Read Sehwi Yob 40 Bible Online

Yob 40 - Sehwi bible

Yob 40

¹Yeɛ AWURADE toale so bisale Yob kyɛ,

²“Sona bɔ ɔbɔ Tuminiɛ ne somoɛ ne, aso sɔ sona ne ɔne ye bɛkɔbɔ nguro anaa? Sona bɔ ɔne Nyameɛ besu aporowaa ne, ɔsɛ kyɛ ɔye Nyameɛ noa.”

³Yeɛ Yob buale AWURADE kyɛ,

⁴“Nahorɛ nu, nnde huu! Ɔkɔyɛ sɛɛ né manya mmuayɛɛ mama wɔ? Mafa me sa mato me noa.

⁵Mahã ko, na mengodwudwo ko, yoo, madwudwo pɛen nyɔ, na mengɔtɛ me noa nu ko.”

⁶Yeɛ AWURADE dwudwole fili mvrama bɔ ɔpɛ ye nwo ne anu obuale Yob kyɛ,

⁷“Bɔ w’abɔsoɛ kyɛ bienzua, mebaabisa wɔ dwirɛ, na ye ye noa kyire me.

⁸Ɛnwa nzɛ mebua ndɛengyea anaa? Ebua me fɔ maa wɔ de edi be anaa?

⁹Aso ele tumi kyɛ Nyameɛ deɛ, wɔ komvi kɔhora kɔbɔ nu kurudududu kyɛbɔ ye deɛ ɔbɔ nu ne?

¹⁰Nzaade fa ahennie ne anidie siesie wɔ nwo e! Nzaade fa animnyam ne nyemene kera e!

¹¹Ma w’ahone hu hahii e! Nea anwomasoɛniɛ biala, ná brɛ ye ase.

¹²Nea anwomasoɛfoɛ amukoraa, ná brɛ bɛ ase, ná tiatia bɔnefoɛ so wɔ nekaa bɔ bɛwɔ ɔ.

¹³Fu bɛ mukoraa wura ase, fa bɛ gua kuku nu wɔ afealeɛ e.

¹⁴Sɛ ɛkora sɔ yɔ a, me bɔbɔ ngɔbɔ w’aba so, kyɛ wɔ bɔbɔ w’anwoserɛ kora de wɔ ngoa.

¹⁵“Nea nzue nu ɛsoen, bɔ ɔte m’abɔdeɛ kyɛ wɔ ala ne, odi ndire kyɛ nandwie ala.

¹⁶Ye anwoserɛ wɔ ye afia, na ye tumi wɔ ndii bɔ ɔwɔ ye kunu ne anu.

¹⁷Ɔma ye dua yɛ kyeinn kyɛ bakaa bɔ bɛfrɛ ye sida, na banwo ye sɔ ndii nemɔ babɔ nu.

¹⁸Ye mmowue nu yɛ se te kyɛ kɔɔbere, na ye mmowue te kyɛ buralɛ.

¹⁹“Ɔte sonongo wɔ Nyameɛ sa noa adwuma nu, sana me bɔ mmɔle ye ne yeɛ mekora mefa ngrandɛ meku ye ɔ.

²⁰Mmokaa mɔ yeɛ bɛma ye aleɛ ɔ, nekaa bɔ eburo ngaka mukoraa bedi angorɛ ɔ.

²¹Aprokotaa bo yeɛ ɔda ɔ, na ngyɛngyɛma nu ne asaa nu yeɛ ɔfea ɔ.

²²Aprokotaa nyaa ne onwi ye so ma eyia mmɔ ye, na asue noa gyaka pɛ ye nwo yia.

²³Sɛ asue yi ma ye noa yɛ hye po a, onzuro, yeɛ sɛ asue Yɔɔdan obu fa so ma nzue ɔbɔ wura ye noa nu po a, ye kunu ndete ye.

²⁴Nwa yeɛ ɔkɔhora kɔhye ye anyekaenn so, anaa ɔkɔhora kɔfa buralɛ kotofi ye bonyi anu ɔ?