Read Sehwi Yob 33 Bible Online

Yob 33 - Sehwi bible

Yob 33

¹“Yob, afei de tie me dwirɛ deɛ, ná yɛ asoɛ tie me noa dwirɛ amukoraa.

²Afei de, mebaadwudwo, temverema bɔ ɔla me noa nu ne yeɛ odwudwo ɔ.

³Me dwirɛ ne, ofi m’ahone nu turoloo, na me noa ka nahorɛ turoloo.

⁴Nyameɛ Sunzum yeɛ ɔbɔle me ɔ, na Tuminiɛ ne, ye nwomeɛ yeɛ ɔma me ngoa ɔ.

⁵Sɛ ɛkɔhora a, ma me mmuayɛɛ, dwene edwirɛ bɔ ɛkɔha ɔ nwo, ná gyina me nyunu.

⁶Nea, Nyameɛ nyunu de, nde kyɛ wɔ ala, me koso nnɛterɛ yeɛ ɔfa nwone me ɔ.

⁷Nea, nnɛma me nwo suronyi tɔ wɔ so, yeɛ mengɔma wɔ nwo ngɔhyere wɔ.

⁸“Amba, aha ama me so ate, yeɛ mate edwirɛ bɔ aha ne.

⁹Ɛnwa: ‘Me nwo te, bɔ bɔne nne me nwo ɔ; me nwo sannwuu, bɔ amumuyɛɛ biala nne me nu ɔ.

¹⁰Amba, Nyameɛ anwu me nwo mvomsoɛ, na obu me ye pɔfoɛ.

¹¹ Ɔbɔ me panwu, na ɔfa ye nye sra agyirɛ biala bɔ metu ɔ.’

¹²“Nakoso edwirɛ he anwo de, ɛndengyɛ. Na ngɔma wɔ mmuayɛɛ, kyɛ Nyameɛ te piri tra dasaniɛ biala.

¹³Nzu ati yeɛ afa wɔ dwirɛ ateta ye ɔ, bɔ ɛnwa: ‘Sɛ sona bɔ ye kwaadu a, ɔnye ye noa’ ɔ?

¹⁴Ofikyɛ Nyameɛ fa atee ko aso ɔne atee foforɛ so odwudwo, nakoso sona mma ye adwene ngɔ edwirɛ ne aso.

¹⁵ Laleɛ nu, kɔngɔen nyekyire nu, mmerɛ bɔ nnafelɛ hatee watɔ adasa so ɔ, mmerɛ bɔ bɛ nye ahɔ bɛ saa wɔ bɛ mba so ɔ,

¹⁶sɔ mmerɛ ne yeɛ odwudwo gua adasa bɛ so anu ɔ, na ɔbɔ bɛ kɔkɔ maa besuro,

¹⁷amaa ɔnate so wahwe mmenia wafi bɛ yɔleɛ nwo, ná waye bɛ wafi anwomasoɛ nu.

¹⁸Ɔnate so, ɔmma ye kra ngɔ ɛborɔ kumaa nu, yeɛ ode ye ngoa fi ngrandɛ wue noa.

¹⁹Nyameɛ maa osa fa yealɛ nu wɔ ye mba so ɔfa twe ye so, na ye mmowue nu tutu ye daa,

²⁰maa ɔnate so ye noa nu to, bɔ aleɛ bɔ ɔyɛ akɔnnɔ po ɔnyɛ ye fɛ ɔ.

²¹Ɔfɔ maa odwɔso ye sonaluwaa so, na ye nwo yeye mmowue maa afei de benwu mmowue ne.

²²Ye kra twe pingye ɛborɔ kumaa, na ye ngoa pingye ewue bɔfoɛ nemɔ.

²³“Nakoso sɛ abɔfo kamafoɛ bie gyina ye si, abɔfo bɔ ɔte apee nemɔ anu ko, bɔ ɔma sona nwu tenenee bra bɔ odi kyɛ ɔbɔ ɔ a,

²⁴onwu sɔ sona ne anwumvoin ɔka kyɛ, ‘De ye ngoa, nnɛmaa ɔkɔ ɛborɔ kumaa nu, ofikyɛ manya bɔ mefa meyɛ ye ti nyɔboɛ mede ye ngoa ɔ;

²⁵ma ye nwonaen ɔyɛ frɔmfrɔm bieku kyɛ akwadaa deɛ, ná maa osa nya anwoserɛ kyɛ ye mmerandeɛ nu ala’ a,

²⁶ye de, sɔ sona ne bɔ mbaeɛ srɛ Nyameɛ a, ode ye, ɔfa anika ba Nyameɛ nyunu, na ɔfa ye bɔne kyɛ ye maa ɔtengyɛ.

²⁷Na sɔ sona ne to dwein kyire mmenia kyɛ, ‘Nyɔle bɔne, nyɔle bɔ ɔtte mayee ɔ, nakoso wandua me so kerɛ kyɛbɔ ɔfata ɔ.

²⁸Na mmom wapepɛ wale me kra, wamma wangɔ ɛborɔ kumaa nu, na wamaa matena ngoa nu manwu kanea ne.’

²⁹“Amba, ɛhemɔ amukoraa, Nyameɛ yeɛ ɔyɔ ɔ, na ɔyɔ ye mmerɛ pee ɔma sona,

³⁰kyɛ ɔfa de ye kra fi ɛborɔ kumaa nu, amaa ɔnate so ngoa kanea ata ye so.

³¹Yob, yɛ asoɛ tie me, yɛ dinn maa ndwudwo.

³²Sɛ ele edwirɛ bie ka a, ma me mmuayɛɛ, dwudwo, ofikyɛ mepena kyɛ edi be.

³³Nakoso sɛ elle dwirɛ biala nga de a, ye de tie me e, yɛ konn maa ngyire wɔ nworɛ.”