Read Sehwi Yob 36 Bible Online

Yob 36 - Sehwi bible

Yob 36

¹Afei Elihu toale so sele kyɛ,

²“Nya aboterɛ ma me kãa, maa ngyirekyire wɔ, ofikyɛ edwirɛ bɔ ngyi Nyameɛ gya nu meka ne, nnyiele ye ka.

³Ngohyire kyɛ me nimdeɛ ne ɔtrɛ paa, na ngɔfa ngohyire kyɛ me Nyameɛ bɔ ɔbɔle me ne ɔtengyɛ.

⁴Nahorɛ nu, nna ngondombo yeɛ mepɛ ɔ; sona bɔ ye nimdeɛ di mu yeɛ ogyi wɔ nyunu wa ye.

⁵“Tie, Nyameɛ te piri, na ommu ebiala animtia; ye ndeaseɛ tumi ne, ɔte totohyia.

⁶Ɔmma bɔnefoɛ bɛngɔ so bennya ngoa, na ɔma bɛ bɔ mmenia hyɛ bɛ so ɔ benya bɛ fawɔnwodi.

⁷Ɔnyakyi teneneefoɛ bɛ so nealɛ, ɔmaa bɛ ne ahemvo mɔ bedi bia daa, na ɔbɔ b’aba so.

⁸Sɛ bɛbɔ bɛ panwu, ná bɛfa amaneɛnwunɛ nyamaa bɛkyekye bɛ a,

⁹yeɛ Nyameɛ maa benwu bɛ yɔleɛ ɔ, ɔne b’anwomasoɛ bɔ bayɛ, bɔ ɔnate so bayɔ bɔne ne.

¹⁰Ɔmaa bɛyɛ asoɛ bɛma ye maa ɔtengyɛtengyɛ bɛ, na ɔhyɛ bɛ kyɛ bɛhwe bɛ nwo befi bɔne nwo.

¹¹Sɛ betie ye ná bɛso ye a, bɛ ngoa bɔ waha ne, oyie bɛ yé, na b’afoɛ bɔ waha ne, bedi ye anigye nu.

¹²Nakoso sɛ bandie ye a, bɛtotɔ ngrandɛ noa, na bewuwu bɔ nimdeɛ abɔ bɛ.

¹³“Bɛ bɔ benzuro Nyameɛ ne, bɛte nzɛmmɔtia, na sɛ Nyameɛ twe bɛ so po a, benzu bɛmvrɛ ye.

¹⁴Bennyi, na bebu gyein, na b’ayieleɛ yie bɛ kyɛbɔ oyie adwamanbɔlɛfoɛ ɔ.

¹⁵Sona bɔ ɔwɔ amaneɛ nu ne, Nyameɛ fa ye amaneɛnwunɛ so ode ye, na Nyameɛ nate ye amaneɛnwunɛ so maa ɔyɛ sotie ma ye.

¹⁶Wɔ koso, ɔkɔye wɔ kofi aworabɔlɛ nu, ɔkɔfa wɔ kɔhɔ nekaa bɔ anwokyere nne berɛ ɔ, na ɔkɔbɔ wɔ nwo waen, na aleɛ paa kɔyɛ wɔ poen so tɛkyɛ.

¹⁷“Nakoso wɔ de, bɔnefoɛ ndɛenbualɛ mumua yeɛ wɔ sa aha ye ɔ, na ndɛenbualɛ ne asohwenɛ yeɛ wawa wɔ so ɔ.

¹⁸Nea yé né anwonya annakalaka wɔ, yeɛ nnɛma fea-ase-ma osi wɔ nye.

¹⁹Aso w’anwonya anaa w’anwoserɛ tumi amukoraa, ɔkɔhora kole wɔ kofi w’amaneɛ nu?

²⁰Nnɛpere kyɛ alesaleɛ kɔwa ɔ, mmerɛ bɔ benua mmenia boso befi nekaa bɔ bɛwɔ ne.

²¹Nea yé! Nnɛkɔdi bɔne si, ofikyɛ ɔnate sɔ ati yeɛ amaneɛnwunɛ oso wɔ nea ɔ.

²²“Tie, Nyameɛ tumi te piri, kyerɛkyerɛniɛ beni yeɛ yɛkɔhora yɛkɔfa ye yɛkɔtoto ye nwo ɔ?

²³Kyɛbɔ osi yɔ ye nningyein ne, nwa yeɛ ɔhyehyɛle mane ye ɔ? Anaakyɛ, nwa yeɛ ɔkɔhora kose ye kyɛ, ‘Bɔ ayɔ ne, ɔtte mayee’ ɔ?

²⁴Kaye kyɛ ɛkɔkamvo nningyein bɔ ɔyɔ ɔ, bɔ adasa bɛto ye nwo dwein bɛkamvo ye ne.

²⁵Mmenia mukoraa benwu nningyein ne, ebiala ɔwɔ dededede po a onwu ye.

²⁶Tie, kyɛbɔ Nyameɛ si te piri ne, yɛngɔhora ngonwu ye ngoyie, na ye afoɛ somaa de, ɔbo sona ndeaseɛ so.

²⁷Ofikyɛ ye yeɛ ɔma nzue wewe fi aseɛ so ɔkɔ anwuro ɔ, na osongyi ye munungum so maa ɔkakyi esue,

²⁸bɔ ewienu tɔ gua ase, maa ogua sona biala so mmorosoɛ ɔ.

²⁹Kyɛbɔ osi trɛtrɛ munungum nu, ɔne kyɛbɔ osi bɔ nu kurudududu ofi nekaa bɔ ɔwɔ ne, aso ebie kɔhora kɔte ye bo?

³⁰Tie, ɔtete ye agralaa fa pɛ ye nwo bra yia, na ɔkata ɛpo ye bo dɔ paa ne aso.

³¹Ɔnate sɔ nningyein nemɔ aso yeɛ obua maen maen ndɛen ɔ, na ɔma bɛ aleɛ pee.

³²Ɔfa agralaa kata ye sa nwo, na ɔhyɛ ye maa ɔpe nekaa bɔ okuro kyɛ ɔpe ɔ.

³³Nu bɔlɛ kurudududu ne, odi ye nwo adanzeɛ, na ngaka po bɛse kyɛ mvrama piri baatu.