ ɛngɔhora ngɔfa sikaa kɔkorɛ mbembenanneɛ ngɔsesa ye.

¹⁸Nyɔboɛ nahanaha ne nyɔboɛ hyɛnhyɛnn po, yɛngɔhora ngɔfa bɛ ngɔtoto ye nwo, ofikyɛ nworɛ nwo le mvasoɛ tra agudeɛ.

¹⁹Yitiopia nyɔboɛ bɔ bɛfrɛ ye krisolite ne, ɔne nworɛ bɛnzɛ, yeɛ ɛngɔhora ngɔpɛ ye nyɔboɛ wɔ sikaa kɔkorɛ nu.

²⁰“Nzaade nisua koraa yeɛ nworɛ fi ɔ? Yeɛ nimdeɛ koso, nisua yeɛ ɔwɔ ɔ?

²¹Bafa bafea bɔ ateasefoɛ amukoraa bɛ nye nnwu ye ɔ, yeɛ bakata so bɔ ewienu nnomaa bennwu ye ɔ.

²²Abadɔn ne Ewue bɛnwa: ‘Yate ye nwo dwirɛ wɔ yɛ so anu.’

²³“Nyameɛ yeɛ ɔse nworɛ atee ɔ, na ye yeɛ ɔse nekaa bɔ ɔwɔ ɔ.

²⁴Ofikyɛ ɔto ye nye nea aseɛ ye ti kɔka ye ti, na onwu nikyee biala bɔ ɔwɔ ewienu bo ɔ.

²⁵Mmerɛ bɔ ɔhyehyɛle kyɛbɔ mvrama nu nonɛ osi te ɔ tole berɛ, ɔne kyɛbɔ nzue somaa si te ɔ tole berɛ;

²⁶mmerɛ bɔ ɔyɔle nhyehyɛleɛ tole berɛ mane esue, ná ɔpɛle atee tole berɛ mane agralaa ne,

²⁷ɔneane nworɛ, na ɔfa tole dwaa. Ɔse nworɛ ye ti ne ye ti, amba, na ɔmaa otindimuni.

²⁸ Na osele kuro sona kyɛ, ‘Tie, nworɛ ole kyɛ ekosuro AWURADE ɔ, yeɛ nimdeɛ ole kyɛ ɛkɔhwe wɔ nwo kofi bɔne nwo ɔ.’ ”