Read Sehwi Yob 6 Bible Online

Yob 6 - Sehwi bible

Yob 6

¹Yeɛ Yob buale kyɛ,

²“Eh! M’aworabɔlɛ ye, sɛ bɛkari a ɔyɛ yé a, m’amaneɛnwunɛ ye, sɛ bɛfa ye mukoraa besie tonyi so a ɔyɛ yé a!

³Ahaa nu nonɛ kɔtra mboanoa anweaa; ye sɔ ati, ɔmaa ngane edwirɛ fumfum.

⁴Ofikyɛ Ɛdangama Nyameɛ ato ye agyaen mɔ wawowɔ me, me sunzum ɔno bɛ noa borɔ ne, na Nyameɛ ɛyaafɛlɛ ne ɔko tia me.

⁵Sɛ eburo afunum nya ɛserɛ ná odi a, aso osũ? Yeɛ sɛ nandwie koso nya aleɛ a, aso osũ?

⁶Aleɛ bɔ ɔte bitaa ne, ngyee nne nu a, aso bedi a odi? Kyiremvua si fufue ne, aso ɔyɛ fɛ?

⁷Me komvi nne sɔ aleɛ nemɔ aso, bɛte aleɛ bɔ bɛma me noa nu sa ɔ.

⁸“O, m’abisadeɛ ne, sɛ ahaa me sa ka ye a, m’anyelasoɛ ne, sɛ Nyameɛ maa menya ye a,

⁹sɛ ahaa Nyameɛ kohuro kyɛ okohu me a, sɛ ahaa ɔkɔte me ngoa nyamaa nu kohũ me a!

¹⁰Ahaa ewue ne kɔyɛ m’aworakyekyerɛ, bɔ m’amaneɛnwunɛ nu po, ahaa me nye kɔgye ɔ, ofikyɛ Krongronniɛ ne, ye noa dwirɛ ne, nndwi mmvale so.

¹¹M’anwoserɛ wɔ ni, bɔ odi kyɛ megyina so menya anyelasoɛ ɔ? Yeɛ m’ayieleɛ koyie me sɛ, bɔ odi kyɛ megyina so mekyekye me wora ɔ?

¹²M’anwoserɛ ne, aso ɔte kyɛ nyɔboɛ anwoserɛ anaa? Me nwonaen ne, aso ɔte kɔɔbere anaa?

¹³Nahorɛ nu, mengora ye noa gyina ko, yeɛ mmokalɛ biala mvi neka fee mma.

¹⁴“Sona bɔ wali amia ne, sɛ obiɛngo annwu ye anwumvoin a, ye de né obiɛngo ne apo kyɛ okosuro Ɛdangama Nyameɛ ɔ.

¹⁵Nniɛma mɔ, bedi ngasi kyɛ asue ba bɔ ɔtengyɛ asuso mmerɛ ngome ɔ, bɛte kyɛ asueba bɔ ɔwewe ɔ,

¹⁶bɔ asukɔtwea akata ye nye, bɔ asue ne ɔtengyɛ wɔ ye bo ɔ.

¹⁷Nakoso sɛ ahuhuro mmerɛ ba a, ohuro, yeɛ sɛ eyia bɔ gyireingyirein a, ye boso mini.

¹⁸Dwadifoɛ bɔ bɛtete afupɔngɔ so ne, bɛmakye befi b’atee so, na bɛkɔ ɛserɛ so bekowuwu.

¹⁹Tema dwadifoɛ bɔ bɛtete afupɔngɔ so ne, bɛpena sɔ asueba ne, Hyeba ateetulɛfoɛ bɛ nye la so kyɛ bekonwu ye ɔ.

²⁰B’aba nu buli, ofikyɛ né bɛ nye la so kyɛ bekonwu ye, bɛkɔ bekodwu berɛ a, né bɛ nyunu agua ase.

²¹Sɔ ala yeɛ kekesaala ye ɛmɔ koso ɛmɔmmoka me ɔ; ɛmɔanwu amaneɛ bɔ wato me ɔ, na wama ɛserɛ aha ɛmɔ.

²²Mahã kyɛ mepena akyɛdeɛ mefi ɛmɔ berɛ anaa, anaakyɛ ɛmɔfa ɛmɔ sikaa betua fea-ase-ma bele me anaa,

²³anaakyɛ ɛ́mɔle me befi pɔfoɛ ne sa nu anaa, anaakyɛ ɛmɔpɔ me befi bɔ ɔteetee me ne sa nu anaa?

²⁴“Ɛmɔhyirehyire me e, na ngomua me noa, bɔ mayɔ bɔ ɔtte mayee ne, ɛ́mɔma nwu ye.

²⁵Edwirɛ nahorɛ ye hanɛ yɛ se! Nakoso me nyunu bɔ ɛmɔtwi ye, nzikyɛ paa yeɛ okyire ɔ?

²⁶Me dwirɛ deɛ ne, ɛmɔbu ye animtia hɔ ɔ? Ɛmɔdwene kyɛ sona bɔ ɔyɛ anwumvo ne, odwudwo gua mvrama nu anaa?

²⁷Ayisiaaniɛ po, ɛmɔgua ye nwo serewa, yeɛ ɛmɔ adamvo koso, ɛmɔdi ye noa bɛtɔne ye.

²⁸“Afei de, mepena kyɛ ɛmɔnea me nyunu, ofikyɛ mengɔpɛ anoanu wɔ ɛmɔ nyunu.

²⁹Ɛ́mɔyakyi, nnɛma ɛmɔbua me ndɛengyea, ɛ́mɔyakyi, na medi be.

³⁰Aso nnakannaka dwirɛ wɔ me noa nu anaa, anaakyɛ mende yealɛ anaa?