Read Sehwi Yob 29 Bible Online

Yob 29 - Sehwi bible

Yob 29

¹Yob sa toale ye dwirɛ ne aso sele kyɛ,

²“Oo, me tebea bɔ nwɔ nu ye, sɛ ahaa ɔte kyɛ me daa ne ala a, sɛ ɔte kyɛ mmerɛ bɔ né Nyameɛ nea me so ne a!

³Mmerɛ bɔ né ye kanea ta wɔ me ti so, bɔ né mefa ye kanea menate awosii nu ne;

⁴kyɛbɔ né nde wɔ me mmerandeɛ nu ne, mmerɛ bɔ né Nyameɛ ɔbɔ me tena sua nwo waen ne;

⁵mmerɛ bɔ né Tuminiɛ ne ogyi me si ne, bɔ né me mma bapɛ me nwo bayia ne;

⁶mmerɛ bɔ né m’anwonya wabu me so tam ne, bɔ né olive ngoo pu fi nyɔbotaen nu kyɛ asue ma me ne.

⁷Mmerɛ bɔ né ɔyɛ a mekɔ kuro berɛ pambim ne anu, bɔ né ɔyɛ a metena mbanyi bia so wɔ nekaa bɔ bɛbɔ dwaa ne,

⁸sɛ né mmerandeɛ nwu me a, begyina ahameɛ, yeɛ mbanyi bɔ bɛ nye afi koso bedwɔso begyina berɛ;

⁹kuro berɛ mbanyi ka bɛ noa to nu, na bɛfa bɛ sa bɛto bɛ noa.

¹⁰Né ɔyɛ a kuro berɛ mbanyi bɛyɛ konn, na bɛndɛ bɛ noa nu.

¹¹Asoɛ biala bɔ ɔtele me noa dwirɛ ne, oyirale me, yeɛ anyeɛ biala bɔ onwuni me ne koso, ɔyɛle me mmo;

¹²ofikyɛ mmokale mmenia bɔ bɛyɛ anwumvo bɔ besu bɛpena mmokalɛ ɔ, ɔne awisiafoɛ bɔ belle bokafoɛ ɔ.

¹³Mmenia bɔ né bɛwɔ anwokyere piri paa nu ne, beyirayirale me, na mmane akunafoɛ mmrasua bɛ wora kyekyele.

¹⁴Mvale nahorɛlilɛ ngerale, na ɔyɛle me tena, na me ndɛenbualɛ turoloo yɛle kyɛ m’ataadeɛ aguasoɛ ne m’abotire.

¹⁵Mvale me nwo nyɛle anyeɛ mane anyesiniwaafoɛ, yeɛ mvale me nwo nyɛle agyirɛ mane mmubuafoɛ.

¹⁶Nyɛle bɛ bɔ bɛyɛ anwumvo ɔ bɛ baba, na ngane bie mane ɛwɔfoɛ bɔ menze ye ɔ.

¹⁷Mmubuli amumuyɛɛniɛ ye gye so, na naen bɔ wafa ye gye watira ye nu ne, mmaa ɔyakyili ye nu.

¹⁸Yeɛ ngane kyɛ, ‘Me ngyẽa kɔsone pee kyɛ anweaa, na ngɔto me kɔme ngowu wɔ m’awuro.

¹⁹Me ndii hɔle alaa oodwuli nzue nu, na bosue tɔ guale me mmaen mɔ so kɔngɔen amukoraa.

²⁰M’animnyam hɔle so yɛle frɔmfrɔm, na m’agyaen bɔ otira me sa nu ne, ɔhɔle so yɛle monɛ.’

²¹“Mmenia nwondɛle betiele me noa dwirɛ, na bɛyɛle konn betiele me foɛtulɛ ne.

²²Sɛ né medwudwo meyie a, bendwudwo ko, ofikyɛ né me dwirɛ ne ɔtɔ bɛ so anu.

²³Bɛnwondɛle me kyɛbɔ sona nwondɛ esue ɔ, na bebukyele bɛ noa nu belele edwirɛ ne, kyɛ ebiaa bokyisue ahɔ ɔ.

²⁴Sɛ b’anyelasoɛ yie a, né mesere mekyire bɛ, na me nyunu sereserelɛ ne hyɛle bɛ nguraen.

²⁵Nyɛle bɛ so panyi, ngyirele bɛ ate, na me ne bɛ yɛtenane kyɛ ɛhene bɔ ɔne ye lɔen bɛte ɔ, kyɛ ebie bɔ ɔkyekye mmenia bɔ bedi aworabɔlɛ ɔ bɛ wora ɔ.