Read Sehwi Yob 42 Bible Online

Yob 42 - Sehwi bible

Yob 42

¹Yeɛ Yob buale AWURADE kyɛ,

²“Mese kyɛ ɛkora yɔ nikyee biala, na ebiala ngɔhora ngosi wɔ nhyehyɛleɛ ate.

³ (Ebisale kyɛ,) ‘Sona bɔ nimdeɛ abɔ ye beni ɛne, bɔ obu me nhyehyɛleɛ animtia ye?’ Yiti nahorɛ nu, mahã edwirɛ bɔ né mende ye bo ɔ, edwirɛ anwanwasoɛ bɔ ɔbo me so, bɔ né menze ɔ.

⁴ Mesrɛ wɔ, tie, na mebaadwudwo! Ngobisa wɔ dwirɛ, na kyirekyire me.

⁵Me so yeɛ mva ndele wɔ nga ɔ, nakoso afei de, me nye nwu wɔ.

⁶Yiti manu me nwo, na me nwo yɛ me nya, na mafa mvuture ne nzoen magua me nwo.”

⁷Na AWURADE hane sɔ dwirɛ ne hyirele Yob yiele nen, AWURADE sele Temanniɛ Elifase kyɛ, “Mafɛ wɔ ne wɔ damvo nyɔ nemɔ so yaa piri paa, ofikyɛ ɛmɔanga me nwo dwirɛ nahorɛ nu, kyɛbɔ me somvoɛ Yob de waha ye nahorɛ nu ne.

⁸Yiti ɛ́mɔfa nandwie nyii nzoo ne mmoaen nyii nzoo, ná ɛmɔhɔ me somvoɛ Yob berɛ bɛɛbɔ ɛmɔ ti naen yeralɛ afɔleɛ. Me somvoɛ Yob kɔbɔ mbaeɛ kɔma ɛmɔ, ofikyɛ ngotie ye mbaeɛ, na mengogyina ɛmɔ ngwaseasɛm ne aso me ne ɛmɔ ngoli. Ofikyɛ ɛmɔanga me nwo dwirɛ nahorɛ nu, kyɛbɔ me somvoɛ Yob de waha ye nahorɛ nu ne.”

⁹Yiti Temanniɛ Elifase, Suhiniɛ Bildade ne Naamaniɛ Sofa bɛhɔle bɛɛyɔle bɔ AWURADE ha hyirele bɛ ne, na AWURADE tiele Yob mbaeɛ ne.

¹⁰ Yob bɔle mbaeɛ mane ye damvo nemɔ yiele nen, AWURADE maa osa sili ye gya nu bieku. Bɔ né Yob ole ye daa ne amukoraa, AWURADE fale ye mmɔhoɛ nyɔ mane ye.

¹¹Afei Yob aliɛma mmienzua mukoraa ne oliɛma mmrasua mukoraa ne ebiala bɔ né ɔse Yob daa ne, bɛwale ye berɛ, na bɛ ne ye didili wɔ ye awuro. Bɛdodole ye, na bɛkyekyele ye wora wɔ amaneɛ amukoraa bɔ AWURADE maa ɔtole ye ne anwo. Bɛ nu biala mane ye sikaa ne sikaa kɔkorɛ kaa ko.

¹²Afei AWURADE yirale Yob mane ye ayieleɛ yiele ye yé trale kyɛbɔ ɔbɔle ye bo ne. Onyane mmoaen apee buru ne nna, afupɔngɔ apee nzia, nandwie nyɔ nyɔ bɔ bafa kɔnnua basosɔ bɛ babɔ nu ɔ apee ko, yeɛ afunum mmeleɛ apee ko.

¹³Osa wole mmienzua nzoo ne mmrasua nza.

¹⁴Ɔtole brasua bɔ oli moa ne dumaa Yemima, bɔ ɔtɔ so nyɔ ne Kesia, yeɛ bɔ ɔtɔ so nza ne Keren Hapuke.

¹⁵Aseɛ ne aso amukoraa, né brasua biala nne berɛ bɔ ye anwonyemene te kyɛ Yob mma mmrasua nemɔ ɔ. Na bɛ baba mane bɛ ne b’eliɛma mmienzua nemɔ agyapadeɛ.

¹⁶Ɛhe asi ne, Yob tenane ngoa nu afoɛ ɛyaa ko ne aburanna, na onwuni ye mma ne ye nnomaa maa oodwuli aworɛ ndoatoasoɛ nna nu.

¹⁷Na Yob nyini yɛle aworowaa posoposo koraka yeɛ owu ɔ.