Read Sehwi Yob 31 Bible Online

Yob 31 - Sehwi bible

Yob 31

¹“Me ne me nye yayɛ apam, nzu ati yeɛ brasua bɔ onnwuni biaa le ne, odi kyɛ menea ye wɔ ehurolɛ atee so ɔ.

²Kyɛfa beni yeɛ ngonya ye ngofi Anwuro Anwuro Nyameɛ berɛ ɔ? Nzikyɛ agyapadeɛ yeɛ ngonya ye ngofi Tuminiɛ bɔ ɔwɔ anwuro ne berɛ ɔ?

³Mmenia bɔ bɛndengyɛ ne, aso nna bɛ yeɛ edwirɛ to bɛ ɔ, aso nna amumuyɛɛfoɛ yeɛ asane to bɛ ɔ?

⁴Aso onnwu nikyee biala bɔ meyɔ ɔ, aso ɔnga agyirɛ biala bɔ metu ɔ?

⁵“Sɛ mama me bra ayɛ kanda bra, ɔne kyɛ mama me nwo ayɛ nyera mabɔ nnakannaka bra a,

⁶nzaade Nyameɛ, kari me wɔ tonyi bɔ ɔka nahorɛ turoloo ɔ so, na ekonwu me nahorɛlilɛ ne.

⁷Sɛ mali nahorɛ atee ne anwo makyebu, sɛ mama me nye adiedie m’adwene wahɔ akɔnnɔ tɛɛ nu, sɛ me sa nwo agua fiɛ a,

⁸ye de maa nnua ma sona foforɛ oli, yoo, ye de ma me bosofoɛ bɛ boso onua.

⁹“Sɛ brasua bie nwo akɔnnɔ wawura m’adwene nu, sɛ maatetɛ mmiɛngo bienzua manea mmerɛ bɔ okofi ye awuro kofite kɔhɔ a,

¹⁰ye de ma me ye osi bienzua foforɛ aburoo, maa mmienzua biemɔ bebutu ye so.

¹¹Sɛ mabɔ sɔ bra ne a, ahaa ye de ɔte musue piri, ahaa ye de ɔte nzɛmmɔne piri paa wɔ mbanyi nyunu;

¹²ofikyɛ ahaa ye de ɔte see bɔ ɔyera alaa kodwu Abadɔn ɔ, ahaa ɔkɔyera me fieso nningyein amukoraa kotu ye bo.

¹³“Sɛ mabu me nye magua m’akoaa anaa m’afaneɛ dwirɛ so, wɔ mmerɛ bɔ bɛbɔle me somoɛ hɔ a,

¹⁴ye de sɛ Nyameɛ fa sɔ dwirɛ ne si me nyunu a, ngɔyɛ ye sɛ? Sɛ ɔtena edwirɛ ne aso kyɛ odi a, ngɔye me noa sɛɛ?

¹⁵Ye bɔ ɔbɔle me tole me ni akunu ne, aso nna ye ala yeɛ ɔnwone yɛ tole yɛ ni mɔ akunu ɔ?

¹⁶“Bɛ bɔ bɛyɛ anwumvo ne, aso mafa bɔ behia ɔ mabɔ bɛ atianuserɛ, anaa mama akunafoɛ mmrasua bafa bɛ nye bato me so mbaen?

¹⁷Anaakyɛ, mayɛ angomedi, bɔ nyisiaafoɛ banni aleɛ ne bie ɔ?

¹⁸Ofikyɛ, ofi me ngwalaa nu yeɛ manea nyisiaafoɛ mayɛ kyɛ bɛ se ɔ, na mahyire akunafoɛ mmrasua ate ofi kyɛ bɛwole me ɔ.

¹⁹Sona beni yeɛ manwu ye bɔ ye nwo la so maa ɔpena wu, anaa ehianiɛ bɔ ataadeɛ abɔ ye ɔ,

²⁰bɔ wamvi ye ahone nu wanyirayira me ɔ; ɔnate kyɛ mama ye kundu bɔ mafa me mmoaen nwo nwiaa manwo mama ye nwo ayɛ ahye.

²¹Sɛ ɔnate kyɛ ndɛenbualɛfoɛ begyi me si ti, matengyɛ me sa wɔ ayisiaaniɛ so manwunanwuna ye a,

²²ye de ma m’awaen otu fi me bati ɔpa tɔ, ye de ma me sa bo otu fi me batwɛ.

²³Ofikyɛ né mesuro kyɛ Nyameɛ kɔma musue kɔto me ɔ, yeɛ ahaa mengɔhora ye animnyam ne anyunu gyina.

²⁴“Sɛ mafa me wora mawura sikaa kɔkorɛ nu, ná mahã mahyire sikaa kɔkorɛ paa kyɛ, ‘ɛte m’anyelasoɛ;’

²⁵sɛ mvale m’anwonya pee ne nduli me nwo, anaakyɛ nhoahoale me nwo kyɛ me sa nu le bie;

²⁶sɛ mato me nye manea eyia bɔ ɔbɔ ɔ, anaa ɛsraen bɔ wata hyireinn bɔ ɔkɔ ɔ;

²⁷maa badiedie me maa masɔne bɛ, maa mabɔ me ti ase masɔne bɛ a,

²⁸ye de, ɛhe koso ɔte bɔne bɔ ndɛenbualɛfoɛ kɔhwe me so wɔ ye nwo ɔ, ofikyɛ, né nzaade manni nahorɛ mamma Nyameɛ bɔ ɔwɔ anwuro ne.

²⁹“Sɛ me nye agye kyɛ me pɔfoɛ onwu amaneɛ, anaa wayɛ me fɛ kyɛ musue ato ye a,

³⁰(Mamva me noa manga edwirɛ bɔ ɔte bɔne, yeɛ mamva manwa ye amoen kyɛ owu);

³¹yiti m’awuroama banga ye le kyɛ, ‘aso ebie wɔ berɛ bɔ ɔmaa ɔhɔle bɔ wamma ye ko anyi ɔ?’

³²Ɛwɔfoɛ biala anna dwaaso, mabukye m’anoa mato berɛ mama ateetulɛfoɛ.

³³Sɛ makata me mmeraatolɛ so kyɛbɔ adasa yɔ ne, bɔ mafa m’amumuyɛɛ mafea me ti anu,

³⁴ɔnate kyɛ né mesuro mmenia worawora ne, yeɛ né mesuro kyɛ mmusua mmusua mɔ kobu me animtia, yiti ɔmaa nyɛle konn, na mamvite aluo.

³⁵O, sɛ ahaa nyane ebie bɔ okotie me dwirɛ ye bie kɔma me a! (Tie, ɛhe yeɛ osi me dwirɛ ne aso agyinayɛɛ ɔ! Mepena kyɛ Tuminiɛ ne ɔma me mmuayɛɛ!) O, ahaa né me kwaadubɔlɛniɛ ne wahyerɛ kwaadu bɔ wafa wabɔ me ne!

³⁶Ahaa ngɔfa ngɔto me kɔme anwo, ahaa ngɔfa ngopuro me ti kyɛ abotire;

³⁷ahaa ngɔhã bɔ mayɔ amukoraa ngohyire ye, ahaa ngɔhɔ ye nyunu kyɛbɔ ɛhene kɔ ye nyunu ɔ.

³⁸“Sɛ m’aseɛ asu agua me so, yeɛ sɛ ye ngofie babɔ nu basu;

³⁹sɛ mali so aleɛ bɔ mandua kerɛ, yeɛ sɛ mamaa bahu ye mene mɔ a,

⁴⁰ye de, nnɛma atokoɔ fifi so, na mmom ma mmowue, nnɛma ayuo fifi so, na mmom ma ndetema.” Yob noa ape.