Read Sehwi Yob 41 Bible Online

Yob 41 - Sehwi bible

Yob 41

¹ “Ɛkɔhora kɔfa koaa kɔhye ɛlɛngyɛen suronyisuronyi kɔhwe ye kofite, anaa ɛkɔhora kɔfa nyamaa kɔkyekye ye temverema?

²Ɛkɔhora kɔfa nyamaa kowura ye bonyi anu, anaa ɛkɔhora kɔfa koaa kɔbɔ ye awogyee?

³Ɔkɔhɔ so kɔpa wɔ kyerɛ anaa, anaakyɛ ɔkɔyɛ ye noa bɛtɛɛ kohyire wɔ?

⁴Aso ɔne wɔ kɔyɛ apam, kyɛ fa ye yɛ w’akoaa afebɔɔ anaa?

⁵Ɛne ye bekoli angorɛ kyɛ anomaa, anaa ɛkɔto ye kɔme nyamaa kɔfa ye kɔma w’afaneɛ mɔ anaa?

⁶Aso dwadifoɛ bekoli ye noa bɛkɔtɔne ye? Aso dwadifoɛ bekosi ye koso anaa?

⁷Ɛkɔhora kɔfa pealɛɛ kɔwowɔ ye wereɛ nu, anaa ɛkɔhora kɔfa egyein pealɛɛ kɔwɔ ye ti anu?

⁸Fa wɔ sa sɔ ye nu nea, na bɔ ɔkɔfa kɔyɔ wɔ ne, ɛngɔhɔ ye nwo ko!

⁹Eh! Sɛ ɛpena ye kye ye a, ɛkɔfɛ kogua mbaen, wɔ nye bɔ ye so a, aso emvi ase?

¹⁰Ebiala nne berɛ bɔ ɔkɔhora kosi ye ahone kɔɔgyegye ye ɔ. Né nzaade, nwa yeɛ ɔkɔhora kogyina me nyunu ɔ?

¹¹ Nwa yeɛ wali moa wama me nikye, bɔ odi kyɛ meyɔ bie metua ye kerɛ ɔ? Nikyee biala bɔ ɔwɔ ewienu nekaa biala bo ne, ɔte me deɛ.

¹²“Kaka ne, ye aporɛ so nemɔ, mengɔyakyi bɛ nwo dwirɛ hanɛ, yeɛ ye anwoserɛ, ye tumi, ye sue ne ye nyemene ne, ye koso mengɔyakyi ye hanɛ.

¹³Nwa yeɛ ɔkɔhora kopuro ye si boen ɔ? Buralɛ ndaasoɛ bɔ ɔkata ye hue so ne, nwa yeɛ ɔkɔhora kotofi nu ɔ?

¹⁴Nwa yeɛ ɔkɔhora kobukye ye awogyee nu ɔ? Ye gye bɔ ogua ye noa nu amukoraa ɔyɛ suro.

¹⁵Ye si boen ne, wasa folii, na bahã babatabata so kyɛ nikyee bɔ basosɔ ɔ.

¹⁶Bamatamata so, bɔ mvrama ngora mva ye afia ɔ.

¹⁷Bepingyepingye so, baha batoatoa nu, bɔ ɛte nu a ɔnyɛ yee ɔ.

¹⁸Sɛ ɔpɛ ɛyaen a, né ɔtete see, ye nye mmaa te kyɛ ngyerɛmɔ eyia bɔ wapukye ɔ.

¹⁹See wuronyiwuronyi fi ye noa nu fite, na ye noa nu pa see.

²⁰Nwosina tu fi ye bonyi anu, kyɛ etutue bɔ otu fi kukue bɔ ogyi see so ɔ nu, kyɛ ngyɛngyɛma bɔ ɔyera ɔ nu.

²¹Ye nwomeɛ ma see tɔ ebunaen nu, na see nzramaa tete fi ye noa nu.

²²Anwoserɛ wɔ ye kɔme bakaa nu, na nikyee bɔ ɔyɛ suro ne, ɔnyɛ ye suro.

²³Ye nwonaen bɔ wabu wagua so ne, nu mia, ɔyɛ se kateree gua ye nwo, na ɔnwoso.

²⁴Ye ahone yɛ se kyɛ nyɔboɛ, amba, ɔyɛ se te kyɛ nyɔboɛ bɔ beti so ayire ɔ.

²⁵Sɛ ɔma ye nwo so a, ɛserɛ ka tumifoɛ, na ɔkekã ye nwo a, besa bɛ si.

²⁶Ɛfa ngrandɛ pɛ ye a ɔmbɛ, yeɛ pealɛɛ, agyaen ne buralɛ tendenn tworɔntworɔn koso bɛngora ye wɔ.

²⁷Buralɛ te ye nye so ngyɛngyɛma, yeɛ kɔɔbere koso, obu ye kyɛ dufure bie.

²⁸Agyaen ngora mma ɔnwati, yeɛ obu taya nyɔboɛ kyɛ afafu.

²⁹Abopura te ye nye so ngyɛngyɛma, yeɛ sɛ bɛto buralɛ tendenn tworɔntworɔn hwii a, ɔyɛ ye sere.

³⁰Ye kunu boen yɛ nna te kyɛ nyangaa bue, na ɔbea asaa nu kyɛ ndaboa bɔ bɛboro so aburoo ɔ.

³¹Ɔwoso buma kyɛ nzue bɔ ohu wɔ kukue nu ɔ, na ɔma ɛpo hu kyɛ kukue nu sakyeɛ bɔ ogyi see so ɔ.

³²Ɔkɔ a, ɔyakyi ahure fitaa atee wɔ ye si, bɔ ɔmaa esusu kyɛ ɛpo afu gyein ɔ.

³³Ye sɛso nne aseɛ so, ɔte abɔdeɛ bɔ onzuro hwee ɔ.

³⁴Ɔnea kaka biala bɔ ɔmoma ye nwo so ɔ, na odi hene wɔ ngaka anwomasoɛ amukoraa so.”