Read Sehwi Yob 37 Bible Online

Yob 37 - Sehwi bible

Yob 37

¹“Sɔ nikyee ne ma me kunu tete me, na m’ahone yɛ me nu dɔ kim kim kim.

²Ɛ́mɔtie, ɛ́mɔtie ye komvi bɔ ɔbobɔ nu kurudududu ɔ, ɔne nu bobolɛ bɔ ofi ye noa nu ɔba ɔ.

³Ɔbɔ nu kurudududu wɔ ewienu nekaa biala, na ɔma ye agralaa tete kodwu aseɛ ti ne ye ti.

⁴Na ɛhe asi ne, ye komvi bobɔ nu, ɔfa ye komvi totohyia ne bɔ nu kurudududu, na sɛ ye komvi ne bobɔ nu a, ɔnyakyi agralaa tetelɛ.

⁵Nyameɛ komvi bobɔ nu kurudududu maa ɔyɛ nwanwa, na ɔyɔ nningyein mbiri mbiri bɔ ɔbo yɛ ndeaseɛ so ɔ.

⁶Ofikyɛ ose asukɔtwea kyɛ, ‘Tɔ gua aseɛ so’; yeɛ ose esue bɔ ɔnyenenyene koso kyɛ, ‘Tɔ titititi.’

⁷Ɔyɔ sɔ ma sona biala yakyi adwumayɔlɛ, amaa ɔnate so mmenia bɔ wabɔ bɛ amukoraa banwu ye sa noa adwuma.

⁸Na ɔba ye sɔ a, ngaka bɛkɔ bɛkɔpena nekaa bɛfea, na bɛtena b’afealeɛ nemɔ anu.

⁹Mvrama bɔ ɔpɛ ye nwo ɔ otu fi ngwaen dɔ ba, na ɛyerɛ koso fi sorɔ dɔ ba.

¹⁰Nyameɛ nwomeɛ yeɛ ɔmaa yɛnya asukɔtwea ɔ, na ɔma nzue bɔ ɔla berɛ tɛtrɛtɛɛ ɔ kakyi asukɔtwea.

¹¹Ɔfa nzue gyina munungum nu, na ɔma ye agralaa tete fi munungum nu.

¹²Kyɛbɔ wahyehyɛ wama munungum nemɔ ne, sɔ ala yeɛ bekyinikyini bɛpɛ bɛ nwo ɔ, na bɛyɔ bɔ wahyɛ bɛ kyɛ bɛyɔ biala, wɔ aseɛ so nekaa biala.

¹³Kyɛ asohwenɛ ti ahɔ oo, anaa ye aseɛ ti ahɔ oo, anaa ye anwumvoinnwunɛ ti ahɔ oo, ɔma sɔ nningyein nemɔ besisi.

¹⁴“Yob, tie sɔ dwirɛ he; yɛ konn ná dwene Nyameɛ anwanwadeɛ nnwumaa nwo.

¹⁵Ɛse nhyehyɛleɛ bɔ Nyameɛ ayɛ wama munungum mɔ ɔ, ɔne kyɛbɔ ɔma agralaa tete fi ye munungum nu ɔ?

¹⁶Aso ɛse kyɛbɔ osi ma munungum sinze berɛ pɛpɛɛpɛ ɔ, ye bɔ ye nimdeɛ di mu ne, ye anwanwadeɛ nnwumaa ɛne?

¹⁷Wɔ bɔ mvifire te wɔ ma wɔ ndaadeɛ doa, mmerɛ bɔ ngwaen dɔ mvrama hyerɛhyerɛ ɔbɔ ma aseɛ taa dinn ne,

¹⁸aso ɛne ye yeɛ bɛtrɛtrɛle ewienu bɔ ɔhata berɛ ne, maa ɔyɛle kyɛ neanu bɔ bahuro ye maa wala ɔ?

¹⁹Maa yɛnwu bɔ odi kyɛ yɛkã yɛkyire Nyameɛ ɔ, yɛ noa nu dwirɛ ayie, ofikyɛ yɛ adwene nu mbi.

²⁰Sɛ mepena kyɛ medwudwo a, sana bɛka bekyire ye anaa? Sona beni yeɛ ɔpena kyɛ bɛhyɛ ye so ɔ?

²¹Sɛ mvrama bɔ ná opia munungum fi berɛ a, mmenia ngɔhora ngɔnea eyia bɔ ɔbɔ gyeingyein wɔ ewienu ne.

²²Animnyam bɔ ɔta kyɛ sikaa kɔkorɛ ne, sorɔ dɔ yeɛ ofi ba ɔ, na animnyam bɔ wapɛ Nyameɛ nwo wayia ne, ɔyɛ suro.

²³Tuminiɛ ne, nekaa bɔ ɔwɔ ne, yɛngɔhora ngonwu ye, ye tumi ne ye nahorɛlilɛ te piri, na ye tenenee totohyia ne ati, ommua ndɛengyea.

²⁴Ye sɔ ne ati, adasa suro ye, na ebiala bɔ obu ye nwo kyɛ ɔse nworɛ ne, Nyameɛ mva ye nyɛ huu.”