Read Sehwi Yob 7 Bible Online

Yob 7 - Sehwi bible

Yob 7

¹“Aseɛ ye aso bɔ dasaniɛ te ye, aso nna nzɔhwɛ serɛserɛ noa yeɛ ogyi ɔ? Ye ngyẽa ne, aso onzoma paaniɛ ngyẽa.

²Ɔte kyɛ kanganiɛ bɔ ɔpena fɔnwoo nu tena ɔ, ɔte kyɛ paaniɛ bɔ ɔnwondɛ ye akatuaa ɔ.

³Yiti bosome pee yeɛ nningyein ayɛ basaa wɔ m’asetena nu ɔ, ɔne aworabɔlɛ kɔngɔen mɔ yeɛ bakyekye basoa me ɔ.

⁴Sɛ mekɔ meda a, mebisa me nwo kyɛ, ‘Mmerɛ beni koraa yeɛ aleɛ kɔhye maa ngodwɔso ɔ?’ Nakoso aleɛ ngye le, metɔ faen biribra, né matɔ faen biribra toonn ama aleɛ ahye.

⁵Me nwonaen alɔ nnɔboakoma, na wayɛ fiɛ betɔɔ, me wereɛ apakyepakye, na otwi nzue.

⁶ Me mmerɛ se kɔ ndɛndɛ tra akurokurowa, na ɔba ayieleɛ bɔ anyelasoɛ biala nne nu ɔ.

⁷“Kaye kyɛ me ngoa te mvrama, me nye ngɔgye ko.

⁸Anyeɛ bɔ onwu me ne, ongonwu me ko, wɔ nye kotua me, nakoso né matu mamini.

⁹Na kyɛbɔ munungum se kɔ ná otu mini ne, sɔ ala yeɛ ebiala bɔ ɔkɔ ɛborɔ dɔ ne, onza mma ko ɔ.

¹⁰Onza mma ye awuro berɛ ko, na nekaa bɔ ɔte ne, berɛ ama ngonwu ye ko.

¹¹“Yiti mengomua me noa, ngɔhã yealɛ bɔ me sunzum onwu ye ɔ, na ngɔbɔ aworabɔlɛ bɔ me kra di ɔ nwo somoɛ.

¹²Aso nde ɛpo anaa ɛpo nu sasrabɔnzam, bɔ ɛma awɛmvoɛ bɛ nye li me si ɔ?

¹³Sɛ mesusu kyɛ, ‘Me mba kɔkyekye me wora, yeɛ me bɛen kɔma me nwo kɔtɔ me kãa a,

¹⁴né afa laleɛ anwunanwuna me, né afa nyekyire aha me serɛ.

¹⁵Ah! me kra kuro kyɛ bekomia me kɔme maa ngowu mmom tra kyɛ ngɔfɔ maa ɔkɔha me mmowue ɔ.

¹⁶Afei de, ewiase afono me. Mengɔtena ngoa nu daa. Yakyi me, ofikyɛ me ngoa te mbaen.

¹⁷ Dasaniɛ te nzu koraa, bɔ ebu ye titire sɔa ye, bɔ w’adwene wɔ ye so sɔa ye,

¹⁸bɔ ɛkɔpasa ye nwo ngyerɛmɔ biala ɔ, bɔ mmerɛ biala eso ye nea enwu kyɛbɔ osi te ɔ?

¹⁹Wɔ nye bɔ ɛfa nea me ye, kyinzu koraa yeɛ ɛkɔye kofi me so ɔ, bɔ ɛnyakyi me ma mennya bua nu nzue menza menno po ye?

²⁰Wɔ bɔ esisa adasa ɔ, sɛ mayɔ bɔne po a, ahaa ɔfa wɔ nwo nzu? Nzu ati yeɛ atu wɔ nye asie me so ɔ? Nzu ati yeɛ amaa mayɛ wɔ so tɔsom ɔ?

²¹Me mmeraatolɛ ne, nzu ati yeɛ ɛmva ngyɛ me ɔ? M’amumuyɛɛ ne, nzu ati yeɛ ɛnyakyi ma ɔnga ɔ? Ɔngɔhyɛ biala, ngɔɔla nnɛterɛ nu, ɛkɔpena me, nakoso né nne berɛ ko.”