Read Sehwi Yob 35 Bible Online

Yob 35 - Sehwi bible

Yob 35

¹Afei Elihu toale so sele kyɛ,

²“Ɛnwa nzɛ ɔte paa ma wɔ, kyɛ ɛkɔha kyɛ, ‘Metengyɛ metra Nyameɛ’ ɔ.

³Sɛ ebisa kyɛ, ‘Nzikyɛ mvasoɛ yeɛ menya ɔ? Manyɔ bɔne ye, nzikyɛ mvasoɛ yeɛ manya ɔ?’ a,

⁴me de, ngɔma wɔ mmuayɛɛ, ɛne wɔ damvo mɔ bɔ bɛboka wɔ so ne.

⁵To wɔ nye anwuro nea, nea munungum bɔ ɔwɔ wɔ ti so anwuro anwuro dɔ ne.

⁶ Sɛ ɛyɔ bɔne a, nzikyɛ ɛhawo yeɛ ɔfa brɛ Nyameɛ ɔ? Yeɛ sɛ wɔ mmeraatolɛ yɛ pee a, nzikyɛ ɛhawo yeɛ ɔfa brɛ ye ɔ?

⁷Sɛ ɛtengyɛ a, nzikyɛ mvasoɛ yeɛ ɛfa ma ye ɔ, yeɛ nzikyɛ mvasoɛ yeɛ onya fi wɔ berɛ ɔ?

⁸Wɔ bɔne ne, mmenia bɔ bɛte kyɛ wɔ ala yeɛ ɔfa amaneɛ brɛ bɛ ɔ, yeɛ wɔ tengyɛlɛ ne koso, mmenia yeɛ benya so mvasoɛ ɔ.

⁹“Mmenia bɔ awuye, ɔnate nhyɛsoɛ worawora ti, besu bɛpena mmokalɛ, ofikyɛ bewura tumifoɛ atianuserɛfoɛ bɛ sa.

¹⁰Nakoso bɛ nu biala nga kyɛ, ‘Me Nyameɛ bɔ ɔbɔle me ne, ɔwɔ nisua? Ye bɔ ɔma edwein kɔngɔen ne,

¹¹ye bɔ ɔmaa yɛnya nimdeɛ yɛtra aseɛ so ngaka ne, ye bɔ ɔmaa yɛnwu nworɛ yɛtra ewienu nnomaa ne.’

¹²Berɛ yeɛ bɛbɔ awuye ɔ, nakoso ebiala ndɛ bɛ so, ɔnate bɔnefoɛ b’anwomasoɛ ti.

¹³Nahorɛ nu, Nyameɛ ndie esuɛ mbaen mbaen, yeɛ Tuminiɛ ne ɔmva nyɛ huu.

¹⁴Né nzaade ɔkɔyɛ sɛɛ né watie, wɔ aberɛ bɔ ɛnwa ennwu ye ɔ, wɔ aberɛ bɔ wɔ dwirɛ koso wɔ ye nyunu, bɔ ɛla so ɛnwondɛ ye ɔ!

¹⁵Afei koso, ɔnate kyɛ ɔndwe sona so wɔ ye yaafɛlɛ nu, ná onni mmeraatolɛ si pee ne ati,

¹⁶ye sɔ ati Yob bukye ye noa kekã edwirɛ mbaen mbaen, na ye dwudwolɛ worawora ne, aba nne nu.”