Read Sehwi Yob 39 Bible Online

Yob 39 - Sehwi bible

Yob 39

¹“Eburo mbɔngye bɔ bɛwɔ mmokaa so ne, ɛse mmerɛ horɛ bɔ bɛwo ɔ? Dabɔɔ mɔ fo aworɛ so a, wɔ yeɛ ɛnea bɛ maa bɛwo ɔ?

²Ɛkɔhora kɔha bosome somaa bɔ bɛfa bɛnwonzɛ ɔ, anaa ɛse mmerɛ bɔ bɛwo bɛ mma ɔ?

³Ɛse mmerɛ bɔ bɛkoto berɛ bɛwo bɛ mma, mmerɛ bɔ bɛ ko halɛ ne ye bo pɛ ɔ?

⁴Bɛ mma mɔ bɛ nwo mia, benyi wɔ eburo, bɛpakye bɛ nwo, bɔ benza bɛmma bɛ nwo ko ɔ.

⁵“Nwa yeɛ wama eburo afunum wafa ye nwo wali wahɔ ɔ, afunum anwonyeralɛ ne, nwa yeɛ wasangye ye nyamaa ɔ?

⁶Ye yeɛ mafa ɛserɛ so mayɛ ye awuro, ná mafa ngyee aseɛ mayɛ ye atenaleɛ ɔ?

⁷Okyi dede bɔ ɔwɔ kuro nu ne, na sona bɔ ɔka ye so ne, ɔtea ye a ɔnde.

⁸Mmokaa so yeɛ onya ye noa aleɛ ɔ, na okyinikyini pena nyaa monɛ biala di.

⁹“Aso torɔen kɔpene so kyɛ ɔkɔso wɔ ɔ? Aso ɔkɔla wɔ tuin nu kɔngɔen?

¹⁰Ɛkɔhora kɔfa nyamaa kɔsosɔ ye maa okofundam aseɛnwo, anaa okofundam bɔnza nu koli wɔ si?

¹¹Aso ye anwoserɛ ti ɛkɔfa wɔ wora kowura ye nu, anaa ɛkɔyakyi w’adwuma kowura ye sa kyɛ ɔyɔ?

¹²Aso ede ye di kyɛ okosa kɔwa, kyɛ ɔkɔfa w’aburoo ne kɔwa nekaa bɔ bɛboro aburoo ɔ?

¹³“Soholi ɔbɔ ye ndaa nu anigye so, nakoso, ye ndɛkra ne ye ndaa ne, aso bɛ ne asukɔngɔn deɛ bɛsɛ?

¹⁴Soholi yakyi ye ngyiremvua wɔ anweaa nu, ɔma bɛ nwo yɛ hye wɔ aseɛnwo berɛ,

¹⁵na ye wora fi kyɛ agyirɛ bie kɔgyerɛgyerɛ bɛ, anaakyɛ kaka aboyaa bie kotiatia so ɔ.

¹⁶Ye ti anu yɛ se wɔ ye mma mmaa mmaa mɔ so, kyɛ ebiaa nna ye bɔbɔ ye mma ahɔ ɔ, na ɔmva ye nwo kyɛ ye fɛɛ kɔyɛ mbaen ɔ;

¹⁷ofikyɛ Nyameɛ amma wannwu nworɛ, na ɔhyɛle nimdeɛ ne, wamma ye bie.

¹⁸Nakoso sɛ ɔbɔ ye ndaa nu kyɛ otu a, ɔsere pɔngɔ ne sona bɔ ɔte ye so ɔka ne.

¹⁹“Aso wɔ yeɛ ɛma pɔngɔ anwoserɛ ɔ? Wɔ yeɛ ɛma ye kɔme nya anwoserɛ ɔ?

²⁰Wɔ yeɛ ɛmaa ohuruhuru kyɛ abɛbɛ ɔ? Ye nwomeɛlelɛ foofoo ne, ɔyɛ suro.

²¹Ofumvu aseɛnwo, na odi ye anwoserɛ nwo ahurusi, na ɔkɔ ye nyunu moa okogyina koɛ noa.

²²Esurolɛ nwo yɛ ye sere, na onzuro, na ɔnnwati mvi ngrandɛ nyunu.

²³Agyaen ndokue, pealɛɛ hyɛmhyɛm ne buralɛ tendenn tworɔntworɔn bɛwosowoso wɔ ye nwo.

²⁴Otu amirika nyeranyera wɔ anyeborolɛ ne ɛyaa so, na ɔte totorobɛndo hulɛ a, ogyina a ongyina.

²⁵Behu totorobɛndo a, ɔtea nu kyɛ, ‘Yieee!’ Koɛ wɔ dedeede a, ɔte ye nwo mverɛ, yeɛ safohene mɔ b’esebɔlɛ ne koɛ esebɔlɛ koso, ɔwɔ dede a, ɔte.

²⁶“Aso wɔ nworɛ yeɛ ɔma akorɔma tu kɔ anwuro anwuro, ná ɔtrɛtrɛ ye ndaa nu kyire ngwaen ɔ?

²⁷Wɔ yeɛ ɛkã kyire kɔleɛ maa otu kɔ anwuro, ná ɔnwo ye saen wɔ anwuro anwuro ɔ?

²⁸Ɔte nyɔbotaen mɔ nu, na nu yeɛ ɔla ɔ, na nyɔbotaen nemɔ anu anwuro anwuro dɔ te ye atenaleɛ.

²⁹Ɔte dɔ a, ɔtoto ye nye pena kaka bɔ ɔkɔhye ye ɔ, na ye nye nwona bɔ nikyee wɔ dededede a onwu ye ɔ.

³⁰ Mogya yeɛ ye mma mɔ bɛno ɔ, na nekaa bɔ bahu mmenia bagua ne, berɛ yeɛ ɔkɔ ɔ.”