Read Sehwi Yob 4 Bible Online

Yob 4 - Sehwi bible

Yob 4

¹Yeɛ Temanniɛ Elifase buale kyɛ,

²“Sɛ ebie ka edwirɛ he anwo bie kyire wɔ a, ɔkɔha wɔ anaa? Nakoso nwa yeɛ ɔkɔhora komua ye noa ɔ?

³Tie, atengyɛtengyɛ mmenia pee, yeɛ ahyɛ bɛ bɔ bɛyɛ mmerɛ ɔ nguraen.

⁴Bɛ bɔ basoti ne, wɔ noa dwirɛ amaa bagyina, yeɛ nangoroma bɔ wayɛ hodwoo ne, ama nu ayɛ se.

⁵Nakoso wɔ de, sɛ ahɔ amaneɛ nu a, engonya aboterɛ, na sɛ wato wɔ a, wɔ de w’aba nu abu!

⁶Aso nna Nyameɛ surolɛ bɔ ɔwɔ wɔ nu ne yeɛ odi kyɛ ɛfa wɔ nwo to so ɔ? Yeɛ wɔ nahorɛlilɛ koso, aso nna w’anyelasoɛ ɛne?

⁷“Dwene ye nwo! Nwa yeɛ ye ayieleɛ koyie ye bɔ nna bɔne yeɛ wayɔ ɔ? Anaakyɛ, nisua yeɛ banua mmenia bɔ bɛtengyɛ ɔ bɛ boso ɔ?

⁸Bɔ mese ole kyɛ, bɛ bɔ betutu amumuyɛɛ bɛtɛ, ná bedua amaneɛ ne, bɔ batɛ ne bɔ balua ne ala yeɛ bɛtete ɔ.

⁹Nyameɛ ye nwomeɛ yeɛ oku bɛ ɔ, na ye ɛyaafɛlɛ noa hyerɛ ma bɛ boso nua.

¹⁰Gyata polɛ ne gyata bɔ ye nye aboro ɔ ye suɛ bo apɛ, yeɛ gyata akrɔngrɔma mɔ koso bɛ gye atutu.

¹¹Sɛ gyata onnya naen ngye ye nni a, owu, na gyata beleɛ ye mma nemɔ bɛbɔ aya.

¹²“Ebie hane edwirɛ bie hyirele me kudɛɛ, otuli me asure.

¹³ Kɔngɔen laleɛ bie anu yeɛ ndele ɔ, mmerɛ bɔ adasa bɛda hatee ne.

¹⁴Ahunundetelɛ ne ɛserɛ tɔle me so, na ɔmane me mmowue amukoraa wosole.

¹⁵Sunzum bie pɛle nu wɔ me nye so, na me nwo yɛle me nyininini.

¹⁶Ogyinane berɛ konn, nakoso mannwu kyɛbɔ ye sue osi te ɔ. Nikyee bie ye sue gyinagyinane me nye so, berɛ yɛle dinn, na ndele komviɛ bie kyɛ,

¹⁷‘Aso dasaniɛ kɔhora kɔtengyɛ kɔtra Nyameɛ[3]? Aso dasaniɛ kɔhora kɔtengyɛ kɔtra Nyameɛ bɔ ɔbɔle ye ɔ?

¹⁸Sɛ Nyameɛ somvoɛ mɔ po, ɔmva ye nwo ndo bɛ so, ná osa nwu ye abɔfo mɔ bɛ nwo mvomsoɛ a,

¹⁹né nzaade, dasaniɛ bɔ bɛfale nnɛterɛ bɛnwone ye, bɔ ofi mvuture nu, bɔ betia ye so bɛbɛtɛ ye kyɛ mvrɔlɔ ne, ye de ogyi ye sɛ?

²⁰Ngyerɛmɔ, dasaniɛ te ngoa nu, nakoso kyɛ oodwu nɔsoa ne, né watete pasapasa; otu mini bɔkɔɔ bɔ ebiala nnwu ye ɔ.

²¹Ɛtena sua bɔ odwira bɛ nwo ne, ye nyamaa ne abo tutu, na bewu bɔ bennwu nworɛ biala ɔ.’