Read Sehwi Yob 32 Bible Online

Yob 32 - Sehwi bible

Yob 32

¹Yiti sɔ mmienzua nza nemɔ bamma Yob mmuayɛɛ ko, ofikyɛ né Yob bu ye nwo kyɛ ɔtengyɛ.

²Yeɛ Elihu, bɔ ɔse ole Businiɛ Barakɛl, bɔ ofi Ram abusua nu ne, ɔfɛle yaa ɔ. Ɔfɛle Yob so yaa, kyɛ wabua ye nwo be, ná wammua Nyameɛ mmom be ɔ.

³Ye ahone huli Yob nnamvo nza nemɔ koso so, kyɛ bangora banye Yob dwirɛ ne noa ɔ, nakoso babua ye fɔ ɔ.

⁴Elihu nwondɛle mane Yob dwudwo yiele koraka, ofikyɛ né bɛtra Elihu panyi.

⁵Nakoso mmerɛ bɔ Elihu nwuni kyɛ mmenia nza ne bannya edwirɛ ne anwo mmuayɛɛ biala ne, ɔfɛle yaa.

⁶Na Elihu, bɔ ɔse ole Businiɛ Barakɛl ne, obuale ye nwo bie kyɛ, “Nnyini, na ɛmɔ de, ɛmɔte mbanyi, na ɛhe yeɛ né ɔmaa mesuro bɔ yiti ngane me noa ndole nu, bɔ ɔmaa mangyire m’adwene ɔ.

⁷Nzusuli ye nwo kyɛ, ‘Ma mbanyi mɔ bedwudwo, ná ma bɛ bɔ bɛ nye afi ne behyire bɛ nworɛ.’

⁸Nakoso sunzum bɔ ɔwɔ sona nu ne, Tuminiɛ ne, ye nwomeɛ bɔ ɔwɔ sona nu ne yeɛ ɔma sona nwu nworɛ ɔ.

⁹Nna enyinɛ ngome yeɛ ɔma sona nwu nworɛ ɔ, yeɛ nna mbanyi mɔ ngome yeɛ bele edwirɛ bɔ ɔte turoloo nwo nimdeɛ ɔ.

¹⁰Yiti menwa: ‘Ɛ́mɔtie me, Me koso ngohyire m’adwene.’

¹¹“Ɛ́mɔtie! Manwondɛ toonn mama ɛmɔadwudwo bayie, ndiele ɛmɔ nworɛ dwirɛ ne, wɔ mmerɛ bɔ né ɛmɔdwenedwene ye nwo bɛpena edwirɛ bɔ ɛmɔkɔha ɔ.

¹²Nyɛle asoɛ ndiele ɛmɔ, na nwuni kyɛ, ɛmɔ nu biala nne berɛ bɔ ɔhora kobu guale Yob so ɔ, yeɛ ɛmɔ nu biala wangora ye dwirɛ ne noa ye.

¹³Yiti nnɛma ɛmɔka kyɛ, ‘Yanwu nworɛ; nna sona, na mmom Nyameɛ yeɛ okobua Yob fɔ ɔ.’

¹⁴Nna me yeɛ Yob aha dwirɛ watia me ɔ, yiti mengɔfa ɛmɔ mmuayɛɛ ne bie mengobua ye.

¹⁵“Edwirɛ ne abɔ bɛ, belle mmuayɛɛ biala ko, bɛ noa nu dwirɛ ayie.

¹⁶Na afei de bɔ bamua bɛ noa ye, begyigyi berɛ bɔ yeɛ bemmua ye nwo bie ye, yiti odi kyɛ me koso mɛkɔ so menwondɛ anaa?

¹⁷Me koso ngɔma me mmuayɛɛ deɛ, me koso ngohyire m’adwene.

¹⁸Ofikyɛ edwirɛ bɔ mebaaha ne, ɔsone paa, na sunzum bɔ ɔwɔ me nu ne yeɛ ɔtwe me sa ɔ.

¹⁹Me komvi dɔ ayɛ kyɛ nzaa bɔ batua so ɔ, wayɛ kyɛ nzaa ngotoku monɛ bɔ ɔpena osua ɔ.

²⁰Odi kyɛ medwudwo ma me nwo tɔ me, odi kyɛ mebukye me noa mema mmuayɛɛ.

²¹Mengɔyɛ nyeyemuɛ biala, yeɛ mengɔhã adɛfɛdɛfɛ dwirɛ ngɔfa ebiala nwo.

²²Ofikyɛ menze kyɛbɔ besi bɛka adɛfɛdɛfɛ dwirɛ ɔ, meyɔ sɔ a, ɔngɔhyɛ né me Nyameɛ bɔ ɔbɔle me ne wapɛ me ngoa so.