Read Sehwi Yob 5 Bible Online

Yob 5 - Sehwi bible

Yob 5

¹“Tea nu frɛ kekesaala e! Aso ebie kɔtɛ wɔ so anaa? Krongronfoɛ nemɔ, nu beni yeɛ ɛkɔfa wɔ dwirɛ kɔto ye nyunu ɔ?

²Susu amba kyɛ, ɛyaafɛlɛ ku ngwaseafoɛ, yeɛ anyeboroborolɛ koso oku bɛ bɔ bagyimi ɔ.

³Manwu kwaseaa bɔ ye bra ayie ye yé ɔ, nakoso mvum nu, mbayele ye awuro.

⁴Asane li ye mma mɔ mvanvando, bebua bɛ ndɛengyea wɔ mbanyi nyunu, bɔ ebiala mbepɛ nne bɛ ɔ.

⁵Bɛ bɔ bennya aleɛ benni ne yeɛ bedi ye fieso aleɛ ɔ, na fieso aleɛ bɔ ɔwɔ mmowue nu po, bɛsesa bɛkɔ, na adifuufoɛ bɛpere bede ye anwonya.

⁶Ofikyɛ, musue mvi nnɛterɛ nu yeɛ ɔba ɔ, yeɛ amaneɛ koso mvifi mvi aseɛnwo.

⁷Na mmom, bɛwo sona bɛto amaneɛ nu, kyɛbɔ kobogya tu kɔ anwuro ne ala.

⁸“Sɛ me ahɔ a, ahaa ngɔpena Nyameɛ si atee, na Nyameɛ yeɛ ngɔfa me dwirɛ ngowura ye sa ɔ.

⁹Ye yeɛ ɔyɔ nningyein mbiri mbiri bɔ ɔbo sona ndeaseɛ so ɔ, anwanwadeɛ nningyein bɔ bɛka a bennwu ye noa ɔ.

¹⁰Ye bɔ ɔma esue tɔ gua aseɛ so, ná oguagua fieso so nzue ne,

¹¹ɔma anwobrɛaseɛfoɛ so, na ɔma bɛ bɔ bedi aworabɔlɛ so ɔkɔ anigye nu.

¹² Ɔsɛkye kandafoɛ bɛ porɛ bɔ bɛbɔ ɔ, maa ɔnate so bɛngora bɛnyɔ nikyee pasiliwa biala.

¹³Nworɛfoɛ bɛ bɔbɔ bɛ kanda yeɛ ɔfa sua bɛ ngaen kye bɛ ɔ, na ɔma nnakannakafoɛ bɛ porɛbɔlɛ yɛ mbaen.

¹⁴Awosii to bɛ alehyeleɛ nu, na befuafua eyia ketee kyɛ kɔngɔen ahɔ ne.

¹⁵Nakoso Nyameɛ ode sona bɔ ɔyɛ anwumvo ɔ ofi bɛ noa dwirɛ bɔ odi awue ne anu, ɔne tumifoɛ bɛ sa nu.

¹⁶Yiti anyelasoɛ wɔ berɛ ma sona bɔ ɔyɛ anwumvo ɔ, na Nyameɛ ka amumuyɛɛfoɛ bɛ noa to nu.

¹⁷ “Sona bɔ Nyameɛ twi ye nyunu ne, onya saleɛ, yiti wɔ so bɔ Ɛdangama Nyameɛ ɔtwe ne, nnɛkã kyɛ ɛmbene so.

¹⁸ Ofikyɛ Nyameɛ bɔ opura sona nen, ye ala yeɛ ɔbɔ so borɛ ɔ; ye bɔ ɔbɔ fɛɛ ne, ye sa yeɛ ɔsa anwonyerɛ ɔ.

¹⁹Ɔkɔye wɔ kofi amaneɛ sɔ alaa nzia nu, yoo, na bɔ ɔtɔ so nzoo ne anu, edwirɛ biala ngɔto wɔ.

²⁰Sɛ ɛhɔen pe a, okole wɔ kofi ewue nu, yeɛ koɛ nu koso, okole wɔ kofi ngrandɛ noa.

²¹Okole wɔ kofi kuro sona noa bɔ odi awue nu, na sɛ musue ba a, engosuro.

²²Ɛkɔsere musue ne ne ɛhɔen, na aseɛ so ngaka aboyaa koso, engosuro bɛ.

²³Ofikyɛ ɛne eburo nyɔboɛ mɔ bɛkɔyɛ apam, na eburo ngaka mɔ bɛ ne wɔ kɔtena asomdwee nu.

²⁴Ekonwu kyɛ asomdwee wɔ w’awuro, na sɛ ɛneanea w’agyapadeɛ nu a, ekonwu kyɛ nikye fee nne berɛ bɔ wamini ɔ.

²⁵Ekonwu ye koso kyɛ wɔ boso ama bata pee, na wɔ kunu mmaa kɔyɛ pee kyɛ aseɛ so ndire.

²⁶Ekonyi kɔyɛ posoposo koraka né awu, kyɛbɔ bebu aburoo worowaa wɔ ye mmerɛ nu ne.

²⁷Nea, yafeefee ɛhe anu, na yanwu kyɛ ɔte nahorɛ. Yiti tie, ná fa to wɔ ti anu.”