Read Sehwi Yob 30 Bible Online

Yob 30 - Sehwi bible

Yob 30

¹“Afei de, me sa nu ngwadaa mmaa mmaa yeɛ bɛgoro me nwo ɔ, na bɛ se mɔ po, ahaa né mebu bɛ kyɛ bɛmvata kyɛ bɛ ne ngyea bɔ bɛnea me mmoaen so ɔ bɛbɔ nu bɛyɔ adwuma ɔ.

²Mvasoɛ beni yeɛ ahaa ngonya ye ngofi b’anwoserɛ nu ɔ? Bɛte mmenia bɔ b’anwoserɛ ayie ɔ.

³Ehiaa ne ɛhɔen amaa batwindwam, wamaa bekyinikyini ɛserɛ so, aseɛ bɔ nikye fee nne so ɔ so.

⁴Bɛtete nyaa weewee wɔ eburo, na mmakaa bo ndii yeɛ ɔte b’aleɛ ɔ.

⁵Bapɛ b’asue bafi mmenia nu, na behute bɛ kyɛ awuefoɛ.

⁶Bɔnza noa ngumaa nu yeɛ bɛtete ɔ, bɛtete bɔen ne nyɔbotaen nu ngumaa nu.

⁷Besu wɔ mvofoen bo kyɛ ngaka, na bapeepee so wɔ ndetema bo.

⁸Bɛte mmenia mbaen bie bɔ bɛnze nworɛ ɔ, na batu bɛ bafi aseɛ ne aso.

⁹“Afei de, bɛgoro me nwo bɛfa me bɛto dwein, na makakyi bɛ noa nu ngorohoɛ dwirɛ.

¹⁰Bekyi me, bɛnga bɛmma me nwo; bɛ nye bɔ me nyunu a, bɛfefe nwɔserɛ.

¹¹Ofikyɛ Nyameɛ asangye m’agyaen nyamaa nu wabrɛ me ase, na edwirɛ bɔ bekuro biala yeɛ bɛfa bedi me ɔ.

¹²Ɛlɔen patapaafoɛ badwɔso batia me wɔ me famaa so, besua ngaen wɔ m’atee nu, na badwɔso me so bɛpena me beku me.

¹³Betua me atee, bɛpena me ne asefinɛ, bɔ ebiala nga kyɛ bɛyakyi ɔ.

¹⁴Baha me bamia bɔ bɛba me so ɔ, bɛba me so anyeborolɛ so.

¹⁵Ahunundetelɛ atɔ me so, bama m’anidie abɔ me kyɛ nikyee bɔ mvrama ɔbɔ ye kɔ ɔ, na m’anwonya atu amini kyɛ munungum.

¹⁶“Afei de, me kra anwati afi me nwo, amaneɛnwunɛ mmerɛ yeɛ matɔ nu ɔ.

¹⁷Odwu kɔngɔen a, me mmowue nu tutu me, na me nwo tutulɛ ne ɔndɔ me.

¹⁸Wapari wasɔ m’ataadeɛ nu, na wasɔ m’ataadeɛ ne kɔme wafa wamia me.

¹⁹Wafindi me wato asaa nu, na makakyi kyɛ mvuture ne nzoen.

²⁰O AWURADE, mesu mefrɛ wɔ a, ɛndɛ me so; meba wɔ nyunu a, ɛnea me haa mbaen.

²¹Ama wɔ ti anu ayɛ se wɔ me so, na ɛfa wɔ tumi piri ne ɛtane me nye.

²²Ɛpagya me sie mvrama so maa ɔfa me kɔ, na ɛfa me kyinikyini wɔ mvrama piri nu.

²³Amba, mese kyɛ ɛkɔfa me kɔhɔ ewue nu, awuro bɔ ebiala bɔ ɔte ase ne, ɔkɔhɔ nu bie ne anu.

²⁴“Sona bɔ ɔyɛ anwumvo ne, sɛ osũ pena mmokalɛ wɔ ye amaneɛnwunɛ nu a, onni kyɛ ebiala bɔ ye atianuserɛ.

²⁵Bɛ bɔ né bɛwɔ amaneɛ nu ne, aso manzu mamma bɛ? Bɛ bɔ bɛyɛ anwumvo ne, aso bɛ ti me kra anni aworabɔlɛ?

²⁶Ahaa né mepena asetena paa, nakoso bɔ ɔtte mayee yeɛ wato me ɔ; ahaa né me nye la kanea ate, nakoso awosii yeɛ wato me ɔ.

²⁷Me kunu tete me, na ɔnyakyi; daa biala, m’amaneɛ toatoa so.

²⁸Nna eyia yeɛ wamaa mapini ɔ, na mmom aworabɔlɛ ɔ, na megyina badwa nu mesu mepena mmokalɛ.

²⁹Makakyi ɛserɛ so kyea oliɛma, ɔne soholi abiɛngo.

³⁰Me nwonaen apini bɔ ɔwɔngyewɔngye gua ɔ, na me mmowue nu dɔ yerayera me.

³¹Me sangoo ɔbɔ aworabɔlɛ dwein ngome, yeɛ m’awɛen ohu mmenia bɔ besu ɔ bɛ dwein ngome.