Read Sehwi Yob 34 Bible Online

Yob 34 - Sehwi bible

Yob 34

¹Afei Elihu toale so sele kyɛ,

²“Ɛmɔ, nworɛfoɛ, ɛ́mɔtie me dwirɛ ye, nimdeɛfoɛ, ɛ́mɔyɛ asoɛ betie me,

³ ofikyɛ asoɛ oso edwirɛ nea, kyɛbɔ temverema koso tafe aleɛ nea ne.

⁴Ɛ́mɔma yɛneanea nu yɛpena bɔ ɔte nahorɛ ɔ, ɛ́mɔma yɛ bɔbɔ yɛhyire bɔ ɔte paa ɔ.

⁵Ofikyɛ Yob aha kyɛ, ‘Medi be, nakoso Nyameɛ abua me ndɛengyea.

⁶Ɔwɔ nu kyɛ me dwirɛ yɛ fɛ de, nakoso bɛnwa menga nahorɛ; bɔne nne me nu, nakoso agyaen kena koangɔ atutu me.’

⁷“Sona beni koraa yeɛ ɔte kyɛ Yob, bɔ ɔno musue dwirɛ kyɛ nzue e?

⁸Ɔne bɔnefoɛ yeɛ bɛbɔ afɛ ɔ, na ɔne amumuyɛɛfoɛ yeɛ bɛnate ɔ.

⁹Ofikyɛ ɔnwa: ‘Mvasoɛ biala nne so kyɛ sona kɔsɔ Nyameɛ nye ɔ.’

¹⁰“Yiti ɛmɔ bɔ ɛmɔte dwirɛ bo ɔ, ɛ́mɔtie me, bɔne te nikyee bɔ Nyameɛ ngɔyɔ bie le ɔ, yeɛ amumuyɛɛ te nikyee bɔ Tuminiɛ ne ngɔyɔ bie le ɔ.

¹¹ Ofikyɛ otua sona kerɛ kyɛbɔ ye yɔleɛ si te ɔ, na ɔma sona sa ka ye akatuaa, kyɛbɔ ye atee bɔ ɔnate so ɔ si te ɔ.

¹²Nahorɛ nu, Nyameɛ ngɔyɔ bɔne, Tuminiɛ ne, ongobua ndɛengyea.

¹³Aso ebie yeɛ ɔfale aseɛ wurale ye sa ɔ? Aso ebie yeɛ ɔhyehyɛle ewiase amukoraa ɔ?

¹⁴Ye sunzum ne, sɛ osa de ye nikye, ná ye nwomeɛ ne koso osa de ye nikye a,

¹⁵ahaa abɔdeɛ mukoraa bɔ bɛte ase ne, bekowu bɛkɔbɔ nu, na adasa mukoraa bekosa bɛkɔhɔ nnɛterɛ nu.

¹⁶“Sɛ ele nimdeɛ a, ye de tie sɔ dwirɛ he, yɛ asoɛ tie edwirɛ bɔ meka ne.

¹⁷Sɛ ebie kyi nahorɛlilɛ a, ɔkɔyɛ sɛɛ né wanea maen so? Yeɛ bɔ ɔtengyɛ paa tra ebiala ne, aso ebua ye fɔ anaa?

¹⁸Ye bɔ ɔka kyire ɛhene kyɛ, ‘Ɛte sona mbaen!’ ná osa ka kyire atitirefoɛ kyɛ, ‘Nzɛmmɔnefoɛ!’ ne,

¹⁹ye bɔ ɔnnea atitirefoɛ bɛ dibea, ná ommu sikafoɛ ndra ehiafoɛ ne, ofikyɛ bɛ mukoraa bɛte ye sa noa adwuma.

²⁰Bewu mvum nu, bɛ nwo wosowoso bɛ abunnamu, na ewue fa bɛ kɔ, na atitirefoɛ po, ɔye bɛ fi berɛ bɔ ɔmva sona so ɔ.

²¹“Ofikyɛ ye nye li sona atee bɔ ɔnate so ɔ si, na onwu ye agyirɛ bɔ otu amukoraa.

²²Awosii, anaa awosii kabii biala nne berɛ, bɔ bɔnefoɛ kɔfea nu bɔ ongonwu bɛ ɔ.

²³Nyameɛ nhyehyɛ mmerɛ bie ndo berɛ mma sona koraka né waagyina ye nyunu maa wabua ye ndɛen.

²⁴Bɛ bɔ betira tumi ne, otu bɛ bɔ ɔnneanea bɛ dwirɛ nu ɔ, na ɔfa mmeni foforɛ osi bɛ gya nu.

²⁵Ofikyɛ ɔse bɔ bɛyɔ ɔ, otu bɛ kɔngɔen, na ɔma b’ayieleɛ yie bɛ.

²⁶Ɔtwe bɛ so kyɛ bɔnefoɛ bɔ mmenia nye tua ɔ,

²⁷ofikyɛ bali makyebu bɔ banni ye si ɔ, na bamva ye dwirɛ ne anu biala banyɛ huu.

²⁸Bɛmane mmenia bɔ bɛyɛ anwumvo ɔ bɛ suɛ dwuli ye nyunu, na wate bɛ bɔ benwu amaneɛ ɔ bɛ suɛ.

²⁹Na sɛ ɔyɛ konn a, nwa yeɛ ɔkɔhora kobua ye fɔ ɔ? Sɛ ɔfa ye nyunu fea a, nwa yeɛ okonwu ye ɔ? Nakoso, kyɛ maen oo, kyɛ sona oo, ɔnea bɛ so,

³⁰kyɛbɔ ɔkɔyɛ ná sona bɔ onzuro Nyameɛ ɔ ngoli hene, ná wangakyi ngaen wɔ maen ne aso.

³¹“Sɛ ebie ka kyire Nyameɛ kyɛ, ‘Menwu amaneɛ, mengɔyɔ bɔne ko;

³²bɔ mannwu ye bɔ mayɔ ne, kyirekyire me, sɛ mayɔ amumuyɛɛ a, mengɔyɔ sɔ ko’ a,

³³wɔ, ɔnate kyɛ apo sɔ dwirɛ ne ati, ɛdwene kyɛ Nyameɛ kɔhwe ye so anaa? Nna me, na mmom wɔ yeɛ odi kyɛ ɛdwene ye nwo ɔ, yiti bɔ ɛse ne, ka.

³⁴Bɛ bɔ bele nimdeɛ ne, bɔ bɛkɔhã bekohyire me, yeɛ nworɛfoɛ bɔ betie me koso, bɔ bɛkɔhã bekohyire me ole kyɛ,

³⁵‘Yob dwudwo a, aba nne nu, yeɛ ye dwirɛ wora, ndeaseɛ nne nu.’

³⁶Ɔhale me ngome a, ahaa baso Yob banea maa wapem ye bo, ofikyɛ ye mmuayɛɛ bɔ ɔma ne, ɔte kyɛ amumuyɛɛfoɛ mmuayɛɛ.

³⁷Ɔnate kyɛ wafa ɛlɔenyɛlɛ wafoa ye bɔne ne aso, ɔne yɛ su aporowaa, na odwudwo worawora otia Nyameɛ.”