Read Sehwi Yob 3 Bible Online

Yob 3 - Sehwi bible

Yob 3

¹ Ɛhe asi ne, Yob bukyele ye noa nomale ye krakyẽa.

²Yob hane kyɛ,

³“Kyẽa bɔ bɛwole me ne, sɔ kyẽa ne ótu mini, ɔne kɔngɔen bɔ bɛhane kyɛ, ‘Banwonzɛ baa bienzua’ ɔ.

⁴Awosii to sɔ kyẽa ne! Nnɛma Nyameɛ fi anwuro kaye ye, yeɛ nnɛma kanea ta so.

⁵Awosii tunn ne awosii kabii ómundu so. Munungum ɔ́kata so, alehyeleɛ bɔ ɔkakyi awosii ne, ówunanwuna ye.

⁶Sɔ kɔngɔen ne, awosii kabii ɔhye ye! Afoɛ nu ngyẽa ne, nnɛmaa bɛka ye bɛboka so, yeɛ bosome mɔ nu ngyẽa ne, nnɛmaa ɔboka so.

⁷Sɔ kɔngɔen ne, ɔyɛ bɔfonn, nnɛmaa bɛte komviɛ bɔ ɔte anigye wɔ nu.

⁸Bɛ bɔ bɛnoma alehyeleɛ ne, maa bɛnoma ye, bɛ yeɛ bɛnoma ɛlɛngyɛen suronyisuronyi maa odwɔso ɔ.

⁹Awosii to ye alebahyene nzramaa mɔ, ɔkɔpena kanea si atee, nakoso ongonya bie, nnɛma ye nye nwu ngyerɛmɔ kanea,

¹⁰ofikyɛ wandua me ni awodeɛ ye noa ate, bɔ ɔnate so wamaa menwu amaneɛ ɔ.

¹¹“Nzu ati yeɛ ewue amva me wɔ me ni akunu ɔ? Ɔwale ye sɛ bɔ manwu wɔ awoleɛ ɔ?

¹²Nzu ati yeɛ nangoroma ebie maa bɛwole me bɛtole so ɔ? Nzu ati yeɛ nyane nyɔfone nnone ɔ?

¹³Sɛ nwuli a, ahaa mala berɛ konn, ah, ahaa malafe, bɔ mede me nwome ɔ;

¹⁴ahaa me ne ɛhemɔ: ewiase ahemvo ne foɛtulɛfoɛ, bɔ besisili sua maa wabubu wagua ɔ,

¹⁵anaakyɛ me ne atitirefoɛ bɔ bɛ sa nu le bie ɔ, bɛ bɔ bɛfa ɛdwetɛ beyi b’awuro tɛkyɛ ɔ.

¹⁶Anaakyɛ, nzu ati yeɛ banzie me kyɛ baa bɔ bapɔ ye ɔ, kyɛ baa bɔ wawu oni akunu ɔ?

¹⁷Ɛborɔ dɔ de, amumuyɛɛfoɛ bɛnha ebiala ko, na dɔ de, bɛ bɔ bafɛ ne bede bɛ nwome.

¹⁸Berɛ de, kukunufoɛ amukoraa bɛ so anu atɔ bɛ, bɛnde mmenia bɔ bɛhyɛ bɛ so maa bɛyɔ adwuma ɔ bɛ nga.

¹⁹Berɛ de, atitirefoɛ ne kwahweabaa mɔ bɛwɔ berɛ, na ngangafoɛ banya fawɔnwodi bafi bɛ mene mɔ sa nu.

²⁰“Sona bɔ ɔyɛ anwumvo ne, nzu ati yeɛ ɛma ye kanea, ná ɛma bɔ odi aworabɔlɛ onya ngoa ɔ?

²¹ Bɛ yeɛ bɛnwondɛ ewue, nakoso ɔmma ɔ, bɛ yeɛ bɛpena ewue bɛtra agyapadeɛ bɔ bafa bafea ɔ,

²²bɛ yeɛ bewu a bɛ nye gye paa ɔ, bɛ yeɛ besie bɛ a, benya anika ɔ.

²³Sona bɔ ye atee amini ne, nzu ati yeɛ ɛma ye kanea ɔ, mekyire sona bɔ Nyameɛ amaa wali amia ne?

²⁴Me suɛ akakyi m’aleɛ, yeɛ me penelɛ wayɛ kyɛ nzue bɔ behwie begua ɔ.

²⁵Nikyee bɔ mesuro ye paa yeɛ ɔba me so ɔ, yeɛ bɔ ɔma me nwo ngaka nwati ne yeɛ ɔto me ɔ.

²⁶Me nwo ndɔ me, mennya asomdwee, mennya me nwome menne, na mmom amaneɛ yeɛ ɔto me ɔ.”