Read Sehwi Yob 38 Bible Online

Yob 38 - Sehwi bible

Yob 38

¹Afei AWURADE dwudwole fili mvrama bɔ ɔpɛ ye nwo ne anu obuale Yob kyɛ,

²“Sona beni ɛne, bɔ nimdeɛ nne ye dwudwolɛ nu, bɔ ɔfa sɛkye me nhyehyɛleɛ ye?

³Bɔ w’abɔsoɛ kyɛ bienzua, mebaabisa wɔ dwirɛ, na ye ye noa kyire me.

⁴“Mmerɛ bɔ ndole aseɛ fapem ne, né ɛwɔ nisua? Sɛ ele ye nwo nimdeɛ a, ka kyire me.

⁵Kyɛbɔ ye piri si te ne, nwa yeɛ ɔhyehyɛle tole berɛ ɔ. Ɛse anaa? Anaakyɛ, nwa yeɛ ɔtole nyamaa susuli ɔ?

⁶Ye nyinasoɛ ne, nzikyɛ aso yeɛ ogyi ɔ? Anaa, nwa yeɛ ɔtole ye ndweasoɛ nyɔboɛ ne ɔ,

⁷mmerɛ bɔ ngyerɛmɔ nzramaa mɔ bɛbɔle nu bɛtole dwein, bɔ nyameɛso ama mukoraa belili ahurusi ne?

⁸“Nwa yeɛ ɔtole ɛpo poen nu ɔ, mmerɛ bɔ ofili aseɛ kunu dɔ wale ne,

⁹mmerɛ bɔ mvale munungum nyɛle ye tena, bɔ mvale awosii kabii ngurɔle ye nwo,

¹⁰ bɔ ndole ɛwɛen kyɛ nnɛma ɔtra, bɔ nduatuale ye anoa mɔ, ná mvale buralɛ mbrambramone bɛ si,

¹¹ná ngane kyɛ, ‘Nekaa bɔ bra baadwu hɔ ɛne, nnɛtra, na ɛwa yeɛ w’asorɔkye bɔ obu fa so ne ɔkɔbɔ koodwu ɔ’ ne?

¹²“Ofi mmerɛ bɔ bɛwole wɔ ɔ, ahyɛ kyɛ alehyeleɛ ɔbra le, anaakyɛ, ahyire alebahyene mmerɛ bɔ odi kyɛ ɔba ɔ,

¹³bɔ ɔnate so wama maen nu atete fite aseɛ ti waahã ye ti, bɔ ɔma bɔnefoɛ nwati kɔfea ɔ?

¹⁴Ɔsesã ɔyɛ kyɛ ɛfaa, na ye nye yɛ kyɛ ɛtena bɔ bawura ye ayire ɔ?

¹⁵Kanea ma bɔnefoɛ bɛ nwo kyere bɛ, na obu b’aba nu bɔ ɔmma benni nzɛmmɔne ɔ.

¹⁶“Nekaa bɔ ɛpo nzue opu fi ba ne, awura berɛ le? Ɛpo ye bo dɔ buma kuronguronn ne, anate berɛ le?

¹⁷Ɛborɔ atee pambim ne, aso ebie aye ahyire wɔ le? Anaa, ɛborɔ dɔ awosii kabii ye pambim ne, anwu ye le?

¹⁸Kyɛbɔ aseɛ tɛtrɛtɛɛ osi te ne, aso ɛte ye bo? Sɛ ɛse ɛhemɔ amu a, kã e!

¹⁹“Kanea ye atenaleɛ ne, ye atee wɔ ni, yeɛ awosii koso, nisua yeɛ ɔte ɔ?

²⁰Ɛkɔhora kɔfa bɛ kɔhɔ nekaa bɔ bɛwɔ ɔ, anaa, ɛse atee bɔ bɛfa so bɛkɔ nekaa bɔ bɛwɔ ɔ?

²¹Yeɛ ɛse! yoo, ofikyɛ mebɔ bɛ ne, yeɛ né bawo wɔ, na ali afoɛ pembepembe!

²²“Nekaa bɔ mesie asukɔtwea ne, ahɔ berɛ le, yeɛ nekaa bɔ mesie asukɔtwea ne, anwu ye le,

²³bɔ bɛte nningyein bɔ mafa masie mefa menwondɛ amaneɛnwunɛ mmerɛ, ngondii ne koɛ kyẽa ne ɔ?

²⁴Nekaa bɔ kanea ofi bɔ ɔta ne, ɛse ye atee, anaa nekaa bɔ eyia afiteleɛ mvrama ofi ɔbɔ ɔkɔ aseɛ so amukoraa ne, ɛse ye atee?

²⁵“Atee bɔ esue fa so ɔtɔ gua ase titititi ne, ɔne atee bɔ agralaa ɔfa so bɔ nu kurudududu ne, nwa yeɛ ɔpakyele tole berɛ ɔ,

²⁶kyɛ ɔma esue tɔ gua aseɛ bɔ sona nne so ɔ so, ɔne ɛserɛ so bɔ sona fee ɔtte so ɔ so,

²⁷kyɛ ɔma aseɛ katerepee ne aseɛ mbaen benya nzue bɛno, ná ɔma aseɛ fifi ndire ɔ?

²⁸“Aso esue ole baba? Bosue bɔ ɔpepe gua ne, nwa yeɛ ɔwole ye ɔ?

²⁹Nwa akunu yeɛ asukɔtwea fi wale ɔ, yeɛ nyameɛso asukɔtwea ne, nwa yeɛ ɔwole ye ɔ?

³⁰Nzue kyengye yɛ kyɛ nyɔboɛ, yeɛ buma kuronguronn ye nye kyengye yɛ asukɔtwea.

³¹ “Aso ɛkɔhora kɔkyekye Akɔtaen-ne-ye-mma nzramaa kɔbɔ nu, anaakyɛ ɛkɔhora kɔsangye nzramaa kure bɔ ɔwɔ ewienu afia ne?

³²Ɛkɔhora kɔma alehyeleɛ nu nzramaa mɔ bɛkɔwa ewienu wɔ mmerɛ bɔ ɔsɛ kyɛ bɛba ɔ, anaa sorɔ dɔ nzramaa ɔne ye mma bɔ bapɛ ye nwo bayia ne, ɛkɔhora kohyire ye atee?

³³Ɛse nhyehyɛleɛ bɔ ɔwɔ ewienu ɔ? Ɛkɔhora kɔfa bɛ nhyehyɛleɛ ne kɔwa aseɛ ye aso?

³⁴“Ɛkɔhora kɔtea nu kɔhyɛ munungum kɔma esue kandinga kɔtɔ kogua wɔ so?

³⁵Ɛkɔhora kɔsoma agralaa mɔ maa bɛkɔtete, maa bekose wɔ kyɛ, ‘Yɛ ɛhe’ anaa?

³⁶Nwa yeɛ wafa nworɛ wawura sona ti anu ɔ, anaa, nwa yeɛ wama sona adwene nimdeɛ ɔ?

³⁷Nwa yeɛ ɔkɔhora kɔfa ye nworɛ kɔha munungum mɔ konwu bɛ somaa ɔ? Ewienu nzue bua nemɔ, nwa yeɛ ɔkyeakyea bɛ ma nu nzue hwie gua,

³⁸wɔ mmerɛ bɔ mvuture aboaboa ye noa wayɛ esire ná aseɛ koso wayɛ katerepee ɔ?

³⁹“Ɛkɔhora kɔpena gyata beleɛ ye noa aleɛ kɔma ye, anaa ɛkɔhora kɔma gyata akrɔngrɔma mɔ bɛ ko koyi

⁴⁰wɔ mmerɛ bɔ bebutubutu b’afealeɛ nu, anaa bɛtɛ wɔ sosorɛ bo ɔ?

⁴¹Nwa yeɛ ɔpena adene noa aleɛ ma ye ɔ, wɔ mmerɛ bɔ ye mma mɔ besu bɛfrɛ Nyameɛ, bɔ ɛhɔen apɛ bɛ maa bɛposa bɛ nwo ɔ?